MATAYO 9

Yesu heé tiqtír sol'omit nguwa hungu/uús

(Marko 2:1-12; Luka 5:17-26)

1Yesu iri tsa/án gawaá miringamo, iri waaraáhh ar baraá tla/ángw tlawi, iri hardáh ay baraá gixsadá' inós i hooti. 2Heé tiqtír sol'omit kuri huúw dír Yesu, aa qaát gawaá shafta. Nee Yesu haratlintaaor'ín ngiwa ár, heedaáduú tiqtír sol'omit guri báy, «Ma da'ayumiitaar, garmaaeé'. Tlakweemaawók kaa gurtláy.»

3Intsaahhatuusér hara'ayár Mose bahh'alé tari baraá muner'ín i káh, «Heewí i Munguú /ooslislín.»

4Ala Yesu tidá' ta baraá muner'ín i axweesi gari tsaáhh, iri oó', «Muruusíng tlákw mus baraá munerhúngí axwesá'? 5Gár ák inslaahh a gaalá, a tawa oói, ‹Tlakweemaawók kaa gurtláy›, laqaá tawa ooi, ‹Sihhiít, hi'iít›? 6Ala kuungá' xuaak adór Garmoó Hee aleesleemu ngur kón baraá yaamuwo oo tlakweema ngiwa gurtlay.» Tiqtusmoodá' guri báy, «Sihhiít, hhaftuuwók gagaareek, waátl amór do'ók.»

7Iri sihhiít, iri waátl amór do'ós. 8Boo/aydá' didií dirií' adoodá' ngiwa ár iri da'ayuút. Mungú kuri xirfayeemiís, oo aleesleemuú adoorí gwa dír múkwí haniis.

Yesu Matayo nguwa ateét

(Marko 2:13-17; Luka 5:27-32)

9Yesu iri tláy didaádae. Qoomár tawa hi'iiti Yesu heeko guna ár, aa iwiít dír doó ohme. Umuuwós a Matayo. Yesu guri báy, «Án eeharáng.»

Iri tláy, guri eehár.

10Qoomár Yesu iwa iwiít dír muruú /ayma dír doó Matayo, ohomuusér koódi ar yaariir nee múk tlakuuse tari hardáh, tari iwiít dinkwa nee Yesu nee eeharuuseerós. 11Múk Farisayo adoodá' ngiwa ár, eeharuusér Yesu kari báy, «Ahaá, asma milá, intsaahhatusmoohúng mis /ayín dinkwa nee ohomuusér koódi nee tlakuuse?»

12Yesu axweesanay'ín kudá' nguwa axaás giri báy, «Múk slaqo hhó' i qwaslaarmoó leelehhiitiiká, aqo har tiqtuuse. 13Ala tlawsé', gídaabár /aymi'iiká' aldakuutaak, ‹Ilahhooár muruú ta tsu/i a sla'aaká, ala gár ni slaa' a gurtleemu.› Aníng naa hardihiiká asma múk hota ganaá' nguwa ateetiim, ala a múk tlakuuse.»

Yaahasa daanduú gwaawito

(Marko 2:18-22; Luka 5:33-39)

14Qoomaadae eeharuusér Yohane Yesu guri i daqeér, guri beér, «Ahaá, atén nee múk Farisayo mas gwaawawimaán, ala eeharuuseerók gaálaay i gwaawawiin?»

15Yesu gari báy, «War/aá heé duuxuuxuúm adór ir tsuunqumiisiya' a doomá, qoomár bar ta dinkwárií dirii' nee heedaádá' duuxuxuúm? Ala deelo i hardát ar heedaádá' duuxuuxuúm kuwa hingeesi. Daqaní an qoomár inooín tawa sangw gwaawin.

16«Hee i kaahh oo warqamoó inqwaarír /abén gu tsaát, guri waraaq ar inqwaarír qaren. Asma warqamoodá' /abén taa qaás, inqwaaridá' qaren ga hhitín, nee didaádá' aa fox iri tláhh. 17Tam muu difaáír /aben ga qamaaminká baraá tlakwa'aá kaahari#9:17 Tlakwa'aá kaahari: Qoomaadae xoorór Yahudi difaái kan qamaamiín baraá tlakwa'aá taa tleéhh ar kaahari. awa qaren. Ala birnga qaás, difaáidá' /aben tlakwi'iidá' gi tsú/, difaái iri ku'út, nee tlakwi'iidaá kaahari niri hhitirutiyá'. Ala difaáír /aben dír ki qamaamin a baraá tlakwa'aá kaahari awa /aben, daqaní muruuwí tsaraawo ku amohhoó'.»

