أَيُّكَنْ مَنْذَنِّے 8

1شَوُلُ كُوَ يَغُواْيِ بَايَنْ كِسَنْ إِسْتِڢَنُسْ؞

شَوُلُ يَڟَنَنْتَا وَ جَمَعَرْ مَاسُبِے

أَ رَانَرْ نَنْ كُوَ، وَنِ بَبَّنْ ڟَنَنِ يَڢَاطَوَ جَمَعَرْ مَاسُبِنْ دَتَكٜىٰ أَ عُرُوشَلِيمَ؞ دُكْ عَكَ وَرْوَڟَتَ عَيَنْكِنْ يَهُودِيَ دَ نَ سَمَرِيَ، سَيْدَيْ مَنْذَنِّےنْ نٜىٰ كَوَيْ سُكَ ضَغٜىٰ؞ 2سَيْ وَطَنْسُ مَاسُ بَوْتَاوَ اللَّهْ سُكَ بِنّٜىٰ إِسْتِڢَنُسْ، سُكَيِ مَكُواْكِ سُواْسَيْ دُواْمِنْسَ؞ 3عَمَّا شَوُلُ يَيِ تَڟَنَنْتَاوَ جَمَعَرْ مَاسُبِے ڨُورَيْ دَ غَسْكٜىٰ، يَنَ شِغَ غِدَا غِدَا، يَنَ جَنْ مَظَا دَ مَاتَا، يَنَ سَاسُ ثِكِنْ كُرْكُكُ؞#أَيُّكَنْ 22‏.4‏-5؛ 26‏.9‏-11

أَنْ يِ شٜىٰلَرْ لَابَرِ مَيْ دَاطِے أَ سَمَرِيَ

4تُواْ، وَطَنْدَ عَكَ وَرْوَاڟَرْ طِنَّنْ كُوَ، سُكَيِ تَظَظْذَاغَاوَا سُنَيِنْ شٜىٰلَرْ لَابَرِنَّنْ مَيْ دَاطِے؞ 5ڢِلِبُسْ يَتَڢِے بِرْنِنْ سَمَرِيَ، يَنَيِ مُسُ وَعَظِنْ أَلْمَسِيحُ؞ 6دَ مُتَنٜىٰ سُكَجِ، سُكَ كُمَ غَ عَلَمُنْ بَنْ مَامَاكِنْ دَ يَكٜىٰيِ دَ نُڢِ طَيَ سُكَ مَيْدَ حَنْكَلِ غَ أَبِنْدَ يَڢَطَا؞ 7ڧَذَمَنْ رُوحُواْحِ كُوَ دَ إِيهُ سُكَ ڢِتُواْ دَغَ جِكِنْ مُتَنٜىٰ دَيَوَ؞ عَكَ وَرْكَرْدَ شَنْيَيُّ دَ غُرَغُ دَيَوَ؞ 8سَبُواْدَ حَكَ عَكَيِ ڢَضٍ ثِكِ سُواْسَيْ عَبِرْنِنْ؞

