Génesis 30

1Raquelqa manan onqoq rikhuriyta atiranchu. Chaymi hermanan Leata envidiakuspa, qosan Jacobta khaynata niran:

—Noqaqa wawayoq kaytan munani. Wawata onqokunaypaqyá onqoqta rikhurichiway; mana chayqa aswanchá wañupullaymanña, nispa.

2Chaymi Jacobqa Raquelta phiñarikuspa niran:

—¿Noqari Dioschu kani? Paypa munayninmi mana wawayoq kasqaykiqa, nispa.

3Raqueltaqmi khaynata niran:

—Kaypin Bilha sutiyoq sirvientay warmi kashan. Paywanyá puñuy onqoq rikhurinanpaq. Hinaspan payqa moqoy patapi wawata onqokunqa. Saynapin chay wawaqa moqoy patapi nacesqanrayku, noqapa wawayña kanqa, nispa.

4Hinaqtinmi Raquelqa sirvientan Bilha sutiyoq warmita Jacobman qoran warmin kananpaq. Chaymi Jacobqa chay warmiwan puñuran. 5Hinaspan Bilhaqa onqoq rikhurispa huk qari wawanta onqokuran. 6Chaymi Raquelqa niran khaynata:

—Diosmi mañakusqayta uyariykuwan. Hinaspan justiciata ruwaykuwaspa, huk wawata qoykuwan, nispa.

Chaymi chay wawaman Dan sutiwan churaran. [Nota: Hebreo rimaypiqa “Dan” sutiqa “Justiciata ruwaykuwan” ninantan nin.]

7Chaymantan Raquelpa sirvientan Bilha warmiqa kaqmanta onqoq rikhuriran. Hinaspan ishkay kaq qari wawanta onqokuran. 8Chaymi Raquelqa khaynata niran:

—Ashka wawayoq kayta munaspaymi hermanaywan anchata qawanakuspa peleani. Ichaqa vencenipunin, nispa.

Chaymi chay wawaman Neftalí sutiwan churaran. [Nota: Hebreo rimaypiqa “Neftalí” sutiqa “peleay” ninantan nin.]

9Hinaqtinmi Leaqa manaña astawan onqoq rikhuriyta atispa, sirvientan Zilpa sutiyoq warmita Jacobman qoran, warmin kananpaq. 10Chaymi Leapa sirvientan Zilpa warmiqa huk qari wawata onqokuran. 11Hinaspan Leaqa khaynata niran:

—¡Allin suerteyoqmi karuni! nispa.

Chaymi chay wawaman Gad sutiwan churaran. [Nota: Hebreo rimaypiqa “Gad” sutiqa “suerte” ninantan nin.]

12Hinaspapas Leapa sirvientan Zilpa warmiqa kaqmantan onqoq rikhurillarantaq. Hinaspan huk qari wawatawan onqokuran. 13Chaymi Leaqa khaynata niran:

—¡Ancha kusisqan kani! Warmikunapas niwanqakun: “¡Qanqa ancha kusikuyniyoqmi kanki!” nispanku.

Chaymi chay wawamanqa Aser sutiwan churaran. [Nota: Hebreo rimaypiqa “Aser” sutiqa “kusikuy” ninantan nin.]

14Huk p'unchawmi Leapa wawan Rubenqa trigo rutuy tiempopi campota riran. Hinaspan mandrágoras sach'apa rurunta tarimuspa, mamitanman apamuran. Chayta rikuspan Raquelqa hermanan Leata niran:

—Ama hina kaychu, wawaykipa apamusqan mandragorasta wakinta qoykuway, nispa.

15Ichaqa Leañataqmi contestaspa khaynata niran:

—Qanqa qosayta qechuwashaspachu, ¿kunanqa wawaypa apamusqan mandragorastañataq qechuwayta munashankí? nispa.

Hinaqtinmi Raquelqa khaynata niran:

—Sichus wawaykipa apamusqan mandragorasta qowanki chayqa, kunan tutan Jacobwan puñukunki, nispa.

