Proverb 6
6
Danze kan dibout garanti pou enn lot
1Mo zanfan, si to finn dibout garanti pou enn vwazin,
savedir ki to finn donn to parol.
2To prop labous finn piez twa;
to prop parol finn koulout twa.
3To finn vinn esklav enn kaser.
Alor, ala seki to bizin fer:
Pa tike, al get li ek sipliy li.
4Pa les somey trap twa;
Pa les to popier vinn lour.
5Galoupe kouma enn serf divan so predater;
Ras lavi#6:5 “Ras lavi”, li enn expresion kreol ki vedir: Galoup vit pou sov to lavi. kouma enn zwazo divan zarm saser.
Konsey pou bann pares
6Twa ki pares, obzerv enn fourmi;
fer kouma li, e to pou vinn saz.
7Enn fourmi pena sef;
li pena ni formenn ni patron.
8Pourtan, li ramas manze dan lete;
li ranpli so grenie dan bon sezon.
9Ala to pares la! Ziska kan to pou res lor to lili?
Kan to pou deside pou fer enn mouv?
10To kas enn ti somey, to fer enn ti lasies;
to kas enn poz, to krwaz to lebra.
11Letansa, lamizer pou tom lor twa kouma enn voler.
Lafin, laswaf pou atak twa kouma enn bandi.
Lansegnman pou bann triser
12Voryen ek malfeter,
pas zot letan fann mansonz.
13Zot pez lizie, zot pil lipie,
e zot klak ledwa pou anbet zot viktim.
14Zot tir plan modi ar lespri malsin;
kot zot pase zot fann dezord.
15Akoz sa, maler pou tom lor zot antret;
okenn remed pa pou sap zot lavi.
Seki LESEGNER deteste
16-19Ena sis kitsoz ki LESEGNER deteste:
Regar vantar,
lalang manter,
lame ki tir lavi inosan,
leker ki tir plan modi,
lipie ki galoupe pou al komet lemal,
labous enn fos temwin ki fann mansonz.
Ala enn setiem ki LESEGNER pa siporte:
Dimoun ki sem zizani e met dibri ant frer-ser.
Pa komet ladilter
20Mo zanfan, gard bann komannman to papa;
pa bliye bann bon konsey to mama.
21Grav zot touletan dan fon to leker;
atas zot otour to likou.
22Kan to marse, zot pou gid twa;
kan to dormi, zot pou vey lor twa;
e kan to leve, zot pou konsey twa.
23Bann komannman-la kouma enn lalanp dan marenwar;
bann lansegnman-la kouma enn lalimier dan lobskirite.
Bann repros ek disiplinn pou ouver sime lavi pou twa.
24Zot pou protez twa kont fam move lavi;
Zot pou prezerv twa kont bann parol dimiel fam adilter.
25Pa les to leker atire ar so bote;
Pa les twa gate ar so regar.
26Enn prostitie kapav donn twa so lekor pou enn bouse manze;
me avek fam enn lot zom, to kapav perdi to lavi.
27Si kikenn sarye labrez dan so pos,
eski so linz pa pou pran dife?
28Si kikenn mars lor dife,
eski so lipie pa pou brile?
29Li parey pou enn zom ki dormi ar fam so prosin;
si li fer sa, so konsekans pou bien ser.
30Kan kikenn kokin, zis pou kalme so lafin,
nou pa tro blam li;
31me si proprieter may li, so santans sever.
Li pou konfiske tou seki li posede.
32Me enn zom ki komet adilter, li finn perdi larezon;
kan li fer sa, li detrir so prop lavi.
33Sa zom-la pou gagn bate, e so repitasion pou gate;
touletan li pou viv dan laont ek dezoner.
34Enn zom, kan so fam tronp li, li zalou e li ankoler;
lerla, so vanzans pou terib.
35Li pa pou aksepte dedomazman;
okenn kado, ser kouma li ser, pa pou tengn so koler.
Currently Selected:
Proverb 6: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
