Proverb 31
31
Bann konsey pou enn lerwa
1Ala bann parol solanel ki mama Lerwa Lemouel ti ansegn li:
2Ki mo pou dir twa mo garson?
Mo finn met twa lor later;
mo ti priye pou gagn twa e mo lapriyer finn exose. Aster-la, ekout mwa!
3Pa fini to kouraz ar bann fam;
pa depans to kas ar zot;
sa manier lamem ki boukou lerwa finn rwine.
4Lemouel, fodepa ki lerwa tom dan lalkol;
fodepa dirizan kontan labwason for;
5sinon, dan soulezon, zot pou bliye ki lalwa dir;
e zot pou maltret bann pov.
6Donn lalkol dimounn ki pe mor,
donn divin dimounn ki dan tristes;
7les zot bwar pou ki zot bliye zot mizer,
pou ki zot bliye zot lapenn.
8Vinn portparol bann dimounn san parol;
defann bann dimounn ki finn abandone.
9Koz pou zot! Ziz ar lazistis!
Pa ezite pou defann drwa bann dimounn mizer.
Konsernan enn bon fam
10Li bien difisil trouv enn fam parfe!
Li pli presie ki bann bizou gran valer.
11So mari fer li foul konfians,
e zame li pa pou mank nanye.
12Fam-la pou bon avek so mari ziska so dernie souf;
zame li pou fer li dimal.
13Li rod bon lalenn ek bon latwal an-lin;
li gagn lazwa pou travay ek so lame.
14Li kouma bato marsandiz;
li amenn so manze depi lwin.
15Li lev boner gramatin, pou prepar manze so fami;
e li organiz travay bann servant.
16Li kone kan kapav aste enn later;
ar so prop lamone, li fer plant enn karo rezin.
17Li travay ar kouraz;
e zame li pa res nanye fer.
18Li veye ki so travay fer profi;
so lalanp res alime ziska tar dan aswar.
19Li fabrik so prop difil;
li tis so prop latwal.
20Li zenere ar dimounn pov;
li pa ezite pou ed bann malere.
21Li pa per kan lanez tonbe dan liver;
parski, dan so lakaz, tou dimounn ena bon linz.
22Li fabrik dra lili ek molton;
bann linz an-lin ki li mete, enn veritab bote.
23So mari ena bon repitasion
e li sieze parmi bann lider dan pei.
24Fam-la koud linz e li fabrik sintir;
li vann zot ar bann marsan.
25Li enn fam for ki tou dimounn respekte;
so lavenir asire.
26Li koz avek lasazes;
li donn lansegnman avek bonte.
27Li pran bien swin so fami;
lapares pa koste ar li.
28So bann zanfan ador li;
so mari admir li e felisit li.
29Mari-la dir li: “Ena boukou fam ki fer bon travay,
me twa, to depas zot enn may.”
30Laparans tronper; labote efemer;
me enn fam ki respekte LESEGNER, merit nou loner.
31Rekonpans li pou so louvraz;
e felisit li anpiblik pou so travay.
Currently Selected:
Proverb 31: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
