Azee 1
1
Lawa a kion dɔ biikoo
1 #
ƐSID 4.24—5.2; 6.14. Dariyusu a koa kii lɛa lɛ̀ paabaa ǹ wɔ a mui sɔrɔbaa ǹ wɔ a lɛawaa bibinaa, Lawa a boo gii-dali Azee Dɛnaa Lawa a boo kɛ da Salatieli a nɛgiĩ Zudaan gánadɛnaa Zorobabeli ni ka Lawa a wúlu bɔlen goleedɛnaa Zozoe, Zozadaaki a nɛgiĩ ni, á pɛ: 2– Dɛnaa Lawa Pàãyiidɛnaa n kɛ pii: «Tɔrɔn kɛn man pii mà Dɛnaa Lawa a kion lɛ a doe biikoo tɔn dɔ wa.»
3Bɛ lɛ nɛ, Dɛnaa Lawa a boo gii-dali Azee tɔ́n Dɛnaa Lawa a boo kɛ da ǹ nɛ: 4«Kaa giã kaa kion siĩnin kɛn nɛ biikoo na á dɔ ka yii li, a da yaa masɛ dɔ wɔ n ziziɛ̃-n tán ka yɔrɔ-a? Á kɔnbɔ ka giã kion siĩnin kɛn nɛ ka nyaǹ kaa ǹ gɔ́ɔ̃ nɛ, masɛ wɔ n kɛbɔlɔ biɛ?» 5Kanna kəni masɛ Dɛnaa Lawa Pàãyiidɛnaa n pii: Sii mɛn bɛ́ ka yii, ka ǹ taasɛ bɛ-a taãnɛ. 6Kaa màn diɛ mɔnaa, sɛnɛ kaa kaa-piɛ siĩn kɔ wa. Ka n màn bii, sɛnɛ kaa kiɛ̃ wa, ka n màn mii, kaa mu boro dɔ a nyɛɛ wa, ka n mɔnaa we sɛnɛ a kaa nyan nyɛɛ wa, ka n saraa yii, sɛnɛ a n woe zéwo giala koo-a nɛ. 7Á ke masɛ Dɛnaa Lawa Pàãyiidɛnaa n pii kɛnɛn. Sii mɛn bɛ́ die ka-a, ka n taasɛ ka ga a giala li taãnɛ. 8Ka wo kele la ka da ká gɔn nɛ, ka maa kion dɔ nɛ. Ma foo á re kɔɔ̃n koe, ma á re tɔ goleebaa yii, Dɛnaa Lawa na á pɛ miɛ̃. 9Ka yiri na á goã màn gigiã ganaa, sɛnɛ ka n ka màn boɛɛn yɛ. Ka màn mɛn yɛ ka kaa dɔǹ nɛ, má piɛ̃ pɛ a ganaa a yii papaã. Wàa na á baa má bɛ zɛnaa miɛ̃? Dɛnaa Lawa Pàãyiidɛnaa n nɔ̀n diɛ. A giala ka ǹ giɛ ka dinin kionən walan, maa kion lɛ n kɛbɔlɔbaa nɛ. 10Bɛ lɛ nɛ, la nə n lɛ kuru ka ganaa màn kɔn ná a boe tán la wa, ka dinin sii ni. 11Má lɛ̀ gere kɔ gána lɛ nɛ, kaa kele mìin ni, má lɛ̀ gere da kaa *belee wuru-n, rɛzɛ̃ wɔ nɛ ka *olivie wɔ nɛ. Màn mɛn tumaa bɛ́ boe tán la minbuiin nɛ ka tɔɔn wɔ lɛa, ka ka bɛ́ dí mɛn din tumaa nyɛɛ ka ka gɔn nɛ, ma lɛ̀ gere kɔ bɛ tumaa ganaa.
12Salatieli a nɛ Zorobabeli, ka Zozadaaki Lawa a wúlu-bɔlen goledɛnaa a nɛ Zozoe, ka zaman gialakun#1.12 Zamangiala kun: min mɛnɛn tumaa bɔ bɛ̀rɛbaa ǹ bǎã nɛ ǹ nə́ daa, ka ǹ mɛnɛn nə goã ǹ bǎã nɛ. kɛ nə́ ǹ too da Dɛnaa Lawa, ǹ Lawa bɔlɔ li. Ǹ nə́ n too kɔ Lawa a boo gii-dali Azee lon, Dɛnaa Lawa bɛ́ á n mɛn lɛ dia ǹ la, zaman lɛ tɔ́n nyɛ́ɛ baa Dɛnaa Lawa yii ni. 13Bɛ lɛ nɛ Dɛnaa Lawa a dia dí-a wole Azee lɛ tɔ́n boo kɛ da zaman nɛ Dɛnaa Lawa a boo gii lɛa. Dɛnaa Lawa pɛ: «Ma á kun ka nɛ.» Ma din Dɛnaa Lawa a da ǹ boo ne.
14Lawa tɔn wɔ Zudaan gánaadɛnaa Zorobabeli Salatieli a nɛ ka Zozoe Lawa a kion wúlu-bɔlen goledɛnaa Zozadaaki a nɛgiĩ yiri ni ka zaman gialakun kɛ nɛ, mà ǹ da ǹ gòãn doa Dɛnaa Lawa Pàãyiidɛnaa, ǹ Lawa a kion lɛ a dí kɛ ganaa. 15Dí lɛ tɔ́n nə n giala kɔ Dariyusu a kiibaa lɛ̀ paabaa ǹ wɔ a mui sɔrɔbaa ǹ wɔ a lɛawaa fuəwensiibaa ǹ wɔ li.
Currently Selected:
Azee 1: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
