Marko 15

Wokplɔ Yesu va Pilato gbɔe

(Mat 27.1-2, 11-14; Luk 23.1-5; Yoh 18.28-38)

1Esi ŋu ke teti la, nunɔlagãwo, dumegãwo, agbalẽfialawo kple ʋɔnudrɔ̃lawo katã kpe ta, hede adaŋu. Wobla Yesu, eye wokplɔe yi ɖade asi na Pilato. 2Pilato biae be: “Wòe nye Yudatɔwo ƒe fia laa?” Yesu ɖo eŋu nɛ be: “Ègblɔe ɖe eteƒe.” 3Nunɔlagãwo tsɔ nya geɖewo ɖe eŋu. 4Pilato gabia Yesu be: “Mèle nya aɖeke ŋu ɖo ge oa? Se nutsotso geɖe siwo nam wole le ŋutiwò la ɖa.” 5Ke Yesu megaɖo nya aɖeke ŋu o, esia na be Pilato ƒe mo wɔ yaa.

Wotso kufia na Yesu

(Mat 27.15-26; Luk 23.13-25; Yoh 18.39—19.16)

6Le ŋkekenyui ɖe sia ɖe dzi la, Pilato ɖea asi le gaxɔmenɔla ɖeka si Yudatɔwo bia la ŋu na wo. 7Ame aɖe, si woyɔna be Baraba la nɔ gamenɔla, siwo dze aglã hewu ame le zitɔtɔ aɖe me la dome. 8Ameha la va do, hebia Pilato be wòawɔ nu si wòwɔna na yewo ɖaa la. 9Pilato bia wo be: “Miedi be maɖe asi le Yudatɔwo ƒe fia la ŋu na mia?” 10Ebia nya sia wo elabe edze sii be ŋuʋaʋã ŋutie nunɔlagãwo tsɔ Yesu de asi ɖo. 11Ke nunɔlagãwo de gbe to me na ameha la be woabia be woaɖe asi le Baraba boŋ ŋuti na yewo. 12Pilato gabia wo be: “Ekema nu ka miedi be mawɔ ame si mieyɔna be Yudatɔwo ƒe fia laa?” 13Wogado ɣli be: “Klãe ɖe ati ŋuti!” 14Pilato bia wo be: “Nu vɔ̃ ka koŋ wòwɔ?” Woawo gado ɣli sesĩe ɖe edzi wu be: “Klãe ɖe ati ŋuti!” 15Esi Pilato di be yeawɔ ɖe nu si ameha la bia la dzi na wo ŋuti la, eɖe asi le Baraba ŋu na wo; ke esi wòna woƒo Yesu kple atam gbã vɔ la, etsɔe de asi be woaklã ɖe ati ŋuti.

Asrafowo ɖu fewu le Yesu ŋu

(Mat 27.27-31; Yoh 19.2-3)

16Asrafoawo kplɔ Yesu yi ɖe mɔ́mefia la ƒe xɔ gã aɖe si nye takpeƒe la me, eye woyɔ asrafoha blibo la ƒo ƒu. 17Wotsɔ awu ʋlaya dzĩ do nɛ, eye wotsɔ ŋuka lɔ̃ fiakuku heɖɔ nɛ. 18Wodo gbe nɛ gblɔ be: “Yudatɔwo ƒe fia nenɔ agbe tegbee!” 19Woƒo tagbɔ nɛ kple ati, ɖe ta ɖe eŋuti, eye wodze klo de ta agu nɛ. 20Esi woɖu fewu le eŋuti vɔ la, woɖe awu dzĩ la le eŋu eye wogatsɔ eya ŋutɔ ƒe awuwo do nɛ. Azɔ wokplɔe do goe be woaklãe ɖe ati ŋuti.

