YOHANE 16

1«/Aymi'iiká' ngina dirhúng i oó' as kuungá' mutunduwa gee/aásl tari alií ki/á'. 2Kuungá' tundu baynitis dír maraá saalingo. Slám qooma i hardát ar umuúqo heewo oo kuungá' nu tsuú/, ngiwa xui i Munguú sagadiyuus. 3Adoorí kan tlehhiit asma Baabá kuwa xuiiká, nee aníng sleeme ti xuiiká. 4Ala án tí ngina dirhúng i oó' as kahhó' qoomaadá' bira xeér, kuungá' tí ka insleerá' asma ngaa geerií oó'.»

Gadiyér Qeeruú hhoohhoó' oo Mungú

«Tí iimu/uungo gár ngisa ooiiká, asma án nee kuungá' a dinkwa. 5Ala án hám daxta a tláw amór kudá' aníng iga ya/aaw. Slám dirhunge heé aníng i yaahamiís i kaahh oo káh, ‹Amór ta keer a amá?› 6Ala munerhúng gurhaamiro aa háts asma tí án naa dirhúng i oó'. 7Ala ar aníng ni dirhúng i oo' ar ló', ‹Dirhunge a tsiní án barnaxes aga tláw. Asma aníng bara tlawiiká, Alee/isusmo i amorhúngí hardihiiká. Ala bar án aga tláw, án ngu amorhúngií ya/aáw.› 8Nee Alee/isusmoodá' birna hardáh, inós kángw tlakweema nee gan'amu, nee sakwasleema gun dír múk i gwa/atis. 9Daanduú tlakweemaawo, asma án ti haratlintati'iiká, 10nee daanduú gan'amuuwo, asma aníng a tláw amór Baabá nee slám i aanda'aaká. 11Daanduú sakwasleemaro asma kudaádá' úr oo yaamu kwaa qaroó sakwasleemuút.

12«Tam hamí /ayma'aá yaariir i koóm, awa ni kuungá' i oiim, ala kuungá' i aleesleera'aaká hamí. 13Ala Qeeruuduú looeema bar inós naa hardáh, kuungá' nu gan'aas baraá looeema sleémeero, asma ar i axweesi a toseeká, ala sleémeero tidá' i axaasi gan oo', nee muruudá' aluúwaá hardaha nu xu'utis. 14Inós aníng i xirfayees, asma tidá' i dir'eé' wa slay, ngin dirhúngí oo'. 15Muruudá' sleémeero Baabá i kon a kwe'eé'. An gár nisa oó', inós tidá' i dir'eé' wa slay ngin dirhúngí oo'.»

Gurhaami nee qwala/

16«Alaá deelór niina bira waaráhh, án kuungá' i aanda'aaká. Nee slám alaá deelór niina bira malé waaráhh, án kuungá' i aandá'.»

17Bahh'alé baraá eeharuuseerose tiri kilooín yaahamisiyé', «Axweesanaywí a milá iwa kaahi, ‹Alaá deelór niina bira waaráhh, án kuungá' i aanda'aaká. Nee slám alaá deelór niina bira malé waaráhh, án kuungá' i aandá'.› Nee ar iwa kaahi, ‹Asma aníng a tláw amór Baabá.› » 18Tari káh, «Gídaabárós a milá, tí iwa kaahi, ‹Alaá deelór niina.› Gár i axweesi a tsatsahhaamanaaká.»

19Yesu gari tsaáhh adór eeharuuseerós ngur yaahaasár wa slá', gari báy, «Gár tiwa yaahamisa' a tidá' nuwa báwi, ‹Alaá deelór niina bira waaráhh, án kuungá' i aanda'aaká, nee slám alaá deelór niina bira malé waaráhh, án kuungá' i malé aandá'.› 20Án a kah, kuungá' a /a/á', nee tay tsuunqumisá', ala múk aa haratlintii'iiká iri qwalaa/. Kuungá' tay gurhaamutá', ala gurhaamirhúng i warqeér tawa qwala/. 21/Ameeni in gurhaamút deelór xwaylarós binda xeér, asma slahh'amuuduú siiwár xwayla. Ala bira xwayluúr, slahh'amaayeedá' ga insleeraaká, asma qwal/uudá' na/aay kuwa sláy baraá yaamuwo. 22Ala dirhunge a adoorí sleeme, a gurhaamutá', ala án kuungá' nu malé ár, nee munerhúng iri qwalá/, nee qwal/uuhúng heé gu hingeés i kaahh.

23«Slám baldá' gár iwa yaahasa' i káhh. Ar ló' án a kah, Baabá bura firiindé' umuúqo gaaro, inós ngi haniis ar umuueé'. 24Ay hamí gár taa firiindé' i káhh ar umuueé'. Fiririimé', a sleerá', as qwal/uuhúng iwa boo/i.»

Aníng yaamu iga ar baá/

25«Muruuwí nguna dirhúngí oó' ar slaqsi'i. Ala qooma i hardát ar aníng niwa baloó dirhúngí ilawatsaaká ar slaqsi'i. Ala kángw Baabá ngun dirhúng i alki/iít ar geehhoeema. 26Baldá' a firiindá' ar umuueé', slám nu bawaaká aníng nu aleefiriím dír Baabahe. 27Asma Baabá inósuú kilá' kuungá' nu slaa', asma án kuungá' i sla'á', nee kari haratlintié' adór aníng nir amór Baabá daáhh. 28Aníng an amór Baabá daáhh, nay baraaká' yaamií hardáh, slám án daxta yaamu i geexáw, nay tláw amór Baabá.»

29Eeharuuseerós guri beér, «Ga/aaweegáy, daxta a axwés ar adór geehhoo', slám a axweská ar slaqsi'i. 30Atén aga xuaán adór mura' sleémeero kuúng kur xú', nee slám gaa i káhh ar hee kuúng uwa yaahasi. Gawaá adoorihe aga haratlintiaán adór kuúng tar amór Mungú dáhh.»

31Yesu giri báy, «Daxta aga haratlinti'í'i? 32Ga/aawaagáy, qooma i hardát, slám qooma naa qaroó hardát, ar kuungá' sleémeero tawa diyaya/ata', umuú heewo amoorós, nee aníng iri kilooeé' geexeerá'. Ala aníng a kilooeeneeká, asma Baabá nee aníng a dinkwa. 33Tí án ngina kuungá' báw, as wayda kuwa sleera' baraaeene. Baraaká' yaamuwo slahh'amu u sleerá'. Ala ma mune siaara', asma aníng yaamu iga ar baá/.»

Currently Selected:

YOHANE 16: IRQW

Highlight

Copy