LUKA 21

Ilahhooár kwaalo'o

(Marko 12:41-44)

1Yesu iwa qaytsiít, daqaare gari ár iwa ilahhooar'ín qamiin baraá sandakmoó ilahhooa. 2Kwaalo'orkar narkuto'o sleeme gari ár, senti tsár ngiwa baraadí qás. 3Iri oó', «Ar ló', án a kah, kwaalo'orqá' ar narkuto'o hariímár aa qás ka ló'wa ur mukquú hatlá' sleémeero ba/a. 4Asma inooín sleémeero peésár taa qamín a tidá' aa met dír afer'ine, ala kwaalo'oorír narkuto'o tidá' sleémeero i koon gana qás.»

Yesu fee/ár Doó Mungú ngiwa geerií oó'

(Mat 24:1-2; Marko 13:1-2)

5Muu kángw Doó Mungú guna axweés, adór kura tleéhh nee kura parootuús ar tlaa/aá hhohho', nee ar ilahhooadaádá' taa amór Mungú i hanmiís. Yesu iri oó', 6«Tí sleémeero ta ga/eera', deeloorós i xeér tam tlaa/anoó gawaá kuqií meét iwa kahhi oo ta fee/iiká.»

Iimu/úngw slahh'amu

(Mat 24:3-14; Marko 13:3-13)

7Yesu kuri yaahaás, kuri báy, «Intsaahhatusámo, muruuwí xaylá i tleehharuuti? Nee qoomár muruuwí birna tseewúy, layár kur tsaahhaan a gaalá?»

8Iri oó', «Ti haramagahhe', mutunduwa al/aáy. Asma múk yaariír ni hardah tiwa umuueénár ateetin, tawa kaahi, ‹Aníng a Kristo›, nee tawa kaahi, ‹Qooma naa tseewuúr›. Ala mi eehaarara'. 9Qoomár kuungá' kángw slaqwara nee gila bura axasé', ma da'ayuutara', asma tí niqo geerií hardát, ala alhhe'eesaay ni gaanslár hardihiiká.»

10Aluuwo giri báy, «Xooro i slaqwarár eér amór xoororqá', nee waawuti'iima i slaqwarár eér amór waawuti'iimár hatlá'. 11Kunseeloó yaariír ni ti'iit baraá yaamuwo. Nee baraá yaamaá dimbadimbehe giyeé ni tleér, nee tiqtír pu/i ni hardát. Muruú dae tlaáq i tleehharuut nee tlehhema'aá waa/oo/amo, awa gawaá dooraá dahhá' i aandá'. 12Ala dír muruuwí sleémeero ira tleehharuutiiká, muu kuungá' nu uhín nee nu slahh'eemiis. Inooín nun huwiyá' amór maraá saaliingw, asma tunduwa sakwasleemuuti, nee tunduwa tsegiiti. Tundu geeraá waawitá i huuw, nee geeraá ga/awuuse, as aníng. 13Gaarí an pa/angwhúng oo aníng ir dir'íní lamabu'uunda'. 14Ala kuungá' baraá munerhunge gár ta oa' ma geerií amohhe'eemisaara'.› 15Asma aníng /ayma'aá sagalooa ngi haniís, awa ta oa', tam wakuuserhúng sleémeero kuungá' tlaampa'aasaro nuy aleesleeraaká, nee sleeme axweesantahúng kay si'iiká. 16Kuungá' tundu sakii/ nee xwaylitérhúng nee hhaeehúng, nee mar'eefoohúng, nee mulqerhúng. Kuungá' bahh'alé tundu tsuu/ nee inooín. 17Kuungá' tundu aahh nee muu sleémeero as aníng. 18Ala tam se'eemír wák ar gawaá sagerhúng ar tawo qwaar i káhh. 19Kuungá' bara qiqtlatliindé', a ba/aandá'.»

