YOHANE 14
14
Yesu a loohír amór Baabá kaw
1«Ma amoqwaqwadiimara' baraá munerhunge. Kuungá' Mungú ugwa haratlintié', án na haratlintiaré' sleeme. 2Dír doó Baabuúeene hotángw yaariír i deer. Geera bar adooriheeká, án kuungá' naa ádbáw. Asma án hám a tláw, hotangwhúng nguwa amohhe'eesár aw. 3Án bara tláw, barnaxes hotangwhúng ngwa amohhe'eés, ni malé kií/ as nuwa amor'eé' dahi'is, as didaádá' án ni dirii', masók kuungá' a deer. 4Nee loohír amoodá' án ni kaw kuungá' a xuá'.»
5Tomas iri oó', «Aáko, atén amór kuúng ta keer a xuanaaká, nee atén loohi adór kar xuaan?»
6Yesu iri oó', «Aníng an loohi nee looeema nee slafiingw. Heé naa dir'ér oohiiká, i amór Baabá i hardihiiká. 7Asma aníng bira xué', Baabá geera ugwa xué'. Iimír hamí u xuá', slám ugwa aandé'.»
8Filipo iri oó', «Aáko, Baabá na diréní laqaamang, daqaní atene a ido.»
9Yesu iri oó', «Án nee kuungá' ana alhootatimaán deeloorí yaariire, án kuúng i xu'ukáhe, Filípo? Heé aníng iga ar, Baabá gwa ár. Ala kuúng mas kat, ‹Baabá laqaamang?› 10Kuúng aga haratlintiakáhe adór aníng tar baraá Baabá, nee Baabá ir baraaeé'? Axweesanaywí ni kuungá' i kah, u kahaaká ar aleesleemuueé'. Ala Baabuúdá' baraaeé' i dirií', in gadiyeérós tleehh. 11Án na haratlintiiaré' adór aníng tar baraá Baabá, nee Baabá ir baraaeé'. Ala bar kuungá' a haratlintatia'aaká, haratlintiaak as tlehhemi'iiká'. 12Án a kah, kudá' aníng iga haratlintii', tlehhemi'iiká' án ni tlehhiit, inós sleeme gi tleehh, nee tam tlehhema'aá ak uren gi tleehh, asma aníng a tláw amór Baabá. 13Nee umuúqo gár kuungá' ta fiririinda'a ar umuueé', án ngi tleéhh, as Baabá iwa xirfuuti ar baraá Garma. 14Umuúqo gaaro bar aga firiindé' ar umuueé', aníng ngi tleéhh.»
Al'axweesantá hardahamuú Qeeruú hhoohhoó' oo Mungú
15«Án bira slaé', hara'ayar'eé' a otá'. 16Án Baabá u firiím, nee inós alee/isusmoó hatlá' ngu haniis as iwa dirhúng wa hooti ay alhhe'eesay wasle. 17Inós a Qeeruú looeema. Múk aa haratlintii'iiká Qeeruuwí gu ara'ariiká, slám gu tsatsahhanká. Gawaá adoorihe ilaooharo ku aleeslayká. Ala kuungá' u xuá', asma i dirhúngií dirii', nee iri baraahúng wá hoot.
18«Án kuungá' nu panáy geexawaaká. Ni amorhúng i hardáh. 19Deelór aa met ka ureeká, aníng múk aa haratlintii'iiká i malé ariiká, ala án kuungá' i aandá', asma án a slaáf, nee kuungá' a slafá'. 20Baldá' kuungá' a tsahhá' adór aníng tar baraá Baabá, nee kuungá' tar baraaeé', nee án tar baraahúng.
21«Heé hara'ayar'eé' ga koóm, nee gaa oh, inós an kudá' aníng i slaá'. Nee heedá' aníng i slaá', inós sleeme ku slaa' nee Baabuúeé'. Nee án sleeme heedaádá' u slaá', nee tiri dirósí geehhoeés.»
22Yudaduú Iskariotiwooká iri oó', «Aáko, ahaá adór kuúng tir diréní geehhoatis a adoomá, ala misti geehhoatiská dír múk aa haratlintii'iiká?»
23Yesu iri oó', «Hee bar aníng i slaa', axweesante'eé' ga oh, nee inós kway slaa' nee Baabuúeé'. Aníng nee Baabuúeé' nay hardahaán amoorós, hootaarén kiri baraawósí tleehhaán. 24Heé aníng i sla'aaká, axweesanay'eé' gu oohiiká, nee slám axweesanaywí ta axamisa' a kwe'eeneeká, ala oo Baabuúdá' án iga ya/aaw.
25«Tí ngina dirhúngí oó', qoomaarí niwa dirhúng i kaahh. 26Ala alee/isusmoodá', ta bay Qeeruú hhoohhoó' oo Mungú, kudá' Baabá ni ya/aawi ar umuueé', kuungá' nun intsaahhatimis baraá umuúqo gaaro, slám tidá' sleémeero án naa kuungá' bawi nuri inslawtimis.
27«Wayda ngu kuungá' i geexáw, wayduueé' ngun haniís. Wayduudá' aníng ni hanmiis, a adór wayduuduú mukwí oo baraaká' yaamu ni hanmiisiiká. Ma amoqwaqwadiimara' baraá munerhunge, slám ma da'ayumitaara'. 28Aga axasé' tidá' kuungá' nuwa báw, ‹Aníng a tláw, slám ni malé kií/ amorhúng i alé.› Geera bar aníng iga slaé', alók aga qwala/é' asma a tláw amór Baabá. Asma Baabá ku úr ta aninge. 29Tí ngina iimír hamí wa oó', qoomár iwa tleehharutiká, as kahhó' qoomár bira tleehharút, masók an haratlintiá'. 30Axweesantá yaariir ar ni dirhúng i malé oo' i káhh, asma heé úr oo yaamuuká' i hi'iit. Ala inós gár i aleeslay i káhh dir'eene. 31Ala tí in tleehharút as muu ngiwa tsaahhi adór án Baabá ngur slaá', nee tidá' Baabá naa hara'ayín an tleéhh.
«Gawaá adoorihe, sihhiitaré', quutlaré', diirí geexaware'.»
Currently Selected:
YOHANE 14: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