Waaslee/atisár dasi nee /ameenír inqwaarír Yesu gaa kwatit

(Marko 5:21-43; Luka 8:40-56)

18Qoomár Yesu iwa dir'ínií axweesi naxés heeko úr oo múk Yahudi nina hardáh, guri i tumbarara'aát, iri oó', «Dasir'eé' hamír kilá' aa gwá', ala kuúng qwaláng, dakók i qaaseek, inós daqaní i sláf.»

19Yesu nee eeharuuseerose tari tláy, heedaádá' kuri eehár.

20Siiwadár kilae /ameenirka wák ar tiqtír ubíngw tseerdu nina hardát. Inós i tiqaaqiín ay kureeri mibaá nee tsár. Ina amór alaá Yésúr ót, guri pasltá inqwaari kwatít. 21Asma /ameenidá' ina baraá muunaáwósií ó', «Pasltá inqwaarirós bara sa kwatiít, a hunguú/.»

22Yesu iri alií warqáy, gari ár, gari báy, «Mune hhe'eés, dasir'eé', haratlintaaoorók iga hungu/ús.» Siiwadár kilae /ameenidá' iri hungú/.

23Yesu iwa dír doó waawutmoodií hardáh, múk filiímboó ufhhaám guna didií áy, nee boo/oó muu oo tsuunqumiís. 24Giri báy, «Quutlé', asma dasiirí aa gwaiká, in gú'.» Kuri ló'wa wa qasén. 25Alaá boo/aydá' kuwa surkuús, Yesu ina dáh, dasiidá' gari dawa óh, iri sihhít. 26Kaangwí iri xu'utiít baraá yaamuudá' sleémeerowo.

Yesu taampaá tsár ngiwa ila' qaytsitís

27Yesu iwa didá' wa tláy, iri geerií kumiít, kuri eehár nee múk tsár oo taampu i tseeamín, ta kaahi, «Garmoó Daudi atén ti gurtleer.»

28Yesu iwa dír dó' i hardáh, taampuudá' nguri i daqayé'. Yesu giri báy, «Kuungá' aga haratlinti'í'i adór aníng tlehhmuú adoosíng ngur aleesláw?»

Tari oó', «Eeít, Aáko.»

29Ilaaín giri kwatimiít, iri oó', «Ar qoomoó haratlintaaorhunge tisíng ta sla'a' slawaak.» 30Ilaaín niri qaytsitiyé'. Ala Yesu giri ló'wa gurbuú', giri báy, «Kaangwí mu baloó heé bawaara'.»

31Ala inooín tari tláy, kaangwí kuri tsiyayaáx baraá yaamuudá' sleémeero.

Yesu heé afa wasli nguwa hungu/uús

32Qoomár mukwí iwa ti'imiiti, heé afa wásl oo neetlaame aa eér kunguri huúw dír Yesu. 33Qoomár neetlaameedá' kawa hingeés, heedá' afa wásl iri axweés. Boo/oó muu iri waa/oó/, iri káh, «Gár adoorí aga araaniiká qooma sleémeerowo baraá Israeliro.»

34Ala múk Farisayo tana oó', «I neetlaamér gusiisín ar /uuruú neetlángw úr.»

Yesu guruuwós iwa tláy as muu

35Aluuwo Yesu gixsadu sleémeero nee ayeemo gina alhi'iimiít. Iri baraá maraá saalingw'ín wa intsaahhatimís. Ya/abtór hho' ar waawuti'iimár Mungú gari alki/iít, nee tiqtuuse sleémeero gari hungu/uumiís, nee slaqwaatlakwér dimbadimbé sleeme. 36Yesu boo/oó muu nguwa ár, iri gurhaamuút, asma boo/aydá' iwa slaaqamiít nee iwa diyayaa/aát adór bee/ángw de'eemusmo wásl. 37Yesu eeharuuseerós gari báy, «Bu'uungw ku yaariír, ala múk gadiyeé ku niiná. 38Gawaá adoorihe Aakoó bu'uungw loó' firiimaak as múk gadiyeé nguwa ya/aawi baraá bu'uungós.»

Currently Selected:

MATAYO 9: IRQW

Highlight

Copy