Zenez 26

Izaak ek Rebeka kot Abimelek

1Ena enn lafaminn dan pei. Li pa mem lafaminn ki ti ena dan lepok Abraam. Izaak al Gerar, kot Abimelek, lerwa bann Filistin. 2LESEGNER aparet avek Izaak e dir li: “Pa bizin al Lezip. Al res dan pei ki mo pou montre twa. 3Res laba kouma enn etranze. Mo pou avek twa, e mo pou beni twa. Mo pou donn twa ek to bann desandan tou sa later la. Samem mo ti promet to papa Abraam; mo pou respekte mo promes. 4To bann desandan pou vinn boukou, kouma bann zetwal dan lesiel. Tou sa later la pou vinn pou zot. Tou bann nasion lor later pou gagn benediksion atraver zot, 5parski Abraam ti ekout mo lavwa. Li ti gard mo bann komannman e li ti obeir mo lord, mo lalwa ek mo bann exizans.”

6Alor, Izaak res dan Gerar. 7Kan bann zom dan landrwa kestionn li lor Rebeka, li dir zot: “Mo ser sa.” Li pa oze dir ki Rebeka so fam. Izaak per tansion kikenn touy li akoz Rebeka, telman li enn zoli fam. 8Izaak res laba enn bon lepok. Enn zour, Abimelek, lerwa bann Filistin, get par lafnet. Li trouv Izaak ek so fam Rebeka pe exprim zot lamour. 9Deswit, Abimelek fer apel Izaak e dir li: “Rebeka to fam sa, pa vre? Kifer to finn dir nou li to ser?” Izaak reponn: “Mo ti gagn per tansion kikenn touy mwa akoz li.” 10Lerla Abimelek dir li: “Kifer to finn fer sa ar nou? Ankor inpe, enn zom ti kapav dormi avek to fam. Sa ti pou rann nou koupab.” 11Lerla, Abimelek warning lepep: “Si kikenn tous sa zom la, oubien so fam, li pou perdi so lavi.”

12Sa mem lane la, Izaak koumans plante dan sa pei la. LESEGNER beni li e li rekolte 100 fwa plis ki seki li seme. 13Izaak prospere deplizanpli e li vinn bien ris. 14Li ena boukou troupo zanimo, ek boukou serviter ek servant. Alor, bann Filistin zalou li. 15Zot bous tou bann pwi ki so papa Abraam ti fer fouye kan li ti ankor vivan. 16Ler Abimelek trouv tousala, li dir Izaak: “Kit nou landrwa ale. To finn vinn tro for pou nou.”

17Alor, Izaak kit sa landrwa la, e li al res dan vale Gerar. 18Li fer debous bann pwi ki ti fouye dan lepok so papa Abraam. Bann Filistin ti finn bous zot apre lamor Abraam. Izaak donn bann pwi la mem nom ki so papa ti donn zot avan.

19Enn zour, bann serviter Izaak fouy enn pwi dan vale, e zot trouv enn lasours dilo. 20Ler bann berze Gerar trouv sa, zot vinn lev diskision ar bann berze Izaak. Zot dir: “Nou dilo sa.” Akoz sa bann diskision la, Izaak apel sa pwi la Esek, ki vedir dispit. 21Lerla bann serviter Izaak fouy enn lot pwi. Bann berze Gerar vinn lev lager ankor enn fwa. Izaak apel sa pwi la Sitna, ki vedir opozision. 22Izaak al inpe pli lwin pou fouy enn trwaziem pwi. Sann fwa la, personn pa vinn lev lager. Alor Izaak apel sa pwi la Reobot, ki vedir plas lib. Izaak dir: “Asterla, LESEGNER finn fer plas pou nou. Nou pou prospere dan sa pei la.”

23Izaak kit sa landrwa la, e li al Berseba. 24Sa swar la, LESEGNER aparet avek li e dir li: “Momem Bondie to papa Abraam. Pa bizin to per. Mo pou avek twa e mo pou beni twa. Mo pou donn twa boukou desandan akoz mo serviter Abraam.” 25Alor, Izaak aranz enn lotel laba e li invok nom LESEGNER. Li dres so latant laba e so bann serviter fouy enn pwi.

Izaak ek Abimelek fer enn lalians.

26Letan Izaak pe res Berseba, Abimelek sorti Gerar e vinn kot li. Li amenn avek li so konseye Ahouzat, ek Pikol, sef so larme. 27Izaak dir zot: “Kifer zot vinn kot mwa kan zot pa kontan mwa? Pa zotmem ti pous mwa kot zot?” 28Lerla zot dir li: “Nou oblize rekonet ki LESEGNER avek twa. Nou panse li ti pou bon si ti ena enn lakor ant twa ek nou. Anou fer enn lalians! 29Promet ki to pa pou fer nou ditor. Nou osi nou pa finn fer twa ditor. Okontrer, nou finn tret twa bien, e nou finn les twa al anpe. Asterla, LESEGNER pe beni twa boukou.” 30Sa zour la, Izaak prepar enn gran repa pou zot, e zot manze-bwar. 31Landime gramatin, zot lev boner. Sakenn pret serman, e zot fer enn lalians. Lerla Izaak dir zot orevwar, e zot al anpe. 32Sa mem zour la, bann serviter Izaak vinn donn li enn bon nouvel: “Nou finn trouv dilo dan pwi ki nou ti pe fouye!” 33Izaak apel sa pwi la Siba, ki vedir serman. Ala kifer ziska zordi ankor apel sa lavil la Berseba#26:33 Berseba: Pwi serman..

Maryaz Ezai

34Kan Ezai gagn 40 an, li marye avek Zidit, tifi Beri, enn Itit. Ezai marye osi avek Basmat, tifi Elon. Li osi enn Itit. 35Sa de la rann lavi Izaak ek Rebeka amer.

Currently Selected:

Zenez 26: KMOTPOR

Highlight

Copy