LUKA 4

Yesu kuwa iiaraa'ár

(Mat 4:1-11; Marko 1:12-13)

1Yesu Qeeruú hhoohhoó' oo Munguhe i haats nay Yordanír wa kií/. Kuri huúw nee Qeeruú hhoohhoó' oo Mungú baraá darma deelo mibeeri tsiyáhh, 2as kuwa iiaraa'ari nee Neetlaangw. Inós i /ayaayinká deeloodá' sleémeerowo. Deeloodá' iwa fák iri qwariít.

3Neetlaangw iri oó', «Kuúng barqo Garmoó Mungú, tlaa/anoowí i ilawatseek, i muruú /ayma tleehhiti.»

4Yesu iri oó', «Kaa gooín, ‹Hee gár ir slafi a muruú /ayma kiloseeká.› »

5Guri gáwtí tsa/aás, waawuti'iima sleémeero gari laqán ar har qoomár niina. 6Neetlaangw iri oó', «Waawuti'iimarí sleémeero nee xirfuuwose ngi kuúngí haniís, asma sleémeero kinga án i haniís, nee án a aleesláw ngiwa haniis dír umuúqo heé ngir sla'a. 7Aníng kuúng bira i tumbarara'át, sleémeero daqaní a tók.»

8Yesu iri oó', «Kaa gooín, ‹Aakoó Munguúwók na sluufmiseek nee ku sagadiyús inós kilós.› »

9Yesu kuri huúw nee Neetlaangw ay Yerusalemu, guri qaás gawaá tsintá Doó Mungú, guri báy, «Kuúng barqo Garmoó Mungú, ti yaamií kwahh, 10asma kaa gooín, ‹Malaykeerós ngi ya/aaw as uwa amohhe'es,› 11nee sleeme kaa gooín,

‹Kuúng u gagát ar dabaaín,

as yaaeerók tlaa/a mingiwa tunqalá/.› »

12Yesu iri oó', «Kaa oó' sleeme, ‹Aakoó Munguúwók mu iiaraa'araar.› »

13Qoomár Neetlaangw Yesu nguwa hhe'eés iiartá umuú adooro, guri ala geexáy.

Yesu gadiyeérós ngiwa iimu/ún baraá Galilayaro

(Mat 4:12-17; Marko 1:14-15)

14Yesu iri kií/ ar /uuruú Qeeruú hhoohhoó' oo Mungú, iri Galilayár káy. Kaangós umuúqo diiro kuri axaás baraá yaamuudae. 15Inós ina baraá maraá saalingw'ín wa intsaahhatimís, kuri diidi'iimiís nee muu sleémeero.

Yesu kuwa Nasaretír wa sií'

(Mat 13:53-58; Marko 6:1-6)

16Yesu iri Nasaretírí tláy amoodá' kuwa ureés. Deelór Sabaátoro iri dáh baraá doó saaliingw adoodá' /iisí i /imaamisi. Iri sihhiít as iwa soomuusi. 17Kuri kitaábuú aarusmo Isáyí haniís. Kitaábu guri gweér, dír aa gweér a dír taa /aymi'iikí gooín,

18«Aako aníng iga Qeeruuwós i haniís,

asma inós aníng iga tsawaár,

Ya/abtór hho' ngiwa alki/iit dír narkuute.

Iga ya/aáw amór múk baraá tseegamo

as kángw gweermor'ín nguwa ooár aw,

nee taampu iwa malé qaytsitiya',

nee kudá' ta slahh'eemisi ngiwa amohhooár i haniis,

19nee kurkú gurtleemuú Aako nguwa oo'.»

20Kitaábu guri tseék, guri ki/ís dír sagadiyusmo inós iri iwiít. Mukdá' sleémeero baraá doó saalíngw i dirií', gár i ooi kari dirós i dán. 21Tidá' i ooár wa slai gari iimu/ún, iri oó', «Tí taa gooín diirihe kari axasé', laarí aa bó/ dirhunge.»

22Axweesantós giri qwal/ás, axweesantá gurtleemu tidá' aa afkósár axweés kari waa/oó/, tay káh, «Kwí a garmoó Yosefuwookáhe?»

