Proverb 21
21
1Lespri enn dirizan kouma enn larivier dan lame LESEGNER;
li diriz li kot li anvi.
2To kapav panse ki to ena rezon;
me LESEGNER konn bien to lintansion.
3LESEGNER prefer ladrwatir ek lazistis
ki enn lofrand.
4Move dimoun ena regar meprizan ek leker arogan;
samem ki met zot pese okler.
5Prepar to proze avek swin e to pou gagn sikse;
me si to rod al tro vit, to pou zwenn tase.
6Larises ki to gagne kan to koz manti,
li atir twa dan lamor e li disparet vit.
7Move dimoun kondane par zot prop violans.
Kifer zot refiz sanze?
8Bann malonet mars lor sime traver;
dimoun zis swazir sime bien drwat.
9Prefer dormi deor, dan kwin lakaz;
ki dan lakaz, ar enn dimoun gran labous.
10Move dimoun pans zis fer lemal;
zot pena pitie pou personn.
11Kan vantar gagn pinision, mem ignoran gagn enn leson;
me linstriksion grandi konesans enn saz.
12Bondie li zis! Li konn tou seki pase dan lakaz move dimoun;
li pou donn zot pinision ki zot merite.
13Si to refiz ekoute kan bann pov kriye,
tou zorey pou sourd, ler twa to rod sekour.
14Si to anvi kalme koler kikenn, donn li enn kado an-sekre;
si to anvi tengn so laraz, glis enn ti prezan dan so pos.
15Kan lazistis triyonfe, bon dimoun kontan;
me bann malfeter gagn per.
16Dimoun ki pa swiv bon sime konesans,
bien vit pou rant dan bis lamor.
17Dimoun ki kontan lamizman pou res pov;
dimoun ki kontan labwason zame pou vinn ris.
18Kan bann move dimoun rod piez bann bon dimoun,
zot invit katastrof lor zotmem.
19Preferab viv dan dezer,
ki viv ar enn partner move karakter.
20Dan lakaz enn saz ena bann gran rises;
bann dimoun bet gaspiy pou zot sanses.
21Rod touzour labonte ek lazistis e to pou viv lontan;
dimoun pou respekte twa e pou onor twa.
22Enn zeneral saz, pou reisi pran enn lavil bien proteze;
li pou arive kraz miray sitadel.
23Vey bien to langaz,
e problem pa pou vinn dan to lakaz.
24Dimoun ki fier ek vantar, zot insolan;
zot azir ek boukou larogans.
25Dimoun pares mor avan zot realiz so dezir;
an-efe, so lame lour pou travay later.
26Bann pares pas letan anvi kitsoz lezot;
me bon dimoun donn zot kitsoz ek leker kontan.
27Lofrand enn malfeter bien degoutan;
sirtou kan li ofer li avek enn move lintansion.
28Bann fos temwin pou disparet;
me dimoun ki konn ekoute, li pou kapav temwagne avek sikse.
29Move dimoun fer sanblan zot serye;
bon dimoun viv enn lavi exanpler.
30Mem si to ena bann verti kouma lasazes, bon rezonnman, ek disernman,
to pa pou kapav defie LESEGNER.
31Nou kapav prepar bann seval pou konba;
me zisLESEGNER ki donn laviktwar.
Currently Selected:
Proverb 21: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
