IIMU/UUNGW 37

Yosefu nee hhaeewós

1Yakobo ina kumiít hotaango baraá yaamaá Kana'anír wa alé, yaamuudá' Isaka aa hoót adór dahaaymoó wa alé. 2Adoorí an alki/ituú xwaylár Yakobo.

Qoomár Yosefu kureeriiwós tawa mibaá nee faanqw, inós i bee/ángw deaaén nee hhaeewós. Yosefu tawa masoomoó kureeraá mibaá nee faanqw nin aldeaená' nee daaqoó Bilha nee Silpa, tlaawoó baabuúwós. Yosefu muruudá' tlákw hhaeewós i axweemaamisiya' nee i tlehhaahhitiya', gun dír baabuúwósí alki/a/iit.

3Yakobo Yosefu guna guruú i baá/ ta daaqaywósuú hatlá' sleémeerowo. Asma Yosefu a na/oó aa baraá diimaywós wa sláy. Guri hiyoó hhoohhoó' i tleéhh. 4Hhaeewós ngiwa tsaahhiyé' adór Yosefu kur ló' wa slai nee baabá ta inooine, Yosefu kuri ló' wa aáhh, tay sangw waydúr hootiiká.

5Looarka wake Yosefu ina tlatiitín. Tlataawós ngiwa alki/iít, hhaeewós nguri ak aahhiyé'. 6Yosefu hhaeewós gina báy, «Na'asé', tlataaeé' iiárií qaasaak. Gár naa tlatiitiím a tí, 7‹Aníng nee kuungá' bareemák a ileeraá hhaanslaá tsegiitaán baraá qaymór wa alé. Ilangw'eé' ina sihhiít, nee ileerihúng ilangw'eé' nguna harweeriyé', nari xupuuiyé' dír ilangw'eé'.› »

8Hhaeewós nguri bayé', «Xáy, kuúng tin sa waawuti'iínda? Kuúng tin bála?» Kuri ló' wa aáhh as tlataawós nee axweesantós.

9Ina male tlatiitín, hhaeewós giri báy, «Iia qaasaak, tlataá hatlá' iga malé tlatiitiím. Looa nee slahhaangw nee tsatse/uú mibaá nee wak aníng ina i xupuuiyé'.»

10Baabuúwós nee hhaeewós ngiwa ádbáy, baabá guri iigahhaát, guri báy, «Tlataaká' a gaalá laá taa tlatiitiín? Xáy, án nee aayiírók nee hhaeewók unqo i xupuuána ay yaamu?» 11Hhaeewós gur'e giri ohiín, ala baabuúwós muruuwí sleémeero guri baraá muunaáwós i qaás, as nguwa aldakwi.

Weeriisár Yosefu

12Looarka wake hha'aá Yosefu bee/ángw baabuúín nguna de'éngw ayé' iisaapoó yaamaá Shekemií alé. 13Yakobo Yosefu guri báy, «Xáy, hhaeewók naa bee/ángw de'éngw áy'iíke baraá yaamaá Shekemu i alé? Qwaláng, án kuúng u ya/aáw amor'ín i alé.»

Yosefu iri oó', «Kahhoo', aníng a deer.»

14Guri báy, «Tláw, saayuú hhaeewók leehhang, xáy, ki amohhoóe, nee bee/aangw sleeme ku amohhoóe? Saayuúsíng ngu húp.» Baabuúwós guri ya/aáw iimír baraá xatstá Hebronír wa alé, iri hardáh yaamaá Shekemu.

15Heeko wák Yosefu guna baraá xatstií áy, i baraadá' wa harweeriirín. Heedaádá' guri báy, «Gár ta leeleehhit a milá?»

16Yosefu iri oó', «Hhaee'eé' in leelehhiít. Na'ás, dír iwa de'ena' ooang.»

17Heedaádá' iri oó', «Hám nina sangw diirí wa tlayé', ta kaahi, ‹A tleesaán ay baraá gixsár Dotani.› » Yosefu hhaeewós giri eehár, giri baraá gixsár Dotanír i áy.

18Hhaeewós nguri amorqá' saáwí ariyé'. Inós qoomár iwa hardihiiká amor'ín i alé, tana kilooín axweés as kuwa gaasi. 19Ta axwees kilooín ale, ta kaahi, «Aakooduú tlata hanoos naa hardáh. 20Gimsé', u gaasaán, kuri kwahhaán baraá hhalángw wák diirihe. Daqaní tari ooaan makiito'ór sla/a gwaa /ák. Xáy, daqaní a araán tlataawós kudá' aa tlatiitín adór i laqiya'.»

