MATAYO 12

Yaahasa daanduú deelór Sabaáto

(Marko 2:23-28; Luka 6:1-5)

1Qoomaadae Yesu ina waaraáhh ar baraá tla/ángw qamaá angaáno bál deelór Sabaátoro. Eeharuuseerós iri qwarít, angaáno guri giqeér guri pikmís. 2Múk Farisayo adoodá' ngiwa ár, Yesu kuri báy, «Ga/aaweek, eeharuuseerók gár i tlehh a gár hariimaaká deelór Sabaátoro.»

3Yesu giri báy, «Aga soomusi'iikáhe adoodá' Daudi aa tleéhh, qoomár iwa qwariít? Inós nee mukdá' ti alkoomá' 4tana dáh baraá Doó Mungú. Inós mikaáteedá' taa qaás as Mungú gari /aáy, tidá' inós wa hariimaaká /aymaaro, tam mukdá' nee inós ti alkoomá' sleeme, aqo har kaahamuusér Mungú kilós. 5Slám aga soomusi'iikáhe baraá hara'ayár Mosewo? Baraadae kaa gooín adór kaahamuusér Mungú hara'ayár deelór Sabaáto ngir giqaaqeér baraá Doó Munguhe bál Sabaátoro, ala tam adoorihe taa dakuusiiká. 6Ala án nu baw, diirihe heé ak úr i deer ta Doó Munguhe. 7Kaa gooín, ‹Ilahhooár muruú ta tsu/i a sla'aaká, ala gár ni slaa' a gurtleemu.› Kuungá' gídaabár /aymi'iiká' geeraawo bar xuá', múk tlakweemaá koomaaká geera u sakwasleemuta'aaká. 8Asma Garmoó Hee an Aakoó deelór Sabaáto.»

Yesu heé aa dawa sol'oot nguwa hungu/uús

(Marko 3:1-6; Luka 6:6-11)

9Yesu iri amoodá' wa tláy, iri dáh baraá doó saaliingw. 10Heeko dakós aa sol'oot i baraadí dirii'. Yesu kuri yaahaás, tari oó', «Xáy, i hariínda muu kuwa hungu/uumisi deelór Sabaátoro?» Adoorí kana oó' as kuwa sakwasleemár wa slai.

11Yesu giri báy, «Dirhunge hee a heemá oo bee/irós ar wák aa /et baraá bohóngw i aleeró, oo ga máw duuxaro as tawa deelór Sabaáto. 12Hee i ak slahhaaiikáhe ta bee/iro. Gawaá adoorihe hhooeema kiwa tleehhi deelór Sabaátoo i hariná'.» 13Aluuwo heedaádá' guri báy, «Dakók gan'aaseek.»

Dakós guri gan'aás, iri hunguú/, iri hhooáy adór kuduú tsár wa ale. 14Ala mukduú Farisayo tari ti'iít, tari kwasleemuút daanduú Yesuwo adór kur gaasi.

Sagadiyusmoó taa tsawaár

15Yesu adoodá' ngiwa tsaáhh, iri tláy didaádae, múk yaariír guri eehár. Sleémeero giri hungu/uumiís. 16Yesu mukdá' guri báy, «Tí ma heé bawaara'.» 17Asma /aymuudá' aarusmo Isaya aa oó' iwa boo/i, kudá' iwa káh,

18«Ga/aaweek, sagadiyusmooeé' kudá' naa tsawaár

a sla'aarusmooeé' kudá' muunaáeé' gwa qwal/atis.

Qeeruueé' u dirós i haniís.

Inós kwasleemár ganaa' ga alki/iit

dír xoordu sleémeero.

19Inós i tlaampa'aamisiiká, nee i tseeiiká ar afór ur.

Slám hee afoorós ga axaasiiká baraá loohiro.

20Daaír aa qwaambit ga geeqayká,

slám taámbír quu' ga gaasiiká,

ay dír kwasleemár ganaa' tidá' inós i huwi i baaliin.

21Nee xoordu inós nguri haraxuiyá'.»

Yesu nee Be'elsebuli

(Marko 3:20-30; Luka 11:14-23)

22Qoomaadae heé neetlaame aa eér kunguri huúw amór Yesu. Heedaádá' a taampa, slám a heé afa wásl. Yesu guri hungu/uús, heedá' afa wásl iri axweés, nee iri xumiís. 23Boo/aydá' sleémeero iri waa/oó/, tari káh, «Heewí a Garmoó Daudíwoóke?»

24Ala múk Farisayo adoodá' ngiwa axaás tari oó', «Kwí bir neetlaamér duxun, gár ngir duxun a /uuruú Neetlángw úr kudá' ta bay Be'elsebuli.»

25Ala Yesu inslaway'ín nguwa tsaáhh giri báy, «Umuúqo waawuti'iimaro birti kilós tlaampa'aamís, i hhitirút. Slám gixsa, laqaá umuúqo do'o birti kilós tlaampa'aamiis, do'dá' i sihhitiiká. 26Nee Neetlaangw bir Neetlángw hingeemiis, inós ti kilós duxún. Ala adór waawuti'iimarós ir sihhit a adoomá? 27Nee aníng barnaxes a neetlaamér duxuúm ar /uuruú Be'elsebuli, xáy, mukhúng /uuruú ngir duxun oo heemá? Gawaá adoorihe mukhúnguú kilá' kuungá' nun sakwasleemuut. 28Ala aníng bar neetlaamér duxuúm ar Qeeruú Mungú, waawuti'iimár Mungú naa qaroó amorhúng i hardát.

