Lk 9

Eirriwayie Yesu ilooiteng'eni tomon aare

(Mat 10.5-15; Mk 6.7-13)

1Neipot lekua ooiteng'eni tomon o aare, neisho engolon, o enkidimata naitoreyie loiriruani pooki, neishiunye mueyiaritin. 2Neirriwaa metolikioi enkitoria e Nkai, neishiunye iloomueyiaa. 3#Lk 10.4-11; Iat 13.51 Nejoki ninche, “Emiya hoo toki te lototo inyi, aa eng'udi, aashu embene, aashu endaa, aashu mpesai, nimiyaya nkilani maa are. 4Ore enkaji pooki nijing'ijing'i, entotoni te ine o entupuku te ina ang. 5Ore ilemeitoomon intae, entung'uai ina ang nimpiripiroo enterit natii nkejek inyi metaa shakeni te ninche.” 6Nepuo aamanaa te nena ang'itie, pooki elikioo lomon supati, neishiunye ltamueyia too wuejitin pooki.

Etomile Herode

(Mat 14.1-12; Mk 6.14-29)

7 # Mat 16.14; Mk 8.28; Lk 9.19 Ore Herode laa ninye oitore Galilaya, nening nena pooki naasitae; neiputukuny amu ejo kulikae tung'ana, “Yohana otopiwuo too lootuata.” 8Nejo kulikae, “Eliya oipang'aka.” Nejo kulikae, “Obo loo loibonok li apa otopiwuo.” 9Nejo Herode, “Atudung'oyie taa ninye Yohana elukunya, ae ng'ae naa ele laning mbaa enyena?” Neing'oru eyieu nedol ninye.

Eitotio Yesu ltung'ana nkalifuni miet

(Mat 14.13-21; Mk 6.30-44; Yhn 6.1-14)

10Ore pee eshukunye ilkipaareta, neinosaki Yesu mbaa pooki naataasa. Nerik nepuo enkilepata, o metoriko enkanasa naji Betsaida. 11Ore pee eyiolou olorora, nesujaa; neitoomon neirorie aliki ninche mbaa e nkitoria e Nkai, neishiunye ilooyieu neishiunyeki. 12Ore pee eaku kedoiyo enkolong, nepuonu ilooiteng'eni lenyena enetii nejoki, “Intanapa olorere meshomo kuna kurman o nkang'itie naataana aairrag neing'oru endaa amu ong'ata ene nikitii.” 13Nejoki, “Enchoo doi intae endaa.” Nejoki ninche, “Mikiaata ae toki neme mukateni miet o sinkir aare, aashu te naa aikipuo aainyang'aki ele orere pooki endaa.” 14Amu ebaya lewa ootii, nkalifuni miet. Nejoki Yesu ilooiteng'eni lenyena, “Entotona olorere too intukusi maa onom.” 15Neas ina, neitoton iltung'ana pooki. 16Nedumu mukateni pokira miet, o sinkir are, neing'or shumata nemayian nebel, neisho ilooiteng'eni lenyena meitoomonie olorere. 17Nenya, neraposho pooki. Nesotuni lmong'oitie loo lekunot, neiput inkikapuni tomon o aare.

Eibalunye Petero Yesu

(Mat 16.13-19; Mk 8.27-29)

18Ore eomonito Yesu openy, netii ilooiteng'eni lenyena, neikilikuan ajoki, “Kejo olorere kara ng'ae?” 19#Mat 14.1-2; Mk 6.14-15; Lk 9.7-8 Newaliki aajoki, “Ejo Yohana Olaibatisani, nejo kulikae, Eliya; nejo kulikae ira obo loo loibonok li apa otopiwuo.” 20#Yhn 6.68-69 Nejoki, “Nijojo intae kara ng'ae?” Nejoki Petero, “Iyie Kristo le Nkai.”

Etolimuo Yesu enkeeya o empiunoto enye

(Mat 16.20-28; Mk 8.30; 9.1)

21Neitanap ninye ninche neitore pee meliki hoo oltung'ani ilo rorei. 22Nejoki, “Meeta nchere pee meinyali Enkerai e Tung'ani too mbaa kumok, neany ilpayiani o lapolosak kituaak o lasirak neari metua, neitopiuni te nkolong e uni.”

23 # Mat 10.38; Lk 14.27 Nejoki ninche pooki, “Te neyieu oltung'ani naasuj, nanu, inchoo emenaa kewan, nenap osalaba lenye inkolong'i pooki, naasuj. 24#Mat 10.39; Lk 17.33; Yhn 12.25 Amu ore oloyieu neitajeu enkishui enye, neiminie; kake ore pooki oiturraa enkishui enye enkaraki nanu neitajeu. 25Amu ainyoo dupoto o ltung'ani tenetum enkop pooki neiturra enkishui enye. 26Amu ore olodol anyit te nanu o too rorei laainei, neduaaki sii ninye Enkerai e Tung'ani ninye anyit te nelotu te nkitoo enye o ene menye o enoo lmalaika sinyat. 27Kake ajoki intae too sipat nchere etii kulo ooitashe te ne ilemeishamisham enkeeya katukul, eitu eng'as aadol enkitoria e Nkai.”

