Amɔɔsi 7
7
Amɔɔsi a sii-yɛ bibinaa: bisinin
1Dɛnaa, maa Lawa màn mɛn nyaa ma nɛ, bɛ á ke: Man má yɛ á bisinin paã. Bɛ á zɛnɛɛ, ǹ buu mɛn kuru kii wɔ lɛa, bɛ̀ bɛ́ á ke a ná a giala kɔ á n wusii piɛ̃. 2Bisinin lɛn bɛ́ ǹ nə́ gána lɛ a buu tumaa sɔ̃ ǹ nə́ nya, má tɔ́n pɛ kɛnɛn: «Dɛnaa, maa Lawa ma nə n nyankoe, Zakɔba tɔrɔn lɛn siɛ̃n toa ǹ nɛ, bɛ bie wa, maǹ die wàa biɛ? Ǹ nə́ ke ǹ nə́ ǹ ba tɛ dɔn dinin wa!» 3Dɛnaa Lawa tɔ́n sii lɛ a zɛnaa lɛ da, á pɛ mà bɛa re n zɛnɛɛ doo wa.
Sii-yɛ paabaa ǹ wɔ: tɛ
4Dɛnaa Lawa lɛ màn mɛn nyaa ma-n doo, bɛ á ke: Dɛnaa Lawa lɛ na á lɛ dia tɛ la, á n dɔlɔ boe ne. Tɛ lɛ a gusuũ tán mu gole kɛ piɛ̃, a n gána gialaa kuĩ. 5Má tɔ́n pɛ kɛnɛn: «Dɛnaa, maa Lawa, ma nə n nyankoe, a toa miɛ̃. Bɛ bie wa, Zakɔba tɔrɔn kɛn man die wàa biɛ? Ǹ nə́ ke ǹ nə́ ǹ ba tɛ dɔn dinin wa!» 6Dɛnaa Lawa tɔ́n sii lɛ a zɛnaa lɛ da. Á pɛ mà bɛa re n zɛnɛɛ doo wa.
Sii-yɛ sɔɔbaa ǹ wɔ: màn zɔɔ̃ ǹ biɛ
7A màn mɛn nyaa ma-n bɛ kio, bɛ á ke: Maa Dɛnaa Lawa na á goã golee-n lon kungɔn pepere goon lalan, ka màn zɔɔ̃ ǹ biɛ ná a gɔn. 8Dɛnaa Lawa tɔ́n nɔ̀n da ma la:
«Amɔɔsi, n yii n wàa mɛn ganaa?»
Má tɔ́n pɛ nɛ: «Màn zɔɔ̃ ǹ biɛ nɛ.»
Dɛnaa Lawa tɔ́n pɛ ma nɛ:
«Á ke, man die biɛ diɛ maa zaman
Izirayeli minin lɛn li ma ga
ǹ ganaa.
Ǹ kɔkɔrɔbaa lɛ taman yii,
ma a re ǹ toɛ walan doo wa.
9Ma á re Izaaki tɔrɔn kɛn laanka
Izirayeli tɔrɔn wúlu bɔ ǹ bǎãn ziziɛ̃,
ma á re zia biɛ
Zeroboamu tɔrɔn kɛn ganaa.»
Amɔɔsi a loo a bɔ Betɛli
10Bɛ lɛ kio ne, Betɛli kiwi a wúlu-bɔle Amasiya minin dia mà ǹ wo pɛ Izirayeli tɔrɔn kii Zeroboamu ni kɛnɛn: «Amɔɔsi n tán dù bose Izirayeli tɔrɔn lɛn bii. A bɛ́ boo mɛn tumaa diɛ, gána lɛ a minin ba boe la ǹ tá sii ǹ ganaa doo wa. 11A giala Amɔɔsi na á pɛ:
Zeroboamu á re giɛ̃ zia la,
Izirayeli minin kɛn tumaa á re woe
bɛ̀rɛbaa ǹ bǎã nɛ,
ǹ wɔlɔ á re lui ǹ gána ganaa.»
12Bɛ kio, Amasiya tɔ́n pɛ Amɔɔsi ni:
«Lawa a boo gii-dali,
woo n nə n bɔ kànaa.
Baa si n wo Zudaa gána nɛ.
N tá re n Lawa a boo gii-dali baa ǹ
dí nyɛɛ walan,
n nə n lɛ-a ǹ bii yɛ walan.
13Sɛnɛ, n nyan toa n pɛ
mà n nə n Lawa a boo gii diɛ
Betɛli doo wa.
A giala,
Betɛli kiwi lɛ n kii a giã ǹ bǎã lɛa,
gána lɛ a bǎã gole lɛa.»
14Amɔɔsi tɔ́n Amasiya lɛ si á pɛ nɛ: «Ma bie ma goã Lawa a boo gii-dali lɛa wa, ma bie Lawa a boo gii-dali tɔrɔ dɔ din lɛa wa. Man má goã tɔɔn-lɛduə̃li lɛa, da nɛ-kɔlen#7.14 Gɔ́rɔ da tɔrɔ kɔn nɛ. nə́ goã ma lon. 15Sɛnɛ, Dɛnaa Lawa masɛ kũ tɔɔn kio, á tɔ́n pɛ ma nɛ mà ma wo asɛ a boo gii da asɛ a zaman, Izirayeli tɔrɔn kɛn manɛ. 16Sisia kəni Amasiya, n too kɔ Dɛnaa Lawa a boo li:
Táa ń pɛ
mà ma baran Lawa a boo gii da
Izirayeli wɔ paǹ li wa,
mà ma baran sɛ̀ pɛ
Izaaki tɔrɔn kɛn ganaa wa!
17Bɛ lɛ na á toa Dɛnaa Lawa
á kɛ pii:
N lɔ á re kɔrɔbaa zɛnɛɛ
kiwi lɛ gɔ́ɔ̃ nɛ,
ǹ tá re n nɛgiĩn laanka n nɛlɔn dii
zia la,
ǹ tá re n tán zoɛ̃ ka biɛ nɛ,
ǹ gii min kɔsɔn bii.
N dinmaa kɛ á re giɛ̃
Lawa doɛ̃baã wolen gána nɛ.
Ǹ tá re Izirayeli minin kɛn goɛ
ǹ wo ǹ ne bɛ̀rɛbaa ǹ bǎã nɛ,
ǹ wɔlɔ á re lui ǹ gána kɛ ganaa.»
Currently Selected:
Amɔɔsi 7: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