16Chaymi Jacob campomanta tardenta kutinpushaqtin, Leaqa paywan tupaq lloqsiran. Hinaspan khaynata niran:

—Kunan tutan noqawan puñunki. Wawaypa apamusqan mandragorastan Raquelman pagaruniña, noqawan puñunaykipaq, nispa.

Chaymi Jacobqa chay tuta Leawan puñuran. 17Diosmi Leapa mañakusqanta uyariran. Chaymi Leaqa pishqa kaq qari wawanta wiksayakuspa onqokuran. 18Hinaspan Leaqa khaynata niran:

—Diosmi kay wawataqa huk regalota hina qoykuwan, sirvientay warmita qosayman qosqayrayku, nispa.

Chaymi chay wawaman sutinta churaran Isacar sutiwan. [Nota: Hebreo rimaypiqa “Isacar” sutiqa “recompensa” ninantan nin.]

19Chaymantapas Leaqa kaqmantan Jacobpa wawanta onqoq rikhuriran. Hinaspan soqta kaq wawanta onqokuran. 20Hinaspan Leaqa khaynata niran:

—Diosmi allin regalota qoykuwan. Kunanqa qosay Jacobqa sumaqtachá tratawanqa. Hinaspan munakuwanqa, soqta wawataña paypata onqokusqayrayku, nispa.

Hinaspan chay wawaman sutinta churaran Zabulón sutiwan. [Nota: Hebreo rimaypiqa Zabulón sutiqa “sumaq sonqowan rikuy” ninantan nin.]

21Chaymantan Leaqa huk warmi wawatawan onqokuran. Hinaspan chay wawaman sutinta churaran Dina sutiwan. 22Ichaqa Diosmi Raquelmantapas yuyariran. Hinaspan Diosqa Raquelpa mañakusqanta uyarispa permitiran wawayoq kananpaq. 23Chaymi Raquelqa onqoq rikhurispa huk qari wawata onqokuran. Hinaspan khaynata niran:

—P'enqa-p'enqaypaq mana wawayoq qolluri warmi kashaqtiymi, Diosqa permitiykun wawayoq kanaypaq. 24Ojalachá kaqmanta huk wawatawan qoykuwanman, nispa.

Hinaspan chay wawaman sutinta churaran José sutiwan. [Nota: Hebreo rimaypiqa José sutiqa “huktawan qoykuwachun” ninantan nin.]

Jacob qapaqyasqanmanta

25Wawan Joseyta Raquel onqorukuqtin hinallan, Jacobqa suegron Labanta khaynata niran:

—Mandapuway hamusqay llaqtayman ripukunaypaq. 26Hinaspapas qopuway warmiykunata hinallataq wawaykunatawan ima. Noqaqa paykunaraykun qanta servirayki. Qanqa allintan yachanki imaynatachus servirayki chaytaqa. Chayraykuyá mandapuway, nispa.

27Ichaqa suegron Labanñataqmi khaynata contestaran:

—Ama hina kaychu, amaraq ripuychu. Noqaqa adivinaspan yachani, Dios qanrayku bendeciwasqanta. 28Saynaqa niwayyá, ¿hayk'atataq ganaytari munankí? Noqaqa hayk'atan ganayta munanki, chaytan pagapusqayki, nispa.

29Hinaqtinmi Jacobqa khaynata niran:

—Qanqa allintan yachanki imaynatachus servirayki chaytaqa. Hinallataq imaynatachus animalniykikunata cuidarani chaytapas. 30Noqa manaraq kayman hamushaqtiyqa chikallanmi animalniykikunaqa kasqa. Ichaqa kunanqa ancha ashkallañan kapushasunki. Diosmi qantaqa anchata bendecisuranki, kayman noqa chayamusqayrayku. Kunanqa familiaypaqñataqmi noqaqa llank'ayta munani, nispa.

31Hinaqtinmi suegron Labanqa khaynata niran:

—Kunanri, ¿hayk'a pagapunaytataq munankirí? nispa.