Woklã Yesu ɖe atitsoga ŋu

(Mat 27.32-44; Luk 23.26-43; Yoh 19.17-27)

21 # Rom 16.13. Esi woyina la, wodo go Simon, Kirenetɔ la, wòtso agbleta va yina, eye wozi edzi be wòaxɔ Yesu ƒe atitsoga la atsɔ. Simon sia nye Aleksandro kple Rufo tɔ́. 22Wokplɔ Yesu yi ɖe Ametakoliƒe. Woyɔa teƒe sia le Hela-gbe me be Golgata. 23Wotsɔ wain si wotsaka kple atike aɖe si tsia vevesese nu la nɛ be wòano, gake egbe. 24#Ps 22.18. Ale woklã Yesu ɖe ati ŋuti, eye esi wodzidze nu ɖe eƒe awuwo dzi, kpɔ esi anye ame sia ame tɔ la, woma wo ɖe wo ɖokuiwo dome. 25Ŋdi ga asieke mee woklã Yesu ɖe ati ŋuti, 26eye nutsotso si wotsɔ ɖe eŋu la, woŋlɔe klã ɖe eƒe tagbɔ be: “YUDATƆWO ƑE FIA LA.” 27#Yes 53.12.Woklã adzodala eve hã ɖe ati ŋuti kpe ɖe eŋu; ɖeka le eƒe ɖusime, eye evelia le eƒe miame. [ 28Ale nya si woŋlɔ ɖi la va va eme be: “Wobui ɖe vodalawo me.”] 29#Ps 22.7; 109.25; Mar 14.58; Yoh 2.19.Ame siwo va le afi ma tom le yiyim la, le nu me ɖem le eŋu, le edzum hele ta ʋuʋum, le gbɔgblɔm be: “Oho! Wò ame si gblɔ be yeagbã mawuxɔ la agagbugbɔe atu le ŋkeke etɔ̃ mea, wòe nye esia? 30Ɖe ɖokuiwò ne nàɖi tso atitsoga la ŋutia!” 31Nenema ke nunɔlagãwo kple agbalẽfialawo hã ɖu fewu le eŋu le wo nɔewo dome gblɔ be: “Exɔ ame bubuwo ɖe agbe, ke mate ŋu axɔ na eya ŋutɔ ɖokui ya o. 32Wò Mesia la, wò Israel ƒe fia la, azɔ ɖi tso atitsoga la ŋu ɖe anyi ne míakpɔ, bene míaxɔ dziwò ase.” Ame siwo woklã ɖe ati ŋuti kplii la gɔ̃ hã ɖu fewu le eŋu.

Yesu ƒe ku

(Mat 27.45-56; Luk 23.44-49; Yoh 19.28-30)

33Esi ŋdɔ ga wui eve ƒo la, xexeme katã do viviti, va se ɖe ɣetrɔ ga etɔ̃ me. 34#Ps 22.1.Le ɣetrɔ ga etɔ̃ me la, Yesu do ɣli sesĩe be: “Nye Mawu, nye Mawu, nu ka ta nègblẽm ɖi?” si wogblɔna le Hebri-gbe me be: “Eloi, Eloi, lama sabaxtani?” 35Esi ame siwo le tsitre ɖe afi ma dometɔ aɖewo se wòƒo nu la, wogblɔ be: “Misee ɖa, ele Eliya yɔm.” 36#Ps 69.21.Ame ɖeka ƒu du, tsɔ tsilɔnu de wain veve me ɖo ati nu eye wòdoe ɖee be wòano, hele gbɔgblɔm be: “Milala ne míakpɔe ɖa be Eliya ava aɖee le atitsoga la ŋuti mahã?” 37Yesu gado ɣli sesĩe, eye wòmia nu. 38#Mos II, 26.31-33.Tete mawuxɔmetsovɔ la dze ɖe eve siã tso etame va se ɖe egɔme. 39Esi asrafowo dzikpɔla, si le tsitre dze ŋgɔ Yesu, kpɔ ale si wòkui la, egblɔ be: “Nyateƒee, Mawu Vie nye ame sia!”

40 # Luk 8.2, 