Siin Giala 17

Abramu tɔ á bɔyaa a baa Abrahamu lɛa

1Abramu lɛ̀ pɔmanangɔrɔwenmanangɔrɔ, Dɛnaa nə́ n din nyaa nɛ, á pɛ nɛ kɛnɛn: «Ma din nə Lawa Pàãyiidɛnaa lɛa. Tɔ wɔ masɛ yɔrɔ-a pepere, zɛ̀rɛ baran goã n ganaa wa. 2Man die lɛ kɔ kɔn la we ka nə n nɛ, ma á re n tɔrɔ mɔnɛɛ a la yii ni.»

3Abramu na á kaa tán, á n mìi kuməə. Lawa boo da nɛ á pɛ: 4«Ma bɛ́ lɛ kɔ kɔn la mɛn we ka n nɛ, bɛ á ke: N tá re tɔrɔ gigiã a díi biɛ. 5#RƆM 4.17. Minin ba re n bíi Abramu doo wa, sɛnɛ, n tɔ n die goɛ̃ Abrahamu (bɛ giala mà "Min gigiã a díi"), a giala, man die n biɛ tɔrɔ gigiã a díi lɛa. 6Ma á re n tɔrɔ mɔnɛɛ parsiini, ma toa n tɔrɔn nə gánan baa; kiin dinin tá re boe ǹ bii. 7#LUK 1.55. Ma lɛ kɔ kɔn la mɛn wɔ ka n nɛ, masɛ a re n lɛ boe duduu wa. Man má lɛ kɔ n din la, n tɔrɔn mɛnɛn dɔn bɛ́ re yii n kio, a saa kanna ganaa a wo miɛ̃, ma nə n lɛ koe bɛn dɔn la, yǎa duduu. Bɛa lɛ-kɔ kɛ lɛ n die masɛ biɛ n Lawa lɛa, a ma baa n tɔrɔn dɔn Lawa lɛa, ǹ mɛnɛn bɛ́ re yii n kio. 8#NDS 7.5. N bɛ́ gùli lɛa Kanaan gána mɛn nɛ, ma á re bɛa gána lɛ tumaa koe n laanka n tɔrɔn la, a ǹ wɔ baa yǎa duduu. Masɛ á re goɛ̃ ǹ Lawa lɛa.»

9Lawa wusoo á pɛ Abrahamu ni: «Ma lɛ kɔ kɔn la mɛn wɔ kɔn ka n nɛ, ń die n tamaa. N tɔrɔn mɛnɛn dɔn bɛ́ re yii n kio, bɛn dɔn die ǹ tamaa. 10#NDS 7.8; RƆM 4.11. Ma bɛ́ màn mɛn laɛ ǹ ganaa, n din laanka n tɔrɔ doamaa nɛ ka n doroo ne, bɛ n ka kɛ nɛ: Kaa giĩ din tumaa doamaa nɛ ǹ nə n kuru. 11Ma lɛ kɔ kɔn la mɛn wɔ ka ka nɛ, kaa kurii lɛ n die goɛ̃ bɛa sii nyaa ǹ sii lɛa. 12A saa kanna ganaa a wo miɛ̃, kaa giĩn tumaa, bɛ̀ ǹ mɛn a yɛ dɔ lɛawaa kiwisi, bɛ doamaa nɛ a n kuru. Bɛ̀rɛ mɛn tumaa bɛ́ re yii n kion, n bɛ́ re ǹ mɛnɛn pii ka wɔrɔ nɛ, ǹ nə́ tɔrɔ kɔsɔn lɛa, n din tɔrɔ ná a bie wa, ta tɔrɔ mɛn nɛ, ǹ dɔn doamaa nɛ ǹ nə n kuru. 13Bɛ̀rɛ mɛn bɛ́ re yii n kion, hinlaa n bɛ́ re ǹ mɛn pii ka wɔrɔ nɛ, ǹ tumaa doamaa nɛ ǹ nə n kuru. Lɛ kɔ kɔn la mɛn bɛ́ lɛ bɔ ná a ba a-n wa, bɛ lɛ a sii nyaa ǹ sii n ka bɛ nɛ ka gɔ̀nɔn ganaa. 14Sɛnɛ, giĩ *soroma, mɛn bɛ́ a soromabaa nə n bɔ á n bɔ a ganaa wa, ka doamaa nɛ, ka bɛ loo ka bɔ masɛ a minin bii. A giala, bɛa dɛnaa na á masɛ a lɛ kɔ kɔn la lɛ ziziɛ̃.»

