Iat 22
22
1“Ilalashera laainei o loo papa, entoning'oki te kuna namitunye kewan te dukuya intae.” 2Ore pee ening'i aajo enkutuk oo Lhebrania eirorie, neitirring'a oleng aagira. Nejo, 3#Iat 5.34-39 “Ara Olyahudi, naa te Tarso e Kilikia aaini, kake te na anasa aaitubuluni too nkejek e Gamaliel, naaiteng'eni te risioroto oo nkitanapat oo loo papa naarrish, naata olokiyo te Nkai anaa ena nitiuwu pooki te le kekun. 4#Iat 8.3; 26.9-11 Ainosie nanu ena Oitoi osina o metuata naen anang'aki korokoroni ilewa o nkituaak, 5naa shakeni lai olapolosani kitok naa neijia etiu olkiaama pooki loo lpaiyiani. Ninche laaishoo mpala nayaki lalashera, pee adumunye alo Dameski aibung lelo ootii ine ayau Yerusalem eena pee eitamei.
Einosayie Paulo enkibelekenyata enye
(Iat 9.1-19; 26.12-18)
6“Ore aloito atinyikaka Dameski, etaa enaipirie enkolong newang'u nabo kata ewang'an naing'uaa shumata naaman. 7Nabatata te nkop naning oltoilo laajoki, ‘Saulo Saulo aainyo pee kisilisil?’ 8Nawaliki ajoki, ‘Olaitoriani, aira ng'ae?’ Naajoki ninye, ‘Ara Yesu le Nasaret lisilisilito!' 9Ore lelo laairiamariyie nanu nedol ina wang'an kake eitu ening oltoilo le ilo laairorie. 10Najo, Olaitoriani, kaji aiko?’ Naajoki Olaitoriani, ‘Inyo, shomo tijing'a Dameski, paa te ine kilikini nena pooki nikitegelakaki taasa.’ 11Ore amu meekure adolisho te nkaraki ina wang'an, naariki aaibung enkaina lelo ootii te nebo nanu, o maetu Dameski.
12“Netii ine oltung'ani obo oji Ananias, oserem ninye Enkai anaa enajo nkitanapat, ooilet Ilyahudi pooki te supatisho, laa ine nemanya ninye. 13Nelotu ilo enatii, neitashe ti alo nanu naajoki, ‘Olalashe lai Saulo, todolisho.’ Ore te ina saa ake nadolishoyu nadol ninye. 14Nejo ninye, ‘Enkai oo loo papa nikitegelua tayiolo yieuna enye, nikincho toduaa ilo obo Asipani nining oltoilo te nkutuk enye; 15amu iaku shakeni lenye too ltung'ana pooki te nena nitoduaa o nitoning'o. 16Ainyoo naa taata ianyita? Inyo mikimbatisai, intukuoi ing'ok inono, impoto enkarna enye.’
Eirriwayioki Paulo meshomo loreren
17“Ore pee aidip atushukunye Yerusalem aomonito te nkaji e Nkai, naainepu enduaata 18nadol aajoki ninye nanu, ‘Isarisara tasiooi tung'uai Yerusalem, amu meng'amaa hoo ninche shakenisho ino ti alo nanu.’ 19Najo, ‘Olaitoriani, eyiolo ninche maate enaikuna meeta enkaji e ntumo neitu ajing napik korokoroni naar lelo likiruko. 20#Iat 7.58 Naa ore pee eibukori osarge le Stefano olchakeni lino, aitashe sii nanu atonyorrayie, naa nanu oitasheikio nkilani e lelo ootara.’ 21Naajoki ninye, ‘Shomo, amu nanu laairriwaa enelakua shomo enetii Loreren.’ ”
Paulo o Ikitok loo sikarini
22Neinining lelo tung'ana Paulo o metejo ele rorei; nejo ake neijia, neilepie pooki ltoiloishi nejo, “Ewuang'ie ele tung'ani te nkop! Amu meishiaakino neishu!” 23Ore ebuakita neisuaakita ilkilani lenye nekur enterit aaisuaaya, 24neitanapisho ilo kitok loo sikarini meyauni ninye atua emanyata enye, nejo metaari meiroro, pee eyiolouni enatabuaakinye ninche Paulo. 25Ore eidipaki aateen too nkeenta, nejoki Paulo osajini oitasheiki, “Keishiaakino pasa neidong'i oltung'ani loo Roma, leitu eng'asi aaiguanare?” 26Ore pee ening ilo sajini ina nelo enetii olkitok loo sikarini nejoki, “Kaa bae ena nijo aas? Amu oloo Roma ele tung'ani.” 27Metaa nelotu ilo kitok enetii nejoki, “Tolikioki sii iyie japa, eji ira doi oloo Roma?” Nejoki, “Ee.” 28Newaliki ilo kitok loo sikarini ajoki, “Kainyiang'ua nanu ina kiela too ropiyiani kumok oleng.” Nejoki Paulo, “Kaikino nanu.” 29Metaa nepuo nabo kata aalam lelo apa oojo pee epuonu aajur; neureshoyu sii ninye ilo kitok loo sikarini amu etayiolo ajo oloo Roma Paulo neidipaki aateen.
Ewaki Paulo dukuya olkiaama
30Kake ore taaisere, neyieu ninye ake neyiolou enaitang'orie Lyahudi Paulo pee eisitaaitie, neen ninye, nejoki lapolosak kituaak o lkiaama pooki menototo, neriku Paulo neitasheyie te dukuya ninche.
Currently Selected:
Iat 22: SINYATI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2020
©Bible Society of Tanzania, 2020