21Reubeni adoodá' ngiwa axaás, guna slaá' nguwa ba/amiisi gawaá dabaaín wa alé, iri oó', «Aasla'áy, muwa gaasaán, na'asé'.» 22Reubeni gina báy, «Tseere ma ku'uusara', ala kwahhaak baraá hhalaangwí oo baraá darmuuwí dirií'. Ala mu gaasara'.» Reubeni gár adoorí ngisa oó', a gun tu/utá wa slaa' baraá dabaaín wá alé, as nguwa ki/isi amór baabuúwós. 23Ala Yosefu iwa hardáh dír hhaeewós i alé, hiyaywós kudá' hhoohhoó' aa tsiít nguna hayohiyé'. 24Nguna oohiyé', ngway kwahhiyé' baraá hhalángw kaahaár, oo ma'aá koomaaká.

25Tari iwiít as tawa /ayin. Naxés tawa qaytsiít, múk Ishmaeli kuna ár oo aauuse, naa hardáh, ta yaamaá Gileadír daahh. Inooín a múk halaanu'uumár tleéhh. I angamíar'ín koná'. Nee muruuín kudá' ta weerimiisi angamía gun loohís. Gár i kona' a moqoonjó nee garka mooyángw tsuú' koom qoomár barka daá/, nee mooyangwko ta babay manemane, kun yaamaá Misrír i huuw. 26Yuda hhaeewós giri báy, «Gár tiwa bu' a milá hhiyaarén bura gaasaán, nee atén tari múk fadaá koóm? 27Gimsé', un weerisaán dír múk Ishmaeli, dabaarén miwa tlakweemisaán, bareemák inós a hhiyaarén. Inós nee atén tseere a wak.» Hhaeewós nay ya/ané'. 28Muko oo yaamaá Midiani oo múk tlaxuúm iwa waaraahhi, Yosefu kuri duúx#37:28 Kuri duúx: Baraá tsifrír Ebraniaro ka geehhooeeká múk Yosefu gwa duux tam hhaeewós laqaá múk Midiani. baraá hhalaango, kuri weeriís dír múk Ishmaeli, ar shekeéli mibeeraá tsár. Inooín Yosefu kuri huúw ay yaamaá Misri.

29Reubeni iwa kií/ amór hhalaangw, laatí Yosefu i kaahh baraá hhalaango. Inós tlabaawós giri feehhamiís as gurhaami. 30Iri kií/ amór hhaeewós, iri oó', «Garma i kaahh, án hám adór ni laaq a idoomá?»

31Naagáy inooín deelmo nguri gaasiyé', hiyayduú Yosefu kuri baraá tseeredí luhhuús. 32Hiyayduú tseerér koóm kuri huúw amór do' as kuwa laqaamár ay amór baabuúwós, kuwa bay, «Hiyaywí ngwa sleesaán. Áx xuuxueek, a hiyoó garmaawóge, laqaá adoomá?»

33Baabuúín hiyaydá' guri tsaáhh, iri oó', «A hiyoó garmaaeé'. Garmaaeé' makiito'ór xaraasl gwaa /ák, ar ló', Yosefu kwaa feehhamiís.» 34Yakobo tlabaawós giri feehhamiís, guniyadu giri tsiít, iri tsuunqumiís, garmaawós kudá' guri al/aa/amín deelór yaariire. 35Na/iiwós awa daaqaay nee awa dasu baabuúín nguri i daqayé' kuwa gurkwa/amisi. Ala Yakobo gurkwa/asa gari sií' iri oó', «Án garmaaeé' u baloó gunqareesaaká tam ay baraá gi'i.» Gawaá adoorihe Yakobo garmaawós guri al/aa/amaamín.

36Ala mukduú yaamaá Midiani oo Yosefu gwaa tlaaxw kuna weeriís baraá yaamaá Misri, kuri tlaáxw nee heeko ta babay Potifa. Inós a geeraharusmoó úr oo askaárír Farao,#37:36 Farao: Baraá yaamaá Misriro gídaabárós a Waawutmo. waawutmoó yaamaá Misri.

Currently Selected:

IIMU/UUNGW 37: IRQW

Highlight

Copy