15Lawa tɔ́n pɛ Abrahamu ni: «N baran n lɔ lɛ bíi Sarayii doo wa, a giala, a tɔ n die goɛ̃ Saaraa sisia. 16Ma á re barka we a nɛ, ma á re toɛ n nɛgiĩ yɛ la dinin. Ma á re barka we a nɛ, a tɔrɔn tá re gána tumun biɛ. Tɔrɔ gigiã a kiin tá re boe a tɔrɔn bii.»

17Abrahamu na á kaa tán, á n mìi kuməə tán. Á yaa wɔ a din gɔ́ɔ̃ nɛ bɛ̀ á n pii: «Giĩ lɛ̀ paabiɛ, bɛ á tɔn nɛ yii sonbore? Saaraa dɔ lɛ̀ pɔmanangɔrɔ n ke, bɛ á boe la a nɛ yɛ doo?» 18Abrahamu mà Lawa ganaa: «Yǎa n Isimayeli lɛ toɛ ma kio.»

19Lawa tɔ́n pɛ kɛnɛn: «Haayii dɛ! N lɔ Saaraa kɛ lɛ á re nɛgiĩ yii n wɔ lɛa, n tá re a tɔ koe Izaaki. Ma lɛ kɔ kɔn la mɛn wɔ, man die bɛ lɛ doɛ kɔn nɛ, a laanka a tɔrɔn mɛnɛn bɛ́ re yii a kio. Ma ba n lɛ boe wa. A n lɛ kɔ kɔn la lɛa yǎa duduu. 20N ma nyankɔ ka sii mɛn nɛ Isimayeli dɔ wɔ paǹ li, má ma. Á ke, man die barka we a nɛ, ma á re toɛ a nɛnyaanan yɛ, ma á re a tɔrɔn mɔnɛɛ parsiini. Á re nɛ fulupaa yii. Bɛn tá re goledɛnan biɛ, a tɔrɔn tá re gána gole biɛ. 21Sɛnɛ, masɛ n die lɛ kɔ kɔn la we ka Izaaki ni, Saaraa bɛ́ re nɛ mɛn yii n ni lɛ̀-boe kɛnɛn yoroo.»

22Lawa bɛ́ á boo da Abrahamu ni á nya, á yoo á woo á n bɔ a li. 23Lawa boo lɛ pɛ nɛ ǹ mɛn pinaa, Abrahamu yoo a din pinaa, á ná a nɛgiĩ Isimayeli kũ á kuru. Bɛ̀rɛn mɛnɛn tumaa yɛ a kion, a ǹ mɛnɛn pii ka wɔrɔ nɛ, giĩ mɛn tumaa bɛ́ a kion, á ǹ tumaa kũ, á ǹ kuru. 24Abrahamu bɛ́ n boe soromabaa nɛ ǹ mɛn waáraa, bɛ̀ a lɛ̀ pɔmanangɔrɔwenmanangɔrɔ nɛ. 25A nɛgiĩ Isimayeli lɛ̀ fulusɔɔ nɛ, ǹ nə́ tɔ́n kuru. 26Abrahamu laanka a nɛgiĩ Isimayeli na á n kuru pinin goon. 27A din a kion lɛ din tumaa, bɛ̀rɛ mɛn tumaa yɛ a kion, a ǹ mɛnɛn pii ka wɔrɔ nɛ, ǹ nə́ tɔrɔ kɔsɔn lɛa, á bɛn tumaa kuru kun a din ni.

Currently Selected:

Siin Giala 17: SCE2013

Highlight

Copy