29«Hee dahamu gu aleesláya baraá doó heé /uuruú koóm, bar heedaádá' /uuruú koóm gwaa ala tseegiiká. Ala burungwa tseék, daqaní do'ós hayoharo gu aleesláy.

30«Heé barte'eénií diriiaaká, kwí a aníng ina sií', nee kudá' burumburiimaaká dinkwa nee aníng, inós in tsaafimiis. 31Gawaá adoorihe, án kuungá' nu baw, muu ku gurtláy umuúqo tlakweemaawo nee umuúqo /aymuú /ooslimto. Ala kudá' Qeeruú hhoohhoó' oo Mungú gwaa /ooslin, ku gurtlayká. 32Umuúqo heewo oo /aymuú /ooslima gu oó' daanduú Garmoó Heewo ku gurtláy. Ala umuúqo heewo oo /aymuú /ooslima gu oó' daanduú Qeeruú hhoohhoó' oo Munguhe, ku baloó gurtlayká baraá yaamuukae, tam baraá yaamuudá' xaw'a.»

Xa'ano nee mamuuwós

(Luka 6:43-45)

33«Xa'ano burku hhoó', mamuuwós ki hho', laqaá xa'ano burku tlaákw, mamuuwós sleeme ki tlakw. Asma xa'ano gár kur tsaahhi a mamuuwós. 34Kuungá' xwaylár dayshe, kuungaásingá' tlakw, adór axweesanoó hhó' kur axwesá'? Asma hee gár i axweesi a tidá' muunaáwós iwa hatsi. 35Heé hhoó' gár i hanmiisi a muruú hhó' baraá daqaari'iimarós tidá' hhooe. Heé tlaákw gár i hanmiisi, a muruú tlákw baraá daqaari'iimarós tidá' tlakwe.

36«Ala án a kah, umuúqo axweesantá gídaabár koomaaká ar muu i ooi, faarór axweesantadá' ka haniis bál deelór sakwasleemaro. 37Asma kuúng tu gan'amií harafaar as axweesanaywók kudá' taa axwés, laqaá kuúng tu sakwasleemuut as axweesanaywók kudá' taa axwés.»

Múk tlákw i layár leelehhiit

(Marko 8:11-12; Luka 11:29-32)

38Aluuwo intsaahhatuusér hara'ayár Mose bahh'alé nee múk Farisayo Yesu kuri báy, «Intsaahhatusámo, atén layár kuúng ta tlehh a artá wa sla'aán.»

39Giri báy, «Qartá tlaakw nee ar tsaatuuse i layár leelehhít. Ala layár ta slay i káhh, aqo har layár aarusmo Yona kilós. 40Asma adoodá' Yona ira baraá guruú siyó wa hoót deelo tám, tlaatla/aangw nee xweeraawo, tam Garmoó Hee sleeme in baraá guruú yaamuú wa hoot. 41Bál deelór sakwasleemaro múk Ninewi i sihhiit dinkwa nee múk de'emaaká'. Ala múk de'emaaká' ku sakwasleemuut as tlakweemaaín nee múk Ninewi. Asma múk Ninewi ina hhu'uu'ún, axweesantá Mungú tidá' Yona aa dahareemiís ngiwa axaás. Ala diirihe heé úr i deer oo Yona gu baá/. 42Bál deelór sakwasleemaro waawuto'ór basa i sihhít dinkwa nee múk de'emaaká', nee inós gin sakwasleemút as tlakweemaaín. Asma inós amór saaw ngina wa tleér, as sagalooár Solomon ngiwa axaasár eer. Ala diirihe heé úr i deer oo Solomon gu baá/.»

Ki/imá neetlaame

(Luka 11:24-26)

43«Bar neetlaame hee ngwa geemeér, aqo in tleér in baraá yaamaá kaahaár wa harweeriiriín, as dii ngiwa leelehhit ar i hungu/us, ala ga sleeraaká. 44Iri o', ‹Aníng a kií/ amór dooeé' kudá' ni daahh.› Ala binda kí/, do'dá' burungwa aán, ku kaahaár, slám kwa fiíts nee kwa parootuús, 45in tleér, neetlaamér hatlá' faanqw gan léhh, ar ak tlakw inós ba/a. Nee tari dah, tari baraadá' wa hoot. Nee tlehhemuú heewí in ak tlakúy ló'wa ale ta kuduú geera ba/a. Adoorí an adoodá' mukwí tlákw oo de'emaaká' ku laqi.»

Hha'aá Yesu nee aayír'ín

(Marko 3:31-35; Luka 8:19-21)

46Qoomár iwa axweesi nee boo/aay, aayoorós nee hhaeewós naxés ta tsee/aá wa sihhimiit, ta axweesantá slaa' nee inós. 47Heeko wák iri oó', «Aayoorók nee hhaeewók ta tsee/aá wa sihhimiit, kuúng tun slaa'.»

48Iri oó' dír heedaádá' kaangw ngwa huuw, «Aayor'eé' a heemá, nee hhaee'eé' a ín heemá?» 49Diitsa gari looloqoós amór eeharuuseerós, iri oó', «Ga/aaweek aayor'eé' nee hhaee'eé'. 50Asma umuúqo heewo oo sla'aarír Baabuúeé' kuduú gawaá doori ga tleéhh, an hhiyaaeé' nee hho'or'eé' nee aayor'eé'.»

Currently Selected:

MATAYO 12: IRQW

Highlight

Copy