Etawale Yesu

(Mat 17.1-8; Mk 9.2-8)

28 # 2 Pet 1.17-18 Ore too nkolong'i naabaya isiet eidipate nena baa nerik Petero o Yohana o Yakobo neked oldoinyo aaomon. 29Neaku ore eomonito, neibelekenya emua e nkomom enye, o nkilani enyena, neiborru neimerlelu. 30Naa ng'ura, neirorie ninye Musa o Eliya 31etalioote te nkitoo e keper neirorie Yesu eimaki eneyooki aiko eitabaya eyieunoto e Nkai aye te Yerusalem. 32Ore Petero o looboitare neiliara#9.32 Neiliara nelepori too njo njo, kake edolisho ake nedol enkitoo e Yesu, o lelo tung'ana pokira aare ooitashe te nebo ninye. 33Ore epuo lelo tung'ana aaing'uaa Yesu, nejoki Petero Yesu, “Lo Kitok, sidai kitii ene, maitobira lng'oborri okuni, obo lino, o obo le Musa o le Eliya.” Nemeyiolo enajoito.

34Ore ejo neijia nedou enkatampoi neitoip apik oloip; neureishoyu pee ejing atua ina atampoi. 35#Isa 42.1; Mat 3.17; 12.18; Mk 1.11; Lk 3.22 Nepuku oltoilo te nkatampoi nejo, “Ena Enkerai ai Gelunoti, entoning ninye.” 36Ore pee egira ilo toilo, nedoli Yesu aa ninye ake. Negira ninche, eitu eliki ltung'ana te nena olong'i inaatoduaa.

Eishiunye Yesu enkayioni naata oloirirua oiduruk

(Mat 17.14-18; Mk 9.14-27)

37Ore taaisere pee edou to ldoinyo, netumore olorora kitok Yesu. 38Naa ng'ura, nebuaku oltung'ani obo tiatua ina siamo ejo, “Olaiteng'enani, aatasayia ng'urai enkerai ai amu ninye ake aata; 39naa kenang'aa oloirirua, nebuak, neiterreyie o meitayu labur nemeing'uaa asioki, near oleng. 40Natasayia ilooiteng'eni linono meitayu netalaikinote.” 41Newaliki Yesu ajoki, “Oi ena ishoi nemeeta enkirukoto, kaboitare intae naitaas intae o anu? Iyau enkerai ino ene.” 42Ore eyau, nenang'aa oloirirua neiterreyie, nebuaaki Yesu ilo oirirua torrono, neishiunye ina kerai, neshukoki menye. 43Neing'asia lelo pooki ootoduaa engolon magilani e Nkai.

Eigila ake Yesu alimu enkeeya enye

(Mat 17.22-23; Mk 9.30-32)

Ore eton eing'asia pooki too mbaa naataasa, nejoki ninye ilooiteng'eni lenyena, 44“Emincho ake erikino intae kuna taata naliki intae! Keishoori Enkerai e Tung'ani aaitarasaki inkaik oo ltung'ana.” 45Kake eitu ejing'aa ina natiaaka; eton eisudoro te ninche, metaa mening'u tipat enye, nemeitieu sii aaikilikuana.

46 # Lk 22.24 Neiteru enchankar tiatua ninche maate ejo kalo lenye olkitok te pooki. 47Neyiolou Yesu ina nadamu ninche, nedumu enkerai neitataaniki kewan aitasheyie; 48#Mat 10.40; Lk 10.16; Yhn 13.20 nejoki ninche, “Ore pooki ng'ae ong'amu ena kerai te nkarna ai, nanu etang'amua, ore oloisul te nkitisho ti atua intae, naa ninye oisul te nkitoo.”

Ore olemekesh intae naa ole nkalo inyi

(Mk 9.38-40)

49Neng'amaa Yohana ajoki, “Lo Kitok, kitoduaa oltung'ani earaa loiriruani te nkarna ino nikimitiki, amu mme ole ncholiek ang.” 50Nejoki Yesu ninye, “Emimitiki, amu ore olemekes intae, naa ole nkalo inyi.”

Etanya enkang oo Samaria eng'amu

51Netaanu nkolong'i pee eilep alo shumata, nemut nabo ajo kelo Yerusalem. 52Neirriwaa ilooiteng'eni meituruko dukuya ninye aajing ang oo Samaria, pee eitobiraki enejing. 53Kake eitu eitoomon ilopeny enkaraki naipirta Yerusalem. 54#2 Ilai 1.9-16 Ore pee edol ilooiteng'eni lenyena, Yakobo o Yohana, nejo, “Olaitoriani, iyieu nikimpotu enkima te keper metapejoi?” 55Neibelekenyakino aing'ode [nejoki, “Miyiololo aajo kaa pukunoto oo ltauja iatata, 56amu eitu doi elotu Enkerai e Tung'ani amut iltauja loo ltung'ana, kake pee eitajeu.”] Nepuo ae ang.

Ilooyieu nesuj Yesu

(Mat 8.19-22)

57Ore epuo te nkoitoi, nejoki oltung'ani obo Yesu, “Ekaasuj nanu iyie pooki wueji nilo.” 58Nejoki Yesu, “Eeta mbariak ngumot enye, neeta motonyi sinkin#9.58 sinkin inkajijik oo motonyi. Kake meeta Enkerai e Tung'ani eneirishaki elukunya enye.” 59Nejoki likae, “Tusujuaki nanu.” Kake etiaka, “Lo Kitok, nchooki ang'as alo anukaa papa.” 60Nejoki, “Inchoo lmeneng'a, metunukai, ilmeneng'a kake shomo iyie tolikioi ilomon le nkitoria e Nkai.” 61#1 Ilai 19.20 Nejoki sii likae, “Olaitoriani, aasuj kake, nchooki ang'as alo aitanapare iltung'ana to lmarei lang.” 62Nejoki Yesu, “Ore oltung'ani otonyorra enturore neitoki anang silig, nemeishiaakino enkitoria e Nkai.”

Currently Selected:

Lk 9: SINYATI

Highlight

Copy