YOHANE 4
4
Yesu nee /ameenír Samaria
1Yesu gay tsaáhh adór múk Farisayo ngira axaás gídaabá, Yesu eeharuusér yaariir gaa sláy ta Yohanewo, nee giri baatimiís. 2(Ala Yesu inósuú kilá' aa baatimiisiiká, eeharuuse ina baatimís). 3Yesu adoodá' ngiwa tsaáhh, yaamaá Yudea gay geexáy, iri malé tláy ay yaamaá Galilaya. 4Iri waaraáhh ar tla/ángw Samaria asma adór yaamuudá' ooharo ngir may i káhh.
5Iri hardáh dír gixsár Samaria ar ta bay Sikari, bihhaá qaymoodá' Yakobo aa garmaawós Yosefú i haniís. 6Hhalángw Yakobo i didií dirii'. Yesu iwa slaaqaát aaiiwo, iri dír afaá hhalangwdií iwiít. Qoomaadá' a looár lahhoó'.
7/Ameenirkar Samaria niri hhék. Yesu gari báy, «Ma'aá wahaango qawáng.» 8Siiwadae eeharuuseerós aa muruú /aymár tlaxór eér baraá gixsa.
9/Ameenidár Samaria guri beér, «Adór kuúng heé Yahudi ma'aay ngir aní firiin, aníng bar /ameenír Samaria?» (Asma múk Yahudi nee oo Samaria ti haradaafiaaká).
10Yesu gari báy, «Kiíng geera bar gurtleemuú Mungú ugwa xú', slám geera heewí kiíng i babáw, ‹Ma'aá wahaango qawáng,› bura xú', geera alók inós ugwa firiín, inós geera ma'aá slafíngw koomá' ngi haniis.»
11/Ameenidá' guri beér, «Aáko, gár ma'aay kir iihhek a koondaaká, slám hhalaangw ku saáw. Daxta kuúng ma'aá slafíngw koomá' dír kiwa sleer a diimá? 12Ahaá, kuúng tu ak úre ta baabuúrén Yakobowo, kudá' hhalaangwí ngwa dirénií haniis, inósuú kilá' ma'aá hhalaangwí gina /aáy, nee na/iiwós nee hikwaawose?»
13Yesu gari báy, «Umuúqo heewo oo ma'ayká' gi wahaám, i malé waxiit. 14Ala umuúqo heewo oo ma'ayká' aníng ni haniis gi wáh, i baloó waxiitiiká. Asma ma'aydá' án ni haniis ni kutltá ma'aá slafiingw tleehhitiyá', niri baraawós wa ti'imiitiyá', slafíngw alhhe'eesay wásl nguri huwiyá'.»
15/Ameenidá' guri beér, «Aáko, ma'aysíng haniisang, as kahhó' aníng mawa baloó waxiít, tam mawa sangw malé hheék.»
16Yesu gari báy, «Tláw, hhawaatuuwók ateetang, ni diirí hardatá' nee inós.»
17/Ameenidá' Yesu guri beér, «Hhawaata u koomaaká.»
Yesu gari báy, «Adoosíng taa ó' i qoón, tawa kat, ‹Hhawaata u koomaaká.› 18Asma hhawaataá iga duxuutiye' a kooán. Nee kwisíng hám ta koon a hhawaatuuwogeeká. Adoosíng taa ó' ar ló'.»
19/Ameenidá' guri beér, «Aáko, án kuúng ugwa tsaáhh adór kuúng tar aarusmo. 20Baabi'iirén Mungú nguna sluufmiisiyé' gawaá tloomarí wa ale, ala kuungá' a kata' Yerusalemu an dír Mungú iwa harin sluufmisuuwo.»
21Yesu gari báy, «Aáyo, tí ni kah haratlintieek, Qooma ni hardát, ar Baabá kuwa sluufmisa'aaká gawaá tloomarí wa ale, laqaá baraá Yerusalemu. 22Kuungá' oo ta sluufmisa' u xua'aaká. Ala atén Mungú ta sluufmisaan u xuaán. Asma ba/ama amór ni dahh a amór múk Yahudi. 23Ala qooma i hardát, nee hám naa hardát, ar mukdá' sluufmiís ló' wa ale, Baabá kuwa sluufmiisi ar qeeru nee looeema, asma Baabá múk adór kwí gu leelehhiit oo gu sluufmiís. 24Mungú a qeeru, nee mukdá' inós gu sluufmiís, gár kuwa hariím a kun sluufmiis ar baraá qeeru nee looeema.»
25/Ameenidá' Yesu guri beér, «Aníng a xuú' adór Masihi nir hardáh, kudá' ta bay Kristo. Qoomár inós binda hardáh, mura' sleémeero ngu dirén i alki/iit.»
26Yesu gari báy, «Anuúwí nee kiíng axweesá' an inós.»
