Iat 7
7
Enkiroroto e Stefano
1Nejoki Olapolosani Kitok, “Ei neijia etiu nena baa?” 2#Enk 12.1 Nejo Stefano, “Ilalashera laainei, o loo papa! Entoning'oki! Enkai e nkitoo naipang'aka papa lang Abraham eton emanya Mesopotamia, eitu eidur alo Haran, 3nejoki, ‘Tung'uai olmarei linyi o enkop inyi, shomo enkop naautaki.’ 4#Enk 11.31; 12.4 Neaku etung'uayie enkop e Kaldea nelo amany Haran. Ore pee eitianya menye Abraham, nejoki Enkai meidurraki ena kop taata namanya intae. 5#Enk 12.7; 13.15; 15.18; 17.8 Eitu taa eisho Enkai ninye hoo enkiti wueji metujung'o aitaa enenye, eitu hoo eisho enkiti rashe e nkop, kake eishoo Enkai ninye o siligi ajoki keaku ene ishoi enye eshomo ninye. Naa ore taa ejoki Enkai ninye neijia, meeta Abraham enkerai. 6#Enk 15.13-14 Inji etiaaka Enkai ninye, ‘Kepuo kenya ilng'anayio linono aamany ai kop eeiking'a, nepuoi aaisinkanishore te ine neinyali too larin iip ong'uan. 7#Ena 3.12 Kake kadung'oki enkiguana ilo orere oisinkanishore ejo Enkai. Naa ore te siadi neidurru te ina kop naapuonu aaserem nanu tene wueji.’ 8#Enk 17.10-14; 21.2-4; 25.26; 29.31–35.18 Neisho Enkai ina kata Abraham olkerreti le muratare. Abraham Isaak, nemurat te nkolong e isiet; Neiu Isaak Yakobo, neiu Yakobo lelo loo papa pokira tomon o aare. 9#Enk 37.11,28; 39.2,21 Ore te nkaraki olom oatayie apa lelo loo papa Yosef, olalashe lenye, nemiraki Misiri, kake etii apa Enkai te nebo ninye, 10#Enk 41.39-41 nesaru too sinaitin enyena pooki, neisho ninye omom o eng'eno nagut te dukuya Farao, olaiguanani le Misiri; neisho ninye meitoria Misiri neitore enkaji enye pooki. 11#Enk 42.1-2 Neaku eewuo olameyu Misiri, o Kanaan, nelotu osina sapuk; nelau lelo loo papa entoki nanya. 12Kake ore pee ening Yakobo nchere keetae entapa te Misiri, neirriwaa lelo loo papa te nkata e nkiterata. 13#Enk 45.1,16 Ore te nkata e are neibalakinye Yosef kewan ilalashera lenyena, neyiolou Farao, olorere le Yosef. 14#Enk 45.9-10,17-18; 46.27 Neirriwaa Yosef olkilikuai aipotu menye, Yakobo, o lmarei lenye pooki, iltung'ana oobaya ntomoni naapishana o miet. 15#Enk 46.1-7; 49.33 Nedoyio Yakobo alo Misiri, te ine eitianye ninye o lelo loo papa. 16#Enk 23.3-16; 33.19; 50.7-13; Yosh 24.32 Nenapuni seseni lenye aayau Shekem nenukari te nkurare apa nainyiang'ua Abraham ainyiang to layiok le Hamor te Shekem te nkosholai. 17#Ena 1.7-8 Kake ore pee etaanu enkata apa naisiligie Enkai Abraham, nebul olorere oleng te Misiri, 18o metaba anaa netumi likae aiguanani kitok te Misiri lemeyiolo Yosef. 19#Ena 1.10-11,22 Neesek ilo olorere lang, nearaki te ngolon iloo papa metanang'ai nkera naaini ong'ata peyie eye. 20#Ena 2.2 Te ina kata eini Musa naa sidai apa ninye oleng te dukuya Enkai; neitubuluni ninye lapaitin okuni te nkaji e menye: 21#Ena 2.3-10 ore pee eyai ninye ong'ata, nedumu entito e Farao, neitubulu aitoti, neitaa olenye. 22Neiteng'eni Musa aaishaki eng'eno pooki oo Lmisiri; neaku magilani to rorei o too nkiaasin. 23#Ena 2.11-15 Ore pee eaku Musa oloo larin artam nejo kelo abaiki ilalashera lenyena. 24Nedol obo lenye einyalitai oltung'ani le Misiri; nelo amitu aitalaku te ilo Misiri near metua. 25(Aa kejo ninye keyiolou olorere lenye aajo ninye eyooki Enkai aisiaaishore elaku ninche te sinkaisho; kake eitu eyiolou ninche ina). 26Ore te nkolong nasujita ina nedol Siraeli aare ooara, nejo aitaiki osotua. Nejoki, ‘Loyie, irara doi lalashera, ainyoo iorrorro pokira?’ 27Kake eiponyayie ilo oinyal olikae nejoki, ‘Ai ng'ae doi likinchoo iyie ntoria nirish iyiook? 28Ijo sa pee kiaar matua anaa eninkuna olang'ole Misiri?’ 29#Ena 18.3-4 Neisik Musa te nkaraki ilo rorei, nelo aaku olomoni te nkop e Midian, nelo aiu layiok aare te ine.