23Inós giri báy, «Án ngi slaá' kuungá' daxta i slaqsaywí beerá', ‹Aá qwaslaarámo, ti kilók hungu/us.› Nee sleeme án ngi slaá' i malé beera', ‹Muruudá' sleémeero taa axaasaán kudá' taa baraá Kapernaumúr wa tléhh, tleehheek sleeme diirihe baraá ayaawoge.› » 24Iri oó', «Án a kah, aarusmoó taa ya/án nee múk ayaawós i kaahh.

25«Ala tí a ló' aáng qoomár Eliyawo kwaeeli ki yaariir baraá yaamaá Israeliwo, qoomaadá' tluwaay iwa qwaár kureeraá tám nee slahheeraá lahhoó', giyér ur ina tleér. 26Ala Eliya kwa ya/aawiiká amór heé hatlae, aqo har dír kwaalo'oodár Sarefati ar baraá yaamaá Sidoni. 27Slám malé alé múk tiqtír tsatmit ku úr baraá yaamaá Israeliwo qoomár aarusmo Elishawo, ala oo taa hungu/uús i kaahh, aqo har Na'amani, heé yaamaá Shamu.»

28Múk baraá doó saalíngw i dirií' adoorí kawa axaás sleémeero tari buúhh. 29Tari tláy, kuri duúx baraá gixsaro, kuri gawaá kaankír tloomár i huúw, tloomadá' taa gixsar'ín i tleéhh, as kuwa yaamií kwahhi. 30Ala inós ina baraá tla/angw'ín ar waaraáhh, iri tláy.

Heeko neetlaame aa eér

(Marko 1:21-28)

31Yesu iri aweér ay Kapernaumu, gixsár yaamaá Galilaya, giri intsaahhatimís deelór Sabaátoro. 32Intsaahhatisarós kari ló'wa waa/oó/, asma axweesantós i aleesleemuú koón. 33Baraá do'duú saaliingo heeko neetlaame aa eér i deer. Ina tseé' ar afór ur, iri oó', 34«Ahaá, Yesú Nasareti atén nee kuúng a milá? Nina hardáti as atén tiwa qwaares? Án kuúng u xuú' adór tar Kudá' hhoohhoó' oo Mungú.»

35Yesu neetlaameedá' gari iigahhaát iri oó', «Xasliité', ti'iité'.» Neetlaameedá' heedaádá' guri baraá tla/angw'ín i dáhh, guri geemeér, gwa slahh'eesiiká.

36Sleémeero tari waa/oó/, tiri i axweesiyé' tawa kaahi, «Kaangwí a milá? Baré ar aleesleemu nee /uuruuwo neetlaame birnga iigahhaát, aqo in qútl.» 37Kaangós iri tsiyaayaaxaát umuúqo diiro baraá yaamuudae.

Yesu múk yaariír nguwa hungu/uumiís

(Mat 8:14-17; Marko 1:29-34)

38Yesu iri tláy dír do'duú saaliingo, iri hardáh dír doó Simon. Aayór harér Simon naxés i ló'wa tíq ga/atanto. Yesu kuri firín as aayoodá' ngiwa hungu/uusi. 39Iri dír bihhaá aayoodá' ii sihhiít, ga/atani gari iigahhaát, iri hungú/. Inós iri gaanslár tleér, giri sagadiyús.

40Looa iwa dát, muu sleémeero oo tiqtír dimbadimbé koóm, kunguri huúw nee muk'ín dír Yesu. Yesu dabaawós giri qaás gawaá umuúqo tiqtusmoowo, giri hungu/uumiís. 41Múk yaariír sleeme neetlaame guri gimeér, ta tseeamín ta kaahi, «Kuúng a Garmoó Mungú.»

Yesu giri iigahhamiít asma matawa kumiít tawa axweesi, asma ka xuu' adór inós tar Kristo.

Yesu iwa Ya/abtór hhó' alki/ituú áy

(Marko 1:35-39)

42Looa niwa tleér, Yesu iri quútl amór muu iwa kahhi. Boo/aay guri leelehhiít. Tari amoorós i hardáh kuri iimu/ún ila/aango as miwa quútl dir'ine. 43Giri báy, «Aníng gár tiwa hariím a Ya/abtór hho' ar waawuti'iimár Mungú an alki/iít baraá gixsadaá hatlae sleeme, asma an gár án tisa ya/aáw.»

44Ya/abtór hho' gari alki/iít baraá maraá saaliingw awa yaamaá Galilaya.

Currently Selected:

LUKA 4: IRQW

Highlight

Copy