ڢَارَوَ 13

إِبْرَمْ دَ لُوطُ سُنْ رَبُ

1سَيْ إِبْرَمْ يَتَاشِ دَغَ ڧَسَرْ مَصَرْ تَرٜىٰدَ مَاتَرْسَ دَ لُوطُ دَ دُكَنْ أَبِنْدَ يَكٜىٰدَشِ، سُكَ كُواْمَ نٜىٰغٜىٰبْ؞ 2إِبْرَمْ كُوَ يَيِ أَرْزِڧِ سُواْسَيْ، يَنَدَ دَبُّواْبِنْ غِدَا دَ أَظُرْڢَا دَ ظِينَارِيَ؞ 3يَا ثِيغَبَدَ تَڢِيَرْسَ دَغَ ذَنْ‌غُواْ ذُوَا ذَنْ‌غُواْ دَغَ نٜىٰغٜىٰبْ حَرْ ذُوَا بٜىٰتٜىٰلْ، عِنْدَ دَا يَكَڢَ تٜىٰنْتِنْسَ ڟَكَانِنْ غَرِنْ بٜىٰتٜىٰلْ دَ نَ أَيْ، 4عِنْدَ دَا يَغِنَ بَغَدٜىٰ لُواْكَثِنْ دَيَكٜىٰ وُثٜىٰوَ؞ أَوُرِنْ إِبْرَمْ يَا كِرَا غَ سُونَنْ يَهْوٜىٰهْ ثِكِنْ سُجَّدَ؞ 5لُوطُ وَنْدَ يَتَڢِے تَرٜىٰدَ إِبْرَمْ، شِے مَا يَنَدَ غَرْكُنَنْ تُمَكِ دَ أَوَكِ دَ نَشَانُو دَ كُمَ عِيَلِنْسَ دَ بَايِنْسَ؞ 6وَنَّنْ يَا سَا حَرْ ڢِيلَيٜىٰنْ كِيوُاْ سُكَ كَاسَ مُسُ، غَمَا دَبُّواْبِنْسُ سُنَدَ يَوَ يَدَّ بَذَاسُ عِيَ ذَمَ تَرٜىٰبَ؞ 7أَݣَويْ كُمَ رَشِنْ ذَمَنْ لَاڢِيَ ڟَكَانِنْ مَكِيَايَنْ دَبُّواْبِنْ إِبْرَمْ دَ مَكِيَايَنْ دَبُّواْبِنْ لُوطُ؞ أَ لُواْكَثِنَّنْ كَنْعَنِيَاوَا دَ ڢٜىٰرِظِّيَاوَا سُنَ عَڧَسَرْ؞

8سَيْ إِبْرَمْ يَثٜىٰ وَ لُوطُ ‏«‏كَدَ رَشِنْ ذَمَنْ لَاڢِيَ يَشِغَ ڟَكَانِينَ دَكَيْ، كُواْ ڟَكَانِنْ مَاسُيِمَكَ كِيوُاْ دَ مَاسُيِمِنِ كِيوُاْ، غَمَا مُو یَنْعُوَ نٜىٰ؞ 9أَيْ، غَا ڢِيلَيٜىٰنْ ڧَسَرْ دُكَ أَغَبَنْكَ!‏ سَيْ مُرَبُ؞ عِدَنْ ذَاكَبِے حَنُّنْ هَغُ، نِے ذَنْبِے نَدَمَ، عِدَنْ كُمَ ذَاكَبِے حَنُّنْ دَامَ، نِے ذَنْبِے نَهَغُ؞»‏

10سَيْ لُوطُ يَطَغَ عِدَنُونْسَ، يَغَ ثٜىٰوَ ݣُورِنْ يُواْدَنْ حَرْ ذُوَا ذُواْوَرْ يَنَ ثِكٜىٰ دَ ثِيَوَرْ كِيوُاْ دَ وُرَارٜىٰنْ ضُوَ كَمَرْ غُواْنَرْ عَيْدَنْ وَدَّ يَهْوٜىٰهْ يَيِ، كُواْ كُمَ كَمَرْ ݣُورِنْ نِلُ أَ مَصَرْ؞ وَنَّنْ يَا كَسَنْثٜىٰ كَاڢِنْ يَهْوٜىٰهْ يَهَلَّكَ سُواْدُوامْ دَ غُواْمُواْرَ؞#ڢَارْ 2‏.10 11دُواْمِنْ حَكَ لُوطُ يَا ذَاٻَا وَكَنْسَ ݣُورِنْ يُواْدَنْ؞ لُوطُ يَا كُمَ كَامَ حَنْيَ يَا نُڢِ غَبَسْ؞ تَهَكَ سُكَ رَبُ دَ جُونَ؞ 12إِبْرَمْ يَا ذَوْنَ عَڧَسَرْ كَنْعَنَ، عَمَّا لُوطُ يَا ذَوْنَ ثِكِنْ يَنْكِنْ بِرَنٜىٰنْ دَسُكٜىٰ عَݣُورِ، دَغَ نَنْ يَا غُسَ يَا كَڢَ تٜىٰنْتِنْسَ كُسَدَ سُواْدُوامْ؞ 13مُتَنٜىٰنْ سُواْدُوامْ كُوَ مُوغَيٜىٰ نٜىٰ، مَاسُ عَيْكَتَ مُغُنْتَا ڨُورَيْ، مَاسُ غَابَادَ يَهْوٜىٰهْ؞

إِبْرَمْ يَا ڧَوْرَ ذُوَا هٜىٰبْرُوانْ

14بَايَنْدَ لُوطُ يَا رَبُ دَ إِبْرَمْ، سَيْ يَهْوٜىٰهْ يَثٜىٰ وَ إِبْرَمْ ‏«‏دَغَ عِنْدَ كَكٜىٰ ڟَيٜىٰ، طَغَ عِدَنُونْكَ كَدُوبَ تَأَرٜىٰوَ دَ تَكُدُ دَ تَغَبَسْ دَ تَيَمَّ؞ 15غَمَا دُكَنْ ڧَسَرْدَ كَغَنِ، ذَنْبَاكَ، كَيْ دَ ذُرِيَرْكَ حَرْ أَبَدَا؞#أَيُّكَنْ 7‏.5 16ذَنْسَا ذُرِيَرْكَ سُيِيَوَ كَمَرْ تُرْٻَيَرْ ڧَسَا، حَرْ إِنْ وَنِ ذَيْ عِيَ ڧِرْغَ تُرْٻَيَرْ ڧَسَا، تُواْ، ذَاعَ عِيَ ڧِرْغَ ذُرِيَرْكَ؞ 17تَاشِ، كَيِتَڢِيَ ثِكِنْ ڧَسَرْ، إِيَاكَرْ ڢَاطِنْتَ دَ ڟَوُانْتَ، غَمَا ذَنْبَاكَ عِتَ؞»‏ 18دُواْمِنْ حَكَ إِبْرَمْ يَتَاشِ يَڧَوْرَ يَذَوْنَ وَجٜىٰنْ عِتَتُوَنْ ڟَاڢِ نَ مَمْرٜىٰ، وَطَنْدَ سُكٜىٰ أَ هٜىٰبْرُوانْ؞ أَوُرِنْ إِبْرَمْ يَا غِنَا بَغَدٜىٰ غَ يَهْوٜىٰهْ؞

Currently Selected:

ڢَارَوَ 13: hauAS

Highlight

Copy