يَحْيَى 15
15
عِيسَىٰ نٜىٰ إِتَاثٜىٰنْ إِنَبِے نَ عَيْنِحِ
1«نِنٜىٰ إِتَاثٜىٰنْ إِنَبِے نَعَّيْنِحِ، عُبَانَ كُوَ شِينٜىٰ مَنُواْمِنْ؞ 2كُواْوَنٜىٰ رٜىٰشٜىٰ عَثِكِنَ دَ بَايَ بَادَ یَیَ، سَيْ يَيَنْكٜىٰشِ؞ كُواْوَنٜىٰ رٜىٰشٜىٰ مَيْيِنْ یَیَ كُوَ يَكَنْ ڧَارَ ڠَرَشِ دُواْمِنْ يَڧَارَ حَيْڢُوَ؞ 3كُواْ يَنْذُ مَا كُنَدَ ڟَبْتَ سَبُواْدَ مَغَنَرْدَ نَڢَطَا مُكُ؞ 4كُذَوْنَ عَثِكِنَ، نِے كُمَ عَثِكِنْكُ؞ كَمَرْ يَدَّ رٜىٰشٜىٰنْ إِتَاثٜىٰنْ إِنَبِے بَايَ عِيَ بَادَ یَیَ دَكَنْسَ، سَيْ كُواْ يَكَسَنْثٜىٰ حَطٜىٰ دَ إِتَاثٜىٰنْ إِنَبِنْ، حَكَ كُو مَا بَذَاكُ عِيَبَ، سَيْ كُنْ كَسَنْثٜىٰ حَطٜىٰ دَنِے؞
5«نِنٜىٰ إِتَاثٜىٰنْ إِنَبِے، كُو كُوَ رَسَّنْ؞ وَنْدَ يَذَوْنَ عَثِكِنَ، نِے كُمَ عَثِكِنْسَ، شِينٜىٰ مَيْيِنْ یَیَ دَيَوَ؞ غَمَا إِنْ بَتَرٜىٰ دَنِے بَ، بَذَاكُ عِيَيِنْ كُواْمٜىٰبَ؞ 6دُكْ وَنْدَ بَيْ ذَوْنَ عَثِكِنَبَ، يَنَ كَمَ دَ رٜىٰشٜىٰنْ دَ عَكَ جٜىٰڢَرْ دَشِ يَبُوشٜىٰ؞ مُتَنٜىٰ سُكَنْ تَتَّارَ إِرِنْسُ نٜىٰ سُجٜىٰڢَ أَوُتَا، عَڧُواْنٜىٰسُ؞ 7إِنْ كُنْ ذَوْنَ عَثِكِنَ، مَغَنَاتَ كُمَ تَذَوْنَ عَثِكِنْكُ، ذَاكُ ضُواْڧِ دُكْ أَبِنْدَ كُكٜىٰسُواْ، ذَاعَ كُوَ يِمُكُ؞ 8كُحَيْڢَرْ دَ حَلِنْ رَايُوَا مَيْݣَوْ وَدَّ ذَاتَ نُونَ ثٜىٰوَ كُو أَلْمَجِرَيْنَ نٜىٰ، كَمَرْ إِتَاثٜىٰنْ دَ يَحَيْڢِ یَیَ مَاسُ ݣَوْ، غَمَا وَنَّنْ نٜىٰ يَكٜىٰ طَوْكَكَ عُبَانَ؞ 9كَمَرْ يَدَّ عُبَا يَڧَوْنَثٜىٰنِ، حَكَ نِے مَا إِنَ ڧَوْنَرْكُ؞ تُواْ، كُذَوْنَ عَثِكِنْ ڧَوْنَرْ دَ نَكٜىٰ نُونَ مُكُ؞ 10نِے نَبِے عُمَرْنَنْ عُبَانَ، نَكُمَ ذَوْنَ عَثِكِنْ ڧَوْنَرْسَ؞ حَكَ كُو كُمَ، إِنْ كُنْبِے عُمَرْنَيْنَ ذَاكُ ذَوْنَ عَثِكِنْ ڧَوْنَتَ؞
11«نَغَيَ مُكُ حَكَ دُواْمِنْ ڢَضٍ ثِكِنَ يَكَسَنْثٜىٰ عَثِكِنْكُ، ڢَضٍ ثِكِنْكُ كُمَ يَذَمَ ثِكَكّٜىٰ؞ 12عُمَرْنِنَ، شِينٜىٰ، كُڧَوْنَثِ جُونَ كَمَرْ يَدَّ نَڧَوْنَثٜىٰكُ؞ 13بَا ڧَوْنَرْ دَ تَڢِے وَنَّنْ، وَتُواْ مُتُمْ يَبَادَ رَنْسَ سَبُواْدَ أَبُواْكَنْسَ؞ 14كُو أَبُواْكَيْنَ نٜىٰ إِنْ كُنْيِ أَبِنْدَ نَثٜىٰ كُيِ؞ 15بَذَنْ ڧَارَثٜىٰ دَكُو بَيِبَ كُمَ، دُوانْ بَاوَ بَيْ سَنْ أَبِنْدَ مَيْغِدَنْسَ يَكٜىٰيِبَ؞ عَمَّا إِنَثٜىٰ دَكُو أَبُواْكَيْ غَمَا نَا غَيَ مُكُ دُكَنْ أَبِنْدَ نَجِ دَغَ وُرِنْ عُبَانَ؞ 16بَكُو كُكَ ذَاٻٜىٰنِبَ، نِنٜىٰ نَا ذَاٻٜىٰكُ، نَكُمَ سَاكُ كُجٜىٰ كُحَيْڢَرْ دَ هَلَيٜىٰنْ رَايُوَا مَيْݣَوْ كَمَرْ إِتَاثٜىٰ مَيْ حَيْڢَرْ دَ یَیَ، هَلَيٜىٰنْ دَ ذَاسُ دَوَّمَ؞ سَعَنً عُبَا ذَيْبَاكُ دُكَنْ أَبِنْدَ كُكَ ضُواْڧَا عَثِكِنْ سُونَنَ؞ 17عُمَرْنِنْدَ نَبَاكُ شِينٜىٰ كُڧَوْنَثِ جُونَ؞»
ڧِيَيَّرْ دُونِيَا
18«عِدَنْ دَيْ دُونِيَا تَڧِيكُ، كُسَنِ ثٜىٰوَ تَڧِينِ كَاڢِنْ تَڧِيكُ؞ 19دَكُو نَدُونِيَا نٜىٰ دَدُونِيَا تَاسُواْ أَبِنْتَ، عَمَّا سَبُواْدَ كُو بَ نَدُونِيَا بَنٜىٰ، نَكُمَ ذَاٻٜىٰكُ دَغَ دُونِيَا، شِيَسَا دُونِيَا تَكٜىٰ ڧِنْكُ؞ 20كُتُنَ دَ أَبِنْدَ نَڢَطَا مُكُ ثٜىٰوَ ‹بَاوَ بَايَڢِنْ مَيْغِدَنْسَ؞› إِنْ سُنْ ڟَنَنْتَ مِنِ، كُو مَا ذَاسُ ڟَنَنْتَ مُكُ؞ دَ سُنْيِ بِيَيَّ دَ مَغَنَاتَ دَ ذَاسُيِ بِيَيَّ دَ تَاكُ كُو مَا؞ 21ذَاسُيِ مُكُ دُكَنْ وَطَنَّنْ نٜىٰ سَبُواْدَ سُونَنَ، دُوانْ بَسُ سَنْ وَنْدَ يَعَيْكُواْنِبَ؞ 22دَبَدُواْمِنْ نَذُواْ نَيِ مُسُ مَغَنَ بَ، دَبَاسُ دَ ذُنُوبِ؞ عَمَّا يَنْذُ كَمْ، بَاسُدَ وَتَ حُجَّ عَكَنْ ذُنُوبِنْسُ؞ 23وَنْدَ يَڧِنِ يَڧِ عُبَانَ مَا؞ 24نَيِ أَيُّكَ دَيَوَ عَثِكِنْسُ وَطَنْدَ بَاوَنْدَ يَتَٻَيِ؞ دَاعَثٜىٰ بَنْيِ أَيُّكَنَّنْبَ دَ بَاسُ دَ ذُنُوبِ؞ عَمَّا يَنْذُ سُنْ غَا أَبِنْدَ نَيِ، عَمَّا دُكْدَهَكَ سُنْڧِينِ، سُنْ كُمَڧِ عُبَانَ؞ 25وَنَّنْ يَڢَرُ نٜىٰ كُوَ دُواْمِنْ عَثِكَ مَغَنَرْ دَتَكٜىٰ أَرُبُوثٜىٰ أَ كُواْيَرْوَرْسُ ثٜىٰوَ ‹سُنْڧِينِ بَادَلِيلِ؞›#زَبُو 35.19؛ 69.4؛ 109.3
26«ذَنْسَا مَيْ تَيْمَكُواْ يَذُواْ وُرِنْكُ دَغَ وُرِنْ عُبَا؞ شِينٜىٰ رُوحُ نَغَسْكِيَ، مَيْ ڢِتُواْوَ دَغَ وُرِنْ عُبَا، شِينٜىٰ ذَيْ يِشَيْدَ عَكَيْنَ؞ 27كُو مَا شَيْدُ نٜىٰ، دُواْمِنْ تُنْڢَرْكُواْ كُنَ تَرٜىٰدَنِ؞
Currently Selected:
يَحْيَى 15: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