9أَݣَويْ وَنِ مُتُمْ كُوَ مَيْ سُونَ سِيمَنْ، وَنْدَ دَا يَكٜىٰيِنْ سِحِرِ عَبِرْنِنْ، حَرْ يَنَ بَا سَمَارِيَاوَا مَامَاكِ، يَنَ ثٜىٰوَ شِ وَنِ بَبَّنْ مُتُمْنٜىٰ؞ 10جَمَعَ دُكَ كُوَ سُكَ مَيْدَ حَنْكَلِ عَكَنْسَ، بَبَّ دَ يَرُواْ، سُنَ ثٜىٰوَ ‏«‏مُتُمِنَّنْ، أَيْ، إِيكُواْنَّنْ نَ اللَّهْ نٜىٰ دَ عَكٜىٰثٜىٰ دَشِ مَيْغِرْمَ؞»‏ 11سَيْ سُكَ مَيْدَ حَنْكَلِ سُواْسَيْ عَكَنْسَ، غَمَا يَا دَطٜىٰ يَنَ تَبَاسُ مَامَاكِ دَ سِحِرِنْسَ؞ 12عَمَّا دَ سُكَ غَسْكَتَ لَابَرِ مَيْ دَاطِنْ دَ ڢِلِبُسْ يَيِ عَكَنْ مُلْكٍ اللَّهْ دَ كُمَ سُونَنْ عِيسَىٰ أَلْمَسِيحُ، دُكَنْسُ عَكَيِ مُسُ بَڢْتِسْمَ، مَظَا دَ مَاتَا؞ 13حَرْ سِيمَنْ دَ كَنْسَ مَا يَبَادَ غَسْكِيَ؞ بَايَنْ أَنْيِ مَسَ بَڢْتِسْمَ كُمَ يَمَنّٜىٰوَ ڢِلِبُسْ؞ دَيَغَ يَدَّ ڢِلِبُسْ يَكٜىٰيِنْ عَلَمُ دَ مَنْيَنْ أَيُّكَنْ بَنْ مَامَاكِ، سَيْ يَيِ مَامَاكِ ڨُورَيْ؞

14تُواْ دَ مَنْذَنِّےنْ دَسُكٜىٰ عُرُوشَلِيمَ سُكَجِ سَمَارِيَاوَا سُنْ كَرْٻِ كَلْمَرْ اللَّهْ، سَيْ سُكَ عَيْكَ مُسُ بِتْرُسْ دَ يَحْيَى؞ 15سُو كُوَ دَ سُكَ إِسُواْ، سُكَيِ مُسُ أَدُّعَ سُكَرْٻِ رُوحُ مَيْ ڟَرْكِے؞ 16دُواْمِنْ رُوحُ مَيْ ڟَرْكِے بَيْ سَوْكُواْوَ وَنِنْسُ بَ تُكُنَ، سَيْدَيْ كَوَيْ أَنْيِ مُسُ بَڢْتِسْمَ نٜىٰ دَ سُونَنْ عُبَنْ‌غِجِ عِيسَىٰ؞ 17سَيْ بِتْرُسْ دَ يَحْيَى سُكَسَا مُسُ حَنُّنْ أَلْبَرْكَ، سُكَ كُوَ كَرْٻِ رُوحُ مَيْ ڟَرْكِے؞

18تُواْ دَ سِيمَنْ يَغَ، أَشٜىٰ تَوُرِنْ سَا حَنُّنْ مَنْذَنِّے نٜىٰ عَكٜىٰ سَامُنْ رُوحٌ، سَيْ يَمِيڧَ مُسُ كُطِ، 19يَثٜىٰ ‏«‏نِے مَا كُبَانِ وَنَّنْ إِيكُواْ، دُواْمِنْ دُكْ وَنْدَ نَسَا مَسَ حَنُّ، يَسَامِ رُوحُ مَيْ ڟَرْكِے؞»‏

20عَمَّا بِتْرُسْ يَثٜىٰ مَسَ ‏«‏كَيْ دَ كُطِنْكَ، كُهَلَّكَ!‏ كَنَ ڟَمَّنِ دَ كُطِ نٜىٰ ذَاكَسَامِ ݣَوْتَرْ اللَّهْ؟ 21بَ ضُوَنْكَ دَ وَنَّنْ شَعَنِ كُواْ كَطَنْ، غَمَا ذُوثِيَارْكَ بَدَيْدَيْ تَكٜىٰبَ أَغَبَنْ اللَّهْ؞ 22سَيْ كَتُوبَ دَغَ وَنَّنْ مُوغُنْ عَيْكِ نَاكَ، كَضُواْڧِ عُبَنْ‌غِجِ كُواْ ذَيْ غَاڢَرْتَا مَكَ أَبِنَّنْدَ كَشِرْيَ أَ ذُوثِيَارْكَ؞ 23غَمَا نَاغَ كَنَ ثِكٜىٰدَ مُوغُنْ كِيشِ، كَنَ طَوْرٜىٰ ثِكِنْ ذُنُوبِ؞»‏

24سَيْ سِيمَنْ يَأَمْسَ يَثٜىٰ ‏«‏كُضُواْڧَ مِنِ عُبَنْ‌غِجِ، كَدَ كُواْ طَيَ دَغَ ثِكِنْ أَبُبُوَنْ دَ كُكَڢَطَا يَڢَرُ دَنِے؞»‏

25تُواْ، بَايَنْدَ بِتْرُسْ دَ يَحْيَى سُكَيِ شَيْدَ سُكَ كُمَيِ وَعَظِنْ لَابَرِ مَيْ دَاطِے نَمَغَنَرْ عُبَنْ‌غِجِ، سَيْ سُكَ كُواْمَ عُرُوشَلِيمَ؞ يَايِنْ دَسُكٜىٰ كُواْمَاوَا عُرُوشَلِيمَ، سَيْ سُكَ يِتَيِنْ وَعَظِنْ لَابَرِ مَيْ دَاطِے عَڧَوْيُكَنْ سَمَرِيَ دَيَوَ؞

ڢِلِبُسْ دَ مُتُمِنْ إِتِيُواْڢِيَ

26أَنَانً سَيْ وَنِ مَلاَىِٕكَنْ عُبَنْ‌غِجِ يَثٜىٰ وَ ڢِلِبُسْ ‏«‏تَاشِ كَبِے تَكُدُ، كَبِے حَنْيَرْ دَ تَڢِتُواْ دَغَ عُرُوشَلِيمَ ذُوَا غَاظَ،»‏ وَتُواْ حَنْيَرْ هَمَادَ؞ 27سَيْ يَتَاشِ يَتَڢِے؞ سَيْغَا وَنِ مُتُمِنْ إِتِيُواْڢِيَ#8‏.27 إِتِيُواْڢِيَ: وَنَّنْ سُونَ يَڧُنْشِ سَاشٜىٰنْ كُدَنْثِنْ مَصَرْ دَ سَاشٜىٰنْ سُدَنْ دَ سَاشٜىٰنْ إِتِيُواْڢِيَ، وَتُواْ حَبَشَ؞ وَنْدَ شِے بَابَا نٜىٰ، وَتُواْ أَنْدَنْدَڧٜىٰشِ، مَيْ بَبَّنْ مَڟَيِ أَمُلْكٍ كَنْدِسْ، سَرَوْنِيَرْ إِتِيُواْڢِيَ؞ شِينٜىٰ كُمَ مَعَجِنْ سَرَوْنِيَرْ؞ يَذُواْ عُرُوشَلِيمَ نٜىٰ دُواْمِنْ يَيِ سُجَّدَ؞ 28دَ يَنَ كُواْمَاوَا غِدَا أَ ظَوْنٜىٰ ثِكِنْ كٜىٰكٜىٰنْ دُواْكِنْسَ، يَبُوطٜىٰ لِتَّڢِنْ أَنَّبِے عِشَايَ يَنَ كَرَاتُ؞ 29سَيْ رُوحُ يَثٜىٰ وَ ڢِلِبُسْ ‏«‏مَاڟَ، كَيِ كُسَدَ كٜىٰكٜىٰنْ دُواْكِنَّنْ؞»‏ 30سَيْ ڢِلِبُسْ يَغُدُ ذُوَا وُرِنْسَ، يَجِ شِ يَنَ كَرَاتُنْ لِتَّڢِنْ أَنَّبِے عِشَايَ؞ سَيْ ڢِلِبُسْ يَتَمْبَيٜىٰشِ ‏«‏كَا غَانٜىٰ أَبِنْدَ كَكٜىٰ كَرَنْتَاوَا كُوَ؟»‏

31سَيْيَأَمْسَ ‏«‏إِنَا ڢَا؟ سَيْ كُواْ وَنِ يَيِ مِنِ ڢَسَّرَ؞»‏ سَيْيَثٜىٰ وَ ڢِلِبُسْ يَهَوْ كٜىٰكٜىٰنْ دُواْكِنْ سُذَوْنَ تَرٜىٰ؞