30 #
Ena 3.1-10
“Ore etulusoitie larin artam, neipang'aki olmalaika ti ong'ata o ldoinyo le Sinai, te nchani nayupuyup. 31Ore pee edol Musa neing'asiayie ina, nejo anyikaki adol, nelotu oltoilo lo Laitoriani ojo, 32‘Ara Enkai oo loo minyi, Enkai e Abraham o Isaak, o Yakobo.’ Neikirikira Musa meitieu aing'ora. 33Nejoki Olaitoriani ninye, ‘Talaku namuka too nkejek inono, amu ore ene nintasheyie, ewueji nesinya. 34Esipa nchere atoduaa osina loo ltung'ana laainei te Misiri, naning olkiyioi lenye, naewuo pee asaru: wou naa taata amu, kaairriwaa Misiri.’
35 #
Ena 2.14
“Olapa taa Musa ilo otanyaita ninche ejo, ‘Ai ng'ae doi likinchoo iyie ntoria nirish iyiook?’ Ninye eirriwaka Enkai metaa oloitore nesaru te nkaina e ilo malaika oipang'aka to lnchani. 36#Ena 7.5; 14.21; Enki 14.33 Ilo tung'ani otorikuo, eidipa ataasa ine nking'asia o nkitoduaat te Misiri o te naiposha nanyokie, o ti ong'ata, larin artam. 37#Enkig 8.15,18 Ilo Musa otiaaka nkera e Siraeli, ‘Keputoki intae Enkai oloiboni too lalashera linyi, leeijo nanu.’ 38#Ena 19.1–20.17; Enkig 5.1-33 Olapa taa otii atua ina siamo ti ong'ata te nebo olmalaika apa oirorie ninye to ldoinyo le Sinai, neirorie loo papa netang'amua sii nkitanapat naaishu naaishoo iyiook. 39Ninye eitu ening iloo papa, neaku etaaraitie aarishie ate, nerrinyo ltauja lenye aaito Misiri, 40#Ena 32.1 nejoki Aaron, ‘Ntobiraki iyiook inkaitin naarik iyiook; amu ore ele oji Musa, otorikuo iyiook aitung'uaa enkop e Misiri, mikiyiolo inaanoto ninye.’ 41#Ena 32.2-6 Neitobiru enkitanyaanyukoto o lashe te nena olong'i, neyaki lasarri lenye enkitanyaanyukoto, neng'idakino esiaai oo nkaik enye. 42#Amo 5.25-27 Kake eibelekenya Enkai neishooyo ninche meteserema lakir le shumata anaa enatisiraki aajo te mbuku oo loibonok le Enkai, ‘Ei nanu nchoo ng'uesi naayieng'i o, te lelo arin pokira artam ti ong'ata, na aji e Siraeli? 43Itudumutua olng'obor le Molok, o lakira le nkai e Rafan, nkitanyaanyukot nintobirakita ate iteserema; kaidurrie naa intae aitogiroo Babilon.’
44 #
Ena 25.9,40 “Neeta apa iloo papa olapa ng'obor le shakeni ti ong'ata. Neitobiraki ninye ilo anaa enaitanapa Enkai Musa meiturubare anaa enaitoduaaki. 45#Yosh 3.14-17 Ilo ng'obor enyaakita loo papa aanapu te nebo Yoshua pee epuonu aajung enkop etaarayie Enkai kulikae oreren aing'atarie ninche, Nebik ilo ng'obor o metabaiki enkata e Daudi. 46#2 Sam 7.1-16; 1 Ilai 17.1-14 Enoto ninye kirotetisho te Enkai, neomonu meishoo meteshetaki Enkai e Yakobo enkaji. 47#1 Int 6.1-38; 2 Ilai 3.1-17 Kake Solomon oteshetaka enkaji. 48Hoo nememany Olotii Shumata Aisul te pooki inkajijik naashetuni too nkaik: ana enatejo oloiboni, 49#Isa 66.1-2 ‘Olorika lai le nkitoo shumata, naa olorika loo nkejek aainei enkop. Kenkaji natiu aja pasa kishetakiki? Olaitoriani ojo: Naa kaji ine nayeng'iyeng'are? 50Mme nkaina ai naitobira kuna pooki?’
51 #
Isa 63.10
“Lo tung'ana oosho murto, lememurata ltauja nememurata nkiyiaa, igolong'akiki oshi ake Enkiyang'et Sinyati; ore enapake nataasa iloo minyi, neijia nkona sii intae. 52Kalo oiboni eitu einyal iloo minyi? Netara metuata lelo apa ooitera aalimu elotunoto e ilo obo supat, lietuo intae aaitarasaa niariaara metua; 53naa intae ootang'amutua nkitanapat, anaa enaishorutua lmalaika kake eitu ntabayaya.”
54Ore ake pee ening kuna baa, neminisu neonyiki lala te ngoro. 55Ore ninye, eiganya Enkiyang'et Sinyati neitirring'a aing'or shumata, nedol enkitoo e Enkai o Enkerai e Tung'ani eitashe te nkaina e tatene e Enkai, 56nejo, “Ng'ura, adolita etabole shumata, neitashe Enkerai e Tung'ani te nkaina e tatene e Enkai. 57Kake etabuaa ninche to ltoilo sapuk, neiken inkiyiaa enye, neitiamaki pooki te nebo; 58nearaa auluo e ina anasa neirrui too soito: ore lelo ootaa shakeni neirragie nkilani enye te nkalo oo nkejek o lbarnoti oji Saulo. 59Neirrui ninche Stefano too soito, eomonito ninye Olaitoriani, ejo, Olaitoriani Yesu, tang'amai enkiyang'et ai.” 60Negil kung, nebuak ajo to ltoilo sapuk, “Olaitoriani, mintalak ninche ena ng'oki.” Ore pee ejo neijia, neirura.
Currently Selected:
Iat 7: SINYATI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2020
©Bible Society of Tanzania, 2020
