MATAYO 2
2
Xu'utuusér tsatse/ ar da/aá daahh
1Yesu kuna laqwaál baraá gixsár Betilehemu ar baraá yaamaá Yudea, qoomár waawutmo tawa Herode. Qoomaadae xu'utuuserka ar tsatse/ nina da/aáw wa tleér ay Yerusalemu. 2Iri ó', «Waawutmooduú múk Yahudi taa laqwaál i amá? Asma atén tsatsee/irós ana araán da/aáw wa ale. Nee atén nguna xirfayeemisuú awaán.»
3Waawutmo Herode adoorí ngiwa axaás iri kwisliít, tam múk Yerusalemu sleémeero iri kwisliít. 4Herode kaahamuusér uren sleémeero ar Mungú nee intsaahhatuusér hara'ayár Mosewo giri ateét, giri yaahamiís iwa kaahi, «Kristo dír kuy laqwaali a diimá?»
5Inooín kuri báy, «Baraá gixsár Betilehemu ar baraá yaamaá Yudea, asma aarusmo adoorí gana alki/iít iwa kaahi,
6‹Kiíng gixsár Betilehemu
ar baraá yaamaá Yudea,
kiíng ti baloó niinaweeká
baraá gixsadaá Yudeawo,
asma waawutmo i ti'iit baraawoge
oo muk'eé' oo Israeli gu de'eém.› »
7Aluuwo Herode mukduú xu'utuusér tsatse/ guri dimbé ateét ar sufa, kaangw guri dir'ín wa sláy oo tsatsee/idá' iimír kawa ár. 8Giri ya/aáw ay Betilehemu, giri báy, «Tlawsé', kángw na/aay yaahasa hhe'eesaak. Nee bura aandé', kangwsíng ngu amor'eé' hubá', as aníng sleeme nguwa sluufmisuú aw.»
9Inooín axweesanoó waawutmo kuwa axaás, tari tláy, nee tsatsee/idá' taa da/í ár giri geerahát, iri sihhít didár do'duú na/aay i dirii'i. 10Tsatsee/idá' kawa ár, tari qwalaá/ kángw kilá' wa ale. 11Tari dáh baraá do', na/aydá' kuri ár nee aayoorós Mariawo. Kuri i tumbarara'aát kuri sluufmiís. Nee inooín muruuín kudá' i kona' nguri gweeriyé', nguri haniisiyé' dír na/aay. Muruú taa hanimiís a kwí: Sahaábu nee mooyángw tsuú', nee mooyangwko ta babay manemane.
12Inooín Mungú giri gurbuú' ar baraá tlata as mindiwa dír Herodér ki/iyé'. Inooín tari waátl ar loohír hatlá'.
Tawa goów Misri
13alaá xu'utuuseedár tsatse/ iwa tleér, malaykamoó Aako iri hardáh dír Yosefu ar baraá tlata, iri oó', «Tláw na/aay nee aayooro ar guweek ay baraá yaamaá Misri, amoodá' wa hootaak ay dír án kuúng uy ateet. Asma Herode i na/oó leelehhiit as nguwa gaasi.»
14Qoomár xweeraawo Yosefu na/aay nee aayo girir tláy ay yaamaá Misri. 15Tari amoodá' wa hotaatín ay qoomár Herode iwa gwaá'. Adoorí ina tleehharút as /aymuudá' Aako aa oó' ar afkú aarusmo, iwa boo/i kudá' iwa oó', «Garmaaeé' una ateét niwa baraá yaamaá Misrír wa ti'iiti.»
Tsu/utár na/ii
16Herode ngiwa ár adór kura al/aáy nee xu'utuuseedár tsatse/, iri ló'wa buúhh. Muu guri ya/aáw na/aá daaqaay sleémeero awa baraá gixsár Betilehemu nee inslaawaywose kiwa tsu/i, awa har kureeraá tsár nee awa kureeraá tsár ngaa ay'iiká sleémeero, ar adoodá' ngira yaahamiís dír xu'utuuseedár tsatse/uwo.
17Gawaá adoorihe /aymi'iidá' aarusmo Yeremia aa oó' niri boo/iyé' kudá' iwa káh,
18«Afo kana baraá Ramár i axaás,
/aa/e nee tsuunqusmoó yaariír,
Raheli na/iiwós ale/aa/amiín,
tam gurkwa/asa gaa ya/aandiiká
asma iwa kahhiya'.»
Tindawa Misrír wa kií/
19Herode iwa gwaá', malaykamoó Aako iri hardáh baraá Misri dír Yosefu ar baraá tlata, iri oó', 20«Tláw, na/aay nee aayoorose ar ki/eek ay baraá yaamaá Israeli. Asma mukdá' na/oó gaasár wa slaá' aa qaátl.» 21Yosefu iri tláy, na/aay nee aayooro girir kií/ ay yaamaá Israeli.
22Ala Yosefu ngiwa axaás adór Arkelao tar waawutmoó yaamaá Yudea, kitángw baabuúwós Herode, iri da'ayuút amoodá' keemuuwo. Alaá inós gurbu'utá baraá tlataawo kuwa hhe'eés, iri tláy ay yaamaá Galilaya. 23Iri hotaá áy baraá gixsár Nasareti. Adoorí ina tleehharút as /aymuudá' aaruuse aa ó' iwa boo/i, kudá' tawa káh, «Inós ku bay a heé Nasareti.»
Currently Selected:
MATAYO 2: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