27Qoomaadár kilae eeharuuseerós niri hardát, naxés nee /ameeni tawa axweesi tari waa/oó/. Ala heé gwa yaahaas i kaahh, iwa ooi, «Ma slá'?» laqaá, «Mas axwesá' nee inós?»
28Ala /ameenidá' sirwirós gay geexeér, iri tleér baraá gixsa, muu guri beér, 29«Qwalaasé', heewí artá awaare', oo muruueé' sleémeero naa tleéhh ngwa oo'. Xaysé', heewí a Kristowookáhe?» 30Muu nay ti'iít baraá gixsár wa ale, kuri i daqáy.
31Qoomár muu iwa hi'iiti, eeharuuseerós guna harhheehhe'eemís guri beér, «Intsaahhatusámo, ala /ayiím.»
32Yesu giri báy, «Aníng muruú /aymár kuungá' ta xua'aaká u koóm.»
33Eeharuuse iri kilooín axwés iwa kat, «Heé gwa muruú /aymár i huuw in deéro?»
34Yesu giri báy, «Muruú /aymar'eé' a kwí, sla'aarír kudá' aníng iga ya/aaw an tleéhh, as gadiyeérós ngiwa alhhe'ees. 35Kuungá' a kata'aakáhe, ‹Slahheeri naa meetiyé' a tsiyáhh, daqaní bu'uungw aa xáy.› Ala án a kah, baraá qamu i qaytsitaak, ki aandá' adór nira /awaakuyé', bu'uungo a ido. 36Heé bu'úngw aa'áw bu'utu gu sláy, balaangw guri burumbuur. Bu'uungwí an mukdá' slafíngw alhhe'eesay wásl gu sláw. Gawaá adoorihe heé aa dahaasin nee oo aa bu'un ta al qwalalaa/. 37Asma /aymuuwí daqaní a ló', ‹Heeko in dahaasín, kuqá' iri bu'ún.› 38Aníng nuna ya/aáw kawa bu'uunda' tidá' tasa daawimiti'iiká, bartaka ina daawimít, kuungá' daawitamer'ín aga i daté'.»
39Baraá gixsadae múk yaariír oo Samaria Yesu guri haratlintií', asma axweesantadá' /ameenidá' iwa ó', «Muruú aníng naa tleéhh sleémeero inós nguna oó'.» 40Mukduú Samaria iri daqáy amór Yesu, kuri harhheehhe'eés iwa ayaaíní deeli. Inós iri amoodií tlaatla/iít deelo tsare.
41Múk yaariír iri doogín oo gwa haratlintii' asma axweesantós. 42/Ameenidá' kari báy, «Daxta aga haratlintiaán as axweesantók kiloseeká, asma ataá kilá' aga axaasaán, slám aga xuaán adór kwí tar ba/amusmoó muu.»
Yesu garmoó geeraharusmooko nguwa hungu/uús
43Alaá deeloodá' tsare iri tláy didae ay Galilaya. 44Asma Yesu inósuú kilá' gana lamabu'ún adór aarusmo kur ilaiwawa/iiká baraá ayaawósuú kilae. 45Yesu iwa Galiláyár i hardáh, múk Galilaya guri ilaóh asma tlehhemi'iiwós sleémeero, kudá' aa tleéhh Yerusalemuwo kaa ár, qoomár deelór ure. Asma mukwí sleeme i baraadií dirii' bál deelór ure.
46Naagáy iri hardáh malé alé baraá gixsár Kanár Galilaya, didaádá' ma'aay ngiwa difaái tleéhh. Nee geeraharusmooko i deer oo na/aywós amór Kapernaumúr wa tiíq. 47Heewí ngiwa axaás adór Yesu nira amór yaamaá Galilayár i hardáh i yaamaá Yahudeár daahh, guri i daqáy, guri harhheehhe'eés tiwa kona', as na/aywós nguwa hungu/uusi, asma i afkú bohoóngwí dirii'. 48Aluuwo Yesu iri oó', «Bar laya nee waa/oo/amo aga aandi'iiká a haratlintia'aakáhe ló'wa ale?»
49Geeraharusmoodá' iri oó', «Aáko, qwaláng dír na/ay'eé' ira gwaaiiká.»
50Yesu iri oó', «Tláw, na/aywók i slaaf.»
Heedaádá' axweesantadá' kwaa báy nee Yesu, gari haratlintií', iri tláy. 51Qoomár iwa laweei, lawaaleerós guri al'eér, kuri báy, «Na/aywók i slaaf.»
52Qoomár iwa hunguú/ gari yaahaás. Inooín kuri báy, «/Isá' looár faanqwe ga/atani guna geemeér.» 53Baabá gari tsaáhh adór tar siiwadaádár kilá' inós kuwa báy nee Yesu, «Na/aywók i slaaf.» Inós nee múk do'ose Yesu kuri haratlintií'.
54Gaarí a layár tsár ar Yesu aa tleéhh qoomár iwa yaamaá Yudeár dahhi, iwa Galilayár i hardáh.
Currently Selected:
YOHANE 4: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