32غَا سَاشٜىٰنْ رُبُوتَثِّيَرْ مَغَنَرْ اللَّهْ دَيَكٜىٰ كَرَنْتَاوَا،

‏«‏أَنْ كَيْشِ كَمَرْ تُنْكِيَ ذُوَا وُرِنْ يَنْكَ؞

كَمَرْ يَدَّ طَنْ ضَغُواْ يَكٜىٰ شِضُ

أَ حَنُّنْ مَيْ أَسْكِ مَسَ غَاشِنْ جِكِنْسَ،

حَكَ بَيْ كُواْ بُوطٜىٰ بَاكِنْسَبَ؞

33أَنْيِ مَسَ وُلَڧَنْثِ

حَرْ أَنْحَنَ مَسَ غَسْكِيَرْسَ؞

وَ ذَيْ عِيَ بَيَّنَ لَابَرِنْ ذُرِيَرْسَ؟

غَمَا أَنْطَوْكِ رَنْسَ دَغَ دُونِيَا؞»‏#عِشـ 53‏.7‏-8

34سَيْ بَابَنَّنْ يَثٜىٰ وَ ڢِلِبُسْ ‏«‏عَكَنْ وَنٜىٰنٜىٰ أَنَّبِنَّنْ يَكٜىٰ مَغَنَ؟ عَكَنْسَنٜىٰ كُواْ عَكَنْ وَنِ؟»‏ 35سَيْ ڢِلِبُسْ يَبُوطٜىٰ بَاكِنْسَ يَڢَارَ تُنْدَغَ وَنَّنْ سَاشٜىٰنْ رُبُوتَثِّيَرْ مَغَنَرْ اللَّهْ، يَنَ بَاشِ لَابَرِ مَيْ دَاطِے نَ عِيسَىٰ؞ 36سُنَ ثِكِنْ تَڢِيَ كٜىٰنَنْ، سُكَ كَيْ وُرِنْ ضُوَ، سَيْ بَابَانَّنْ يَثٜىٰ ‏«‏دُوبَ، غَ ضُوَ!‏ مٜىٰنٜىٰنٜىٰ ذَيْ حَنَ عَيِمِنِ بَڢْتِسْمَ؟»‏

37ڢِلِبُسْ يَثٜىٰ ‏«‏عِدَنْ دَيْ كَا غَسْكَتَادَ ذُوثِيَا طَيَ، أَيْ، سَيْ عَيِمَكَ؞»‏

بَابَنَّنْ يَثٜىٰ ‏«‏نَا غَسْكَتَ، عِيسَىٰ أَلْمَسِيحُ طَنْ اللَّهْ نٜىٰ؞»‏#8‏.37 وَطَنْسُ رُبُوثٜىٰ رُبُوثٜىٰ نَدَا بَاسُدَ وَنَّنْ أَيَ؞

38سَيْ يَبَادَ عُمَرْنِ أَڟَيْ دَ كٜىٰكٜىٰنْ دُواْكِنْ؞ دُكَنْسُ بِيُ سُكَ سَوْكَ سُكَ شِغَ ثِكِنْ ضُوً، سَيْ ڢِلِبُسْ يَيِ وَمُتُمِنَّنْ بَڢْتِسْمَ؞ 39دَ سُكَ ڢِتُواْ دَغَ ثِكِنْ ضُوً، رُوحٌ عُبَنْ‌غِجِ يَطَوْكِ ڢِلِبُسْ، بَابَانْ بَيْ سَاكٜىٰ غَنِنْسَبَ؞ سَيْ مُتُمِنْ يَيِ تَڢِيَرْسَ يَنَ ڢَضٍ ثِكِ؞ 40عَمَّا ڢِلِبُسْ يَغَ كَنْسَ أَعَظُواْتُسْ؞ سَيْ يَظَظْذَاغَ دُكَنْ غَرُضُوً، يَنَ بَادَ لَابَرِ مَيْ دَاطِے، حَرْ يَكَيْ كَيْسَرِيَ؞

Currently Selected:

أَيُّكَنْ مَنْذَنِّے 8: hauAS

Highlight

Copy