MATAYO 11

Ya/abtór amór Yohanedá Baatimaamiís daahh

(Luka 7:18-35)

1Yesu eeharuuseerós tidá' mibaá nee tsár hara'ayaaro ngiwa hhe'eés, iri tláy didae, iri intsaahhatimisuú áy, Ya/abtór hho' gari alki/iít baraá gixsaduuín wa ale.

2Yohane kángw tlehhema'aá Kristo aa tleéhh nguwa axaás, baraá doó tseegamór wa ale, eeharuuseerós gari ya/aáw amór Yesu as kuwa yaahasi, 3«Kuúng a kudá' hardáha, laqaá heé hatlá' un daamaán?»

4Yesu giri mu/aywaáts giri báy, «Tlawsé' tí taa aandé' nee taa axasé' Yohane ti beere', 5‹Taampu i xumiisiyá', taqooraay i hi'iimiit, múk tiqtír tsatmit ku hheehhe'eemiis, múk iia wásl i axamiis, tu'u ki waasle/atimis nee liitlakuuse ka Ya/abtór hhó' i alki/iit. 6Heé amohhoó' a kudá' insarehhír koomaaká daanduueene.› »

7Eeharuusér Yohane iwa tleér, Yesu kángw Yohane guri alki/iít dír boo/aydá', giri báy, «Kuungá' tawa baraá darmuú keeré', maga qaytsuú eeré'? Gár taa qaytsuú eeré' a gitsoodá' fur'a i dingimísa? 8Bar gitsoorooká, ala a milá? A heé inqwaruú hhohhó' gu tsitatíta? Ala baré múk inqwaruú hhohhó' gu tsitatiít i baraá maraá waawitá. 9Maga qaytsuú eeré' ala? Ana aarusmoó artá eerí'i? Eeít ar ló'. Án a kah, heé úr ta aarusmoowo una aandé'. 10Kwí an kudá' tí kasa gooín,

‹Ga/aaweek, aníng ya/abusmooeé' u ya/aáw geeraawók wa ale,

oo loohirók ga amohhe'eés geeraawoge.›

11«Án a kah, baraá múk /ameena naa laqwali, heé úr oo Yohanedá' Baatimaamiís gu baá/ i kaahh. Ala kudá' niiná baraá waawuti'iimár dooriiwo kun úr dirose. 12Iimír de'emaá Yohanedá' Baatimaamiís ay hamí waawuti'iimár doori kan i qwatliit ar /uuru, nee múk /uuruú koóm ga hayoohín ar /uuru. 13Asma aaruuse sleémeero nee hara'ayár Mosewo, waawuti'iimár Mungú kana aariirín ay qoomár Yohane niwa ti'iít. 14Ala kuungá' bar sla'á' haratlintaaooro, inós an Eliadá' hardáh. 15Heé iaá axamis gi koóm i axaasi.

16«Ala mukuú de'emaká' gár ngur qoomees a milá? Gár ngur qoomees a na/aá naa iwiitiye' dír boo/aay, i didá' wa na/aá hatlá' ateetiná', 17ta kaahi,

‹Filiímbi ngiwa ufaahhaán, aga neti'iiká,

tawa tsuunqumisaán, aga /a/i'iiká.›

18«Asma Yohane niwa hardáh, i /ayinká, slám i wahanká, tari oó', ‹Kwí neetlaame gwa eér.› 19Garmoó Hee nina hardáh i /ayín nee i wahán, tari oó', ‹Kwí a hheehhusmo, nee xuufiitusmo, mulqumoó ohomuusér koódi nee múk tlakuuse.› Ala sagalooár Mungú adór tar ló' kingina laqán nee tlehhemi'iiwós.»

Iigahhamituú gixsadaá naa hhu'u'un'iiká

(Luka 10:13-15)

20Yesu muruú xuawaslén oo yaariír guna tlehhiít baraá gixsaduukae, ala múk baraá gixsaduuká' aa hhu'u'unká. Gawaá adoorihe Yesu gixsaduuká' giri naanaáq iri oó', 21«A tsaxwaahúng kuungaá gixsár Korasini, nee kuungaá gixsár Bet-saida. Asma muruuduú waa/oo/amo muruudá' xuawaslén aa tleehharumiit dirhunge geera bar ina tleehharuút baraá Tiro nee Sidonír wa ale, taa qaroó hhu'u'ún, nee guniyadu kay tsiit, tay iwiit gawaá da/ara as hhu'u'ungw'ín kuwa laqan. 22Ala aníng kuungá' nun baw, bál deelór sakwasleemaro Tiro nee Sidoni a tsiní sakwasleemar'ín kawa ilí oohi, ta kuungane. 23Nee kiíng gixsár Kapernaumu, xáy, ti tsa/aási ay gawaá doori? Aasla'áy, tin /aytiis ay baraá gi'i. Asma muruú waa/oo/amo oo aa tleehharuut diroge, geera dír iwa tleehharuút bar an baraá Sodoma, geera Sodoma i deer ay laarí.

24Ala aníng kuungá' nun baw, bál deelór sakwasleemaro yaamaá Sodoma a tsiní sakwasleemar'ín ngiwa ilí oohiya', ta kuungae.»

Qwalaasé' amor'eé' hungu/uusé'

(Luka 10:21-22)

25Qoomaadae Yesu iri axweés iri oó', «Aníng kuúng u sluufiís, Baabá, Aakoó doori nee yaamu, asma muruuwí ugwa lú/ dír múk sagalooár kooma nee fuquraangw, kuri laqaán dír na/aá ninakw. 26Eeít, Baabá, asma adoorí an adoodá' kuúng kara slá'.»

27Iri oó', «Baabuúeé' umuú gaaro nga gawaá dabaaeénií qaás. Ala heé Garma gu xuú' i kaahh, aqo har Baabá kilós. Slám heé Baabá gu xuú' i kaahh, aqo har Garma kilós nee kudá' Garma xu'utisaro aa slaá'.

28«Qwalaasé' amor'eé' kuungá' sleémeero awa daawiimitá' nee awa huwa aa al iiloouúr, án kuungá' nu hungu/uús. 29Taqwante'eé' gawaá sum'iihúngií qaasaak, dir'eé' wa intsatsaahhaak. Asma aníng ti tsatsaa'aár, nee muunaáeé' ku gurhhoó'. Daqaní kuungá' amohhooa a sleerá' baraá munerhunge. 30Asma taaqwante'eé' i natsaatsá' nee huwar'eé' ka inslaahh.»

Currently Selected:

MATAYO 11: IRQW

Highlight

Copy