LUKA 7
7
Yesu lawaalmoó geeraharusmoó askaári nguwa hungu/uús
(Mat 8:5-13)
1Alaá Yesu axweesantós sleémeero dír múkwí ooaro ngiwa hhe'eés, iri tláy ay Kapernaumu. 2Lawaalmoó geeraharusmooko askaári i tiiq, i afkú bohoóngwí dirii'. Askaarmoodá' lawaalmoowós kudá' gu ló'wa slaa'. 3Inós kángw Yesu nguwa axaás, bariisér múk Yahudi gari amoorós i ya/aáw, as Yesu kuwa firin lawaalmoowós nguwa hungu/uusár ay. 4Inooín tawa dír Yésú ii hardáh, kuri ló'wa harhheehhe'eés tari oó', «I hariín heewí adór i kaahi kawa tlehh, 5asma xooroorén ga ló'wa slaa'. Nee inós a kudá' atén taa doó saalíngwí tleehh.»
6Yesu nee inooín tiri koné'. Iwa dír bihhaá dó' i tseewúy, geeraharusmooduú askaári mulqeerós gari amoorós i ya/aáw, kuri báy, «Aáko, ma tawó daawitaar, asma aníng a hariimaaká kuúng tawa baraá dooeé' dat. 7Gawaá adoorihe sleeme ana tsaáhh adór nir hariimaaká niwa amoorók kaw. Ala /aymu na ooang, lawaalmooeé' i hunguu/. 8Asma aníng sleeme múk i baliít i deer, slám askaárír án ni baliit i deer. Kwí bura báw, ‹Tláw!› aqo in tláy, nee kwí bura báw, ‹Qwaláng!› aqo nin hardah. Nee lawaalmooeé' bura báw, ‹Adoorí tleehheek,› aqo gan tleehh.»
9Yesu tí ngiwa axaás, heedaádá' guri waa/oó/, iri warqáy amór boo/aydá' ngwa eehar, iri oó', «Án a kah, tam baraá múk Israeliwo haratlintaaór ur ar adór tí aga baloó ariiká.»
10Nee mukdá' taa ya/aáw iwa kií/ amór do', tawa hardáh naxés lawaalmoodá' aa hunguú/.
Yesu garmoó kwaalo'ór Naini nguwa waaslee/atís
11Aluudae Yesu iri tláy dír gixsarka ta bay Naini. Nee eeharuuseerós tina koné', nee boo/oó úr oo muu. 12Dír dahmuú gixsa kuwa áy, tuuarka kana didií áy, kingi tsee/áy loohiis. Inós a na/oó garma oo wák dír aayoorose, slám aayoorós a kwaalo'o. Múk yaariír oo baraá gixsa nee inós ti koná'. 13Qoomár Aako ngiwa ár, guruuwós iri tláy, gari báy, «Ma /aa/amiimaar.» 14Yesu iri tseewúy, xaaiidá' kingir gagarin giri kwatiít, mukdaádá' ga loohiís tari sihhiít. Iri oó', «Gárma, án a kah, kuúng tlawáng.» 15Heedaáduú tuua iri tláy, iri iwiít, iri ilawaáts. Guri aayoorós i haniís.
16Muu sleémeero iri da'ayuút, Mungú kuri xirfayeemiís ta kaahi, «Aarusmoó úr naa ayaarén wa ti'iít,» nee «Mungú naa mukós ba/amisár áy.»
17Tí Yesu aa tleéhh iri tsiyaayaaxát yaamaá Yudea sleémeerowo, nee baraá yaamu sleémeero awa inslaawaydá'.
Múk Yohane aa ya/aáw
(Mat 11:2-19)
18Eeharuusér Yohane kaangwí sleémeero guri amór Yohane húp. Eeharuuseerós ar tsár gari ateét, 19gari ya/aáw amór Yesu, kuwa yaahasi gídaabá, «Kuúng an kudá' hardáha, laqaá heé hatlá' un daamaán?»
20Inooín tawa dirós i hardáh tari oó', «Yohánedá' Baatimaamiís taa amoorók i ya/aáw i kaahi, ‹Kuúng an kudá' hardáha, laqaá heé hatlá' un daamaán?› »
21Nee hamtidár kilae múk yaariír oo tiqtuuse nee oo slahhahhaá' guna hungu/uús, nee oo neetlaame aa eér, nee taampaá yaariir niri qaytsitiyé'. 22Yesu mukdá' tinda ya/aáw guri báy, «Tlawsé', tí taa aandé' nee taa axasé' Yohane ti beere', gídaabá taampu i xumiisiyá', taqooraay i hi'iimiit, múk tiqtír tsatmit ku hheehhe'eemiis, múk iiawasle i axamiis, tu'u ki waaslee/atimis, nee liitlakuuse ka Ya/abtór hhó' i alki/iit. 23Heé amohhoó' a kudá' insarehhmoó koomaaká daanduueene.»
24Mukdá' Yohane aa ya/aáw iwa tláy, Yesu kángw Yohane guri alki/iít dír boo/ayduú muu, iri oó', «Tawa baraá darmuú keeré', maga qaytsuú eeré'? Gár taa qaytsuú eeré' a gitsoodá' fur'a i dingimísa? 25Bar gitsorooká, ala a milá? A heé inqwaruú hhohhó' gu tsitaatíta? Ala baré múk inqwaruú hhohhó' gu tsitaatiít, nee kudá' diihhooár /aáy i baraá maraá waawitá. 26Ala maga qaytsuú eeré'? Ana aarusmoó artá eerí'i? A ló', án a kah, slám a kudá' úr ta aarusmowo. 27Kwí an kudá' tí kasa gooín,
‹Ga/aaweek, aníng ya/abusmooeé' u geeraawók wa ya/aáw,
oo loohirók ga geeraawók wa amohhe'eés.›
28Án a kah, baraá múk /ameena naa laqwali, heé úr oo Yohane gu baá/ i kaahh. Ala kudá' niiná baraá waawuti'iimár Munguhe kun úr ta inose.»
29Muu sleémeero nee ohomuusér koódiro adoorí kawa axaás, looeemaá Mungú kiri ya/án, asma kiwa baatimiís ar baatiísmoó Yohane. 30Ala múk Farisayo nee intsaahhatuusér hara'ayár Mose sla'aaridár Mungú daanduuine kana sií', asma inooín baatiísmoó Yohane kwa ya/aniká.
31Aako iri oó', «Mukuú de'emaaká' slaqsoó ngur qoomees a umós? Nee gár ngir slaqamis a milá? 32Nee a slaqamís nee na/aá naa iwiitiye' dír boo/aay, ti didá' wa ateetiná' ta kaahi,
‹Filiímbi ngiwa ufaahhaán, aga neti'iiká,
tawa tsuunqumisaán, aga /aa/i'iiká.›
33Asma Yohánedá' Baatimaamiís niwa hardáh, i mikaátér /ayiiká, tam difaái ga wahahanká, kuungá' a kata', ‹Neetlaame gwaa eér.› 34Garmoó Hee niwa hardáh, i /ayín nee i wahán, kuungá' a kata', ‹Ga/aawaagáy, hheehhusmoowí nee xuufutusmo, mulqumoó ohomuusér koódi nee tlakuuse.› 35Ala sagalooár Mungú adór tar ló' kingina laqán nee mukdá' sleémeero gaa ya/an.»
Yesu iwa dír doó Simoniduú Farisayo
36Heeko wák oo Farisayo Yesu guna dah'ís, iwa dír do'ós wa /ayin. Iri dáh baraá doó heedaáduú Farisayo, iri iwiít dír muruú /ayma. 37/Ameenirka wák ar baraá gixsadá' ar tlakuso'o, ngiwa axás adór ir dír /aymárí dirii'i baraá doó heedaáduú Farisayo, chupiito'ór mooyaangw ar taa tleéhh ar tleeír ta bay Alabasta ngina húp, 38iri alaá Yésú ii sihhít dír ya'aawós, i /aa/amiín. I hhirhheeraá paahhamís gawaá ya'aá Yesu, nee gi se'éngw sagós ar fitsít. I ya'aá Yésú slikiín ar mooyaangw, gi hara ma'amís. 39Heedaáduú Farisayo oo Yesu gwaa dír do'ós i dah'ís, adoodá' ngiwa ár, ina baraá muunaáwós i oó', «Heewí geera bar aarusmo, /ameenirí gu kwatimiit gaa tsaáhh adór tar heemá nee a /ameenír adoomá, asma a tlakuso'o.»
40Yesu iri ilawaáts, iri oó', «Símon, gár ni kuúng i ooár wa slaa' i deer.»
Iri oó', «Intsaahhatusámo, ooang.»
41Guri báy, «Heeko wák peésarós kana kiriík nee múk tsár. Oo wák shiliíngi tsiire kooán, kuqá' shiliíngi mibeeri kooán. 42Inooín sleémeero bu'utuwo kuwa harslaaqaát, tsaraawo giri gurtláy. Xáy baraá mukwí tsare heé inós gu ak slaá' a heemá?»
43Simon iri oó', «Án ngi slaá' a kudá' taa peésár úr wa gurtláy.»
Guri báy, «Adoosíng taa ó' i ganá'.» 44Iri warqáy amór /ameenidá', Simoni gway báy, «/Ameenirí a ga/eéra? Án nina baraá do'ók i dáh, kuúng ma'aá ya'aaeé' ngir slawawa/aas ngaa haniská, ala /ameenirí ya'aaeé' ngaa hhirhheeriwós i taxmaamís, giri fíts ar se'éngw sagós. 45Án kuúng iga ma'asiká, ala /ameenirí iimír án niwa dáh, ya'aaeé' gina ló'wa ma'amaamís. 46Kuúng sagw'eé' ugwa di/tár slikiká, ala /ameenirí ya'aaeé' gina mooyángw ar slík. 47Gawaá adoorihe án a kah, sla'aarirós tidá' ur gan laqaqaán as tlakweemaawós awa yaariir kiwa gurtláy. Ala heé taa tlakweemaá niiná wa gurtláy, sla'aarirós ka niina.»
48/Ameenidá' gari báy, «Tlakweemaawók kaa gurtláy.»
49Mukdá' nee inós taa al iwiit dír muruú /ayma, naxés ta baraá muner'ín i axwees ta kaahi, «Inósuuwí a heemá tam iwa tlakweemaá gurtlatlay?»
50Ala Yesu /ameenidá' gari báy, «Haratlintaaoorók iga ba/amís. Tláw ar wayda.»
Currently Selected:
LUKA 7: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