Jacobtaqmi contestaran:

—Ama imatapas pagawaychu. Noqaqa seguisaqmi ovejaykikunata michiytaqa, sichus noqapa nisqayta aceptanki chayqa. 32Noqan kunan ovejaykikunapa kasqanman rispay, t'aqamusaq kay color ovejakunata: ch'eqchita, alqata hinallataq yanatawan ima. Hinaspapas t'aqamullasaqtaqmi kay color cabrakunatapas: ch'eqchita hinallataq alqakunatawan ima. Chay t'aqasqay animalkunan noqapa pagoy kanqa. 33Qanqa paqarin otaq ima p'unchawkunatapas, animalkuna qawaq hamuspaykin, yachanki ima clase runa kasqaytapas. Sichus akllakusqay ovejaykunapa kasqanpi tarinki yuraq ovejakunata otaq huk colorllayoq cabrakunata chayqa, yachankin noqaqa honradochus icha suwa runachus kasqayta, nispa.

34Hinaqtinmi Labanqa qataynin Jacobta niran:

—Allinmi, noqaqa acuerdopin kashani chay niwasqaykiwanqa, nispa.

35Ichaqa Labanmi chay p'unchaw t'aqaran cabrakunata orqota-chinata. Chay llapallan t'aqasqan cabrakunaqa alqakuna hinallataq ch'eqchi colorniyoqkamallan karan. Saynallataqmi ovejakunatapas t'aqallarantaq orqota-chinata. Chay llapallan t'aqasqan ovejakunaqa yana colorniyoq hinallataq ch'eqchi colorniyoqkamallan karan. Hinaspan Labanqa chay t'aqasqan ovejakunata hinallataq cabrakunatawan ima, wawankunaman entregaran michinankupaq. 36Chaymantan Labanqa chay ovejakunata hinallataq cabrakunatapas kinsa p'unchaw purina hina karuman qatichiran, saynapi Jacobmanta karunchasqa kananpaq.

Ichaqa Jacobtaqmi Labanpa qepaq ovejankunata michiran. 37Chaymantan Jacobqa álamo sach'akunapa, almendra sach'akunapa hinallataq castaño sach'akunapa k'aspinkunata kuchuran. Hinaspan chay k'aspikunapa qaranta pelaran serpentina hina raya-rayata. Saynapin chay k'aspikunaqa yuraq raya-raya rikukuran. 38Chaymantan chay pelasqa yuraq raya-raya k'aspikunata animalkunapa ñawpaqninpi unu tomananku pozo ukhuman churaran. Hinaqtinmi chay ovejakunaqa orqonkunawan cruzakuranku. Saynallataqmi cabrakunapas orqonkunawan cruzakuranku. 39Hinaqtinmi ovejakunapas hinallataq cabrakunapas k'aspikunapa ñawpaqninpi chichukuranku. Hinaspan chay animalkunaqa alqakunata hinallataq tukuy clase ch'eqchi chitachakunata ima wacharanku. 40Hinaspan Jacobqa llapallan chay malta ovejachakunata alqata, ch'eqchita hinallataq malta cabrachakunatawan ima colormasin grupoman t'aqaran. Saynapin Jacobqa animalninkunata ashkayachiran. Ichaqa Labanpa yuraq ovejankunawanqa hinallataq yana cabrankunawanpas manan juntaranchu. 41Saynallataqmi wira kaq allin sano animalkuna sapa kutin cruzakuqtin, Jacobqa chay animalkunapa ñawpaqninpi unu pozoman chay pelasqa raya-raya k'aspikunata churaran, saynapi k'aspikunapa ñawpaqninpi chichukunankupaq. 42Ichaqa tullu kaq animalkuna hamuqtinqa, manan chay yuraq raya-raya k'aspikunataqa churaranchu. Saynapin chay tullu kaq animalkunapa wachasqan uñankunaqa Labanpaq karan. Ichaqa wira kaq sano ovejakunapa otaq cabrakunapa wachasqankunañataqmi Jacobpaq karan. 43Saynapin Jacobqa ancha qapaq runaman tukuran. Hinaspan payqa ashka ovejakunayoq, cabrakunayoq, camellokunayoq hinallataq asnokunayoq ima karan. Hinaspapas paypaqa kallarantaqmi ashka sirvienten qarikunapas hinallataq sirvientan warmikunapas.

Currently Selected:

Génesis 30: QEAÑT

Highlight

Copy