Lk 13
13
Embelekenyunye entung'uai ingok inyi aashu iyeye
1Netii apa kulikae ootii ine ina kata ootolikitio Yesu eneikuna Pilato Ilgalilaya ootara metuata neitushulaki osarge oloo lasarri lenye. 2Newaliki ninche ajoki, “Ijojo pasa ai lelo Galilaya oota ng'ok aalang ilkulikae Galilaya pooki, eji amu neijia eikunaki enkitamioto? 3Ajoki ntae, mme neijia; kake te neitu iridudu sii ntae nindaayaya aaiko neijia.” 4Aashu doi lapa oora tomon o isiet ootuurokine enkaji naado te Siloam near metuata, ijojo pasa ninche larruok aalang ilkulikae pooki oomanya apa Yerusalem? 5Ajoki ntae mme neijia; kake te neitu irridudu sii ntae nindaayaya aaiko neijia.
Enkintanyaanyukoto o lng'aboli lemeiu lng'anayio
6Neinosaki ena kitanyaanyukoto: “Eeta apa oltung'ani olng'aboli ouno te nkurma enye oo lng'anayio nelotu aing'orunye lng'anayio neitu etumie. 7Nejoki oloramat ilng'anayio, ‘Eji larin okuni taata alotu ake aing'orunye ele ng'aboli lng'anayio, nematumie, tudung'o tuuroi; oo pee etumuta enkop?’ 8Newaliki ajoki, ‘Tapala, lo kitok, te le ari sii taata, matuturoki napik entulugumi. 9Ore pee etoiwuo lng'anayio te le ari olotu naa sidai; kake te neitu, nidung auroo.’ ”
Eishiunye Yesu enkitok tarrush te nkolong e sabato
10Neaku eiteng'enisho apa ninye te nkaji nabo te nkolong e sabato. 11Netii enkitok naata oloirirua le lepori too larin tomon o isiet; neaku keirrugori meidim ataraposhunye. 12Ore pee edol Yesu ninye, neipot, nejoki, “Na kitok, kitooruoki entasato ino.” 13Neiteleiki nkaik enyena, neraposhunye te ina kata. Neisis Enkai. 14#Ena 20.9-10; Enkig 5.13-14 Kake etagore olkitok le nkaji e ntumo enkaraki naishiunye Yesu olorere te nkolong e sabato nejoki olorere, “Eetai nkolong'i ile naaishiaakino neasieki esiaai; wootu te nena olong'i meishiunyeki ntae, neme te nkolong e sabato.” 15Newaliki taa Olaitoriani nejoki, “Lo sunkuro! Keetae obo linyi lemelaku olkiteng anaa osikiria lenye to lale te nkolong e sabato, nerik aitook enkare? 16Paa ai meishiaakino ninye ena kitok, entito e Abraham nateena shetani larin tomon o isiet ai meishiaakino netalakuaki te nkolong e sabato.” 17Ore pee ejo neijia, nekurru lelo pooki ooing'orunore; neshipa olorere pooki too mbaa pooki e nkisisa naataasa ninye.
Enkitanyaanyukoto e nkantererai e karadali
18Neitoki taa ajoki, “Kaji eikununo enkitoria e Nkai? Naa ainyoo pasa eitanyaanyukieki? 19Etiu anaa enkantererai e karadali natuuno oltung'ani te nkurma enye; nebulu aaku olchani, nemany intaritik ilng'osil lenyena aapik isinkin.”
Enkitanyaanyukoto e nkaisiijoi
(Mat 13.33)
20Neitoki ake Yesu ajoki, “Ainyoo pasa aitanyaanyukie enkitoria e Nkai? 21Etiu anaa enkisuijoi natudumua enkitok neitushulaki mboreitin uni e nkano, o metaba anaa neisuijoyu pooki.”
Kutuk aji napirik
(Mat 7.13-14,21-23)
22Neimaa nkang'itie sapuki oo nkutiti neiteng'enisho eloito enkalo e Yerusalem. 23Nejoki oltung'ani obo, “Olaitoriani, ai kuti pasa lelo oojeu?” Nejoki ninche, 24“Entonyok eimu kutuk aji napirik; amu ajoki ntae, eyooki lkumok aaing'oru pee eimu nelaikino. 25Ore ake pee eaku einyo olopeny enkaji aiken kutuk aji, ninteruru aaitashoo te boo ioshiosho kutuk aji ijojo, ‘Olaitoriani, tabolu iyiook.’ Newaliki ninye ntae ajoki, ‘Mayiolo nanu ajo kaji ng'uaa.’ 26Nintokiki taa aajo, ‘Kitadaate nikitookishote o iyie, ninteng'enishe too nkoitoi ang naalala enkanas.’ 27#Olke 6.8 Kake kejoki ninye ntae, ‘Ajoki ntae, mayiolo nanu kaji ng'uaa; entalamaki nanu, intae pooki oora laasak loo ntorrok?’ 28#Mat 22.13; 25.30 #Mat 8.11-12Ore te ine ninchirishiri nionyionyo lala, idolidolo Abraham o Isaak o Yakobo o loibonok le Nkai pooki etii enkitoria e Nkai nimanikiki ate etanang'ayioki ntae auluo. 29Naa kepuonu ltung'ana ooing'uaa enkilepunoto o endoyioroto, o looing'uaa kopikop o moikuape aatoni te mesa ti atua enkitoria e Nkai. 30#Mat 19.30; 20.16; Mk 10.31 Naa ng'ura, ketii ile siadi ooaku le dukuya, netii ile dukuya ooaku le siadi.”
Enyorrata nanyor Yesu Yerusalem
(Mat 13.37-39)
31Ore te ina saa ake nepuonu embata oo Ilfarisayo, nejoki, “Inyo shomo te ne amu keyieu Herode nikiaar tua.” 32Nejoki ninye ninche, “Enchom entiaaki ilo barie, ‘Ng'ura, aaraa nanu loiriruani naishiunye iltamuoyia taata o taaisere o te nkolong e uni; naidip inkolati aainei. 33Kake ore etiu neijia enkoitoi ai ake asuj taata o taaisere o idia olong; amu meidimayu metaa kenang oloiboni le Nkai dikae neme Yerusalem.’ 34Ooi Yerusalem, Yerusalem naar iloibonok le Nkai ninang too soito lelo likirriwakini. Aikat aja pasa ejo aiturrur inkera inono te nebo anaa enkuku naiturrur inkuoo enyena ti abori inaipuko enyena nimiyieu. 35#Olke 118.26 Ng'ura eitaa Enkai enkaji ino mijooni. Naajoki meekure kintoki ae kata adol o tejo, ‘Emayiana ilo olotu te nkarna o Laitoriani!’ ”
Currently Selected:
Lk 13: SINYATI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2020
©Bible Society of Tanzania, 2020
