IIMU/UUNGW 9

Alqadór Mungú nee Noa

1Aakoó Mungú Noa guri tsuúq, nee daaqaywose, giri báy, «Laqwaalé', doogaagimé', yaamu hatsiisaak. 2Umuúqo makiito'ór baraá yaamu, umuúqo tsir/ór tlatlaawa gáwtí alé, dinkwa nee umuúqo gár gurúr hi'iimita, nee siyó sleémeero oo baraá tlawi kuungá' nun da'ayumiitiyá'. Muruuwí sleémeero kunga qaás gawaá dabaahúng i alé. 3Muruuwí slaáf sleémeero daxta a muruú /aymarhúng. Nguna haniís adoodá' umuúqo gár naa ti'it baraá yaamuwo ngira haniís as tawa muruú /aymarhúng. 4Ala fu'unaá tseerer'ín aa ti'itká mi /ayaara', asma slafiingw dír i dirii'i a baraá tseere. 5Aníng tseererhúng a li/aay buú'. Hee bar hee ngwa gaás, aníng heedá' u gaás sleeme. Laqaá tam makiito'o hee burngwa gás, aníng inós a gaás sleeme.

6Heé tseerér hee gaa ku'uus,

tseereerós sleeme kan ku'uus nee hee,

asma Mungú hee guna tleéhh

ar slaqsaywós.»

7«Kuungá' laqwaalé', doogaagimé', laqwaalé' ló'wa ale, yaamu ki hatsiisá'.»

8Mungú Noa nee daaqaywós gina báy, 9«Ga/aawaak, aníng hamí alqador'eé' ngi kuungáí haniís, nee xwaylarhúng. 10Slám nee umuúqo gár slafa, tsir/o nee makaá ta de'ena nee makaá sla/ato, kudá' sleémeero nee kuungá' naa alti'ite' baraá miringamoó wa alé. 11Aníng alqador'eé' an gawdeés dirhunge, ar aníng muruú slaáf sleémeero nguwa baloó qwaareesaaká ar tluwoó da/tén, tam tluwoó da/tén oo adór kwí i baloó ki/iiká yaamu ngiwa hhitin.» 12Nee Mungú iri oó', «Gaarí an layár alqador'eé' ar aníng ni haniis dír kuungá' nee umuúqo gár slafa ar nee kuungá' alhootá' qari sleémeero ay kureeraá kureér. 13Aníng ga/aleerí an qaás gawaá huunkáy alé, daqaní a layár alqador'eé' tidá' naa tleéhh nee yaamu nee umuúqo gár baraá yaamií diriia. 14Qoomár aníng yaamu bira tuuntuúk ar huunkáy, nee ga/aleerí bira geehhouúr gawaá huunkayhe, 15aníng alqador'eé' an insláw, tidá' naa haniís dír kuungá' nee umuúqo gár slafa. Ala tluwoó da/tén i baloó tluwiiká as umuúqo gár slaaf ngiwa hhitin. 16Qoomár ga/aleerí gawaá huunkáy i dirii', bara ár, aníng alqador'eé' tidá' alhhe'eesay wasl an insláw, tidá' naa tleéhh nee muruú slaáf sleémeero oo baraá yaamií dirií'.» 17Mungú Noa guri báy, «Gaarí an layár alqador'eé' ar naa tleéhh nee muruú slaáf sleémeero kudá' baraá yaamií dirií'.»

Noa nee daaqaywós

18Daaqoó Noa oo naa baraá miringamoó wa ti'iit, a Shemu nee Hamu nee Yafeti. Hamu an baabuú Kana'ani. 19Daaqaywí tamaawo an daaqoó Noa. Xwaylar'ín iri kumít, yaamu niri hatsiyé' muko.

20Noa ina doósl. Inós a heé geera oo xaa'aá sabiíbu gaa dahaas. 21Difaáír sabiíbudá' ngiwa wahán, ina ooniít, tlaba' giri kwaáhh, iri qaát ar /aankwets baraá heémarose. 22Hamu, baabuú Kana'ani, /aankwetsuú baabuúwós guna ár, iri ti'iít, kaangw guri oó' dír hhaeewós kudá' tsár. 23Ala Shemu nee Yafeti inqwaari ngiri tataahhiyé', ngiri qaasiyé' gawaá sum'ii'ín, inooín tsaraawo tari alúr hi'iít, /aankwetsuú baabuúín nguri uuntsuusiyé', slám gitsee/er'ín kana bihhér xu'ús, tam /aankwetsuú baabuúín ngwa ari'iiká. 24Noa oonitimeerós iwa fák, nee kangwdá' garmaawós kudá' niiná aa dirósí tleéhh nguwa xuú', 25iri oó',

«Kana'ani ku lu'usi,

inós a lawaalmoó kilá' oo hhaeewós.»

26Iri malé oó',

«AAKOÓ Mungú, Mungú Shemu i xirfuuti,

nee Kana'ani ta lawaalmoowós.

27Mungú Yafeti ngu ureesi,

nee i baraá heémár Shemu wa hooti,

nee Kana'ani ta lawaalmoowós.»

28Alaá tluuwaydá' da/tene Noa kureeri ngaa hoót a tsiire tám nee mibeeri kooán. 29Deelo sleémeero ar Noa aa hoót a kureeri tsiire gwaleél nee mibeeri kooán, iri gwaá'.

Currently Selected:

IIMU/UUNGW 9: IRQW

Highlight

Copy