Proverb 19
19
1Preferab pov, me onet;
ki manter e bet.
2Kan pa pran letan reflesi avan azir, li danzere;
kan tro prese, kapav zwenn kogne.
3Ena ki detrir zot lavi ar zot prop erer;
apre sa, zot ankoler kont LESEGNER.
4Dimounn ris, touletan gagn boukou nouvo kamarad;
me dimounn pov perdi so sel kamarad.
5Enn zour, fos temwin pou konn kondanasion;
manter pou gagn so pinision.
6Setaki oule gagn faver enn dimounn bon leker;
tou dimounn kamarad ar kikenn ki zenere.
7Si dimounn mizer gagn rezete par so prop frer,
zize aster kouma so bann kamarad pou fer ar li!
Li fer tou pou koz ar zot, me so parol tom dan dilo.
8Aprann gagn lasazes e to pou viv ere;
viv ek disernman e to pou prospere.
9Enn zour, fos temwin pou gagn seki li merite;
bann manter napa pou sape.
10Li drol kan enn dimounn bet viv dan lix;
me li pli drol kan enn serviter diriz so sef.
11Dimounn rezonab kontrol so koler;
kan li pardonn lezot, li gagn plis loner.
12Kan lerwa ankoler li kouma enn lion ki fer per;
me so bonte kouma laroze ki rafresi lerb ver.
13Zanfan malelve met papa dan traka;
enn fam ki pa aret dispite, li kouma enn tiyo ki perse.
14Enn dimounn kapav erit lakaz ek larzan ar so paran;
me enn fam intelizan, li enn benediksion LESEGNER.
15Si to pares e si to kontan dormi,
pa rod manze kan vant grogne.
16Obzerv komannman Bondie e to pou viv bien;
me si to swiv move sime to pou trouv lamor.
17Kan to ed bann pov, to pe pret LESEGNER,
limem ki pou rekonpans twa.
18Koriz to zanfan kan ankor ena letan;
me dan to koler, zame pa swet so maler.
19Enn dimounn violan bizin pey konsekans;
sinon, sak fwa li pou refer so violans.
20Si to ekout bann konsey, si to dispoze pou aprann to leson,
dousma-dousma to pou vinn saz.
21Dimounn kapav fer boukou proze;
me volonte LESEGNER ki pou realize.
22Nou apresie dimounn bon ek sinser;
mil fwa to pov ki to manter.
23Respekte LESEGNER e to pou viv bien;
to pou viv an-sekirite e maler pa pou koste ar twa.
24Dimounn pares met lame dan lasiet manze,
me li tro feb pou met manze-la dan so labous.
25Koriz enn insolan, bann bet pou aprann vinn pridan;
montre enn dimounn intelizan so erer, li pou gagn plis konesans.
26Zanfan ki bat so papa e rezet so mama,
li atir laont ek dezoner.
27Mo zanfan, pa aret aprann;
sinon, to pou bliye seki to deza kone.
28Pena lazistis kan fos temwin koz manti.
Move dimounn nek medit lemal.
29Bann insolan pou gagn kondanasion;
bann bet pou gagn pinision.
Currently Selected:
Proverb 19: KMNT
Highlight
Share
Copy
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