Yesu fee/ár Yerusalemu ngiwa geerií oó'

(Mat 24:15-21; Marko 13:14-19)

20«Qoomár bar gixsár Yerusalemu aga aandé', kaa harweér nee múk slaqwara, daqaní ka tsahhá' adór deelór hhaamiisarós nira tseewuúr. 21Qoomaadae múk baraá yaamaá Yudea aqo tan gawaá tlom'í ti'i'ín, nee kudá' baraá gixsár i diriiá' ta tsee/áy gowi, nee kudá' baraá qamií diriiá' matawa dáh baraá gixsa. 22As deeloorí tawa deelór li/aay, as tidá' taa gooín sleémeero iwa bo/. 23/Ameenár tsiihaawe nee ar na/aá ninakw gi koom qoomaadae, a tsaxwaaín. Asma qoomaadae slahh'amuú úr i deer baraá yaamuudae, nee Mungú sakwasleemarós ga boo/ees daanduú xooroorihe. 24Inooín ki tsuu/ ar paánga, kiri lohatis baraá yaamuuine, kay huuw baraá xoordaá dimbadimbé. Gixsár Yerusalemu kay i iwiit nee xoordaá hatlá' ay dír qoomár xoordu i bo/.»

Hardahamuú Garmoó Hee

(Mat 24:29-31; Marko 13:24-27)

25«Qoomaadae laya kingi laqán ar gawaá tsee/amá, nee slahhaangw nee tsetse/. Nee baraá yaamuwo muu i baraá slahh'amuú yaariír i dirii', ta baraá daér yaariír i dirii', asma adoodá' tlawi iwa amoqwaqwadiin. 26Muu iri ló'wa slar/amiit daeero, tari amoqwaqwadín, as adoodá' yaamu i laqiya'. Asma qoomaadae doori i dingitiyá'. 27Aluuwo Garmoó Hee kuri ar niwa hardihi ar /uuruuwós nee xirfuú yaariír. 28Gimsé', kaangwí barnaxes naa iimu/ún, ta magahhá', ti amohhe'ese', asma qoomaadae gweermorhúng naa tseewuúr.»

Intsaahhatisár slaqsoó /aantsí

(Mat 24:32-35; Marko 13:28-31)

29Giri slaqsaywí báy, «Xa'anoó /aantsí ga/aawaak, nee xaa'aá hatlá' sleémeerowo. 30Xaaiiká' barnaxes loo/or'ín aa páhh nee ar /aben niri harmá/, an tsahhá' adór qoomár tluwaay niwa hardihi nira tseewuúr. 31Adoorihe muruuwí sleémeero bura aandé' naxes naa iimu/ún, tsaahhaagáy adór waawuti'iimár Mungú kar tseew.

32«Án a kah, muruuwí sleémeero i boo/ dír mukuú qartí ir kumiiti. 33Doori nee yaamu i waarahhiyá', ala axweesante'eé' i baloó waarahhká.»

Dala'ame

34«Ti harmagahhe', munerhúng miwa hhitirút ar hheehha, nee xufta, nee ma daawimitaara' as muruú baraakaá yaamu, deeloodár alhhe'eesaay munduwa hhaawís adór tsaaxweeli ir ohaahiin. 35Asma deeloodá' niqo hardát dír umuúqo heewo baraá yaamu sleémeerowo. 36Dalaaé', fiririimé' deelo sleémeero, as /uuru kuwa sleera', oo tí sleémeero hardah kawarar ba/a', nee tawa geeraá Garmoó Heé i sihhita'.»

37Deeloodae Yesu in intsaahhatimamis baraá Doó Mungú wa ale qoomár tlaatla/aango. Nee xweeraawo in qatuú aa'áy gawaá tloomár xaaiikaari ta bay seituúni. 38Muu sleémeero matlaatleero tan tseewa tlaatláy, as axweesantós kawa axamiisuú ay baraá Doó Mungú.

Currently Selected:

LUKA 21: IRQW

Highlight

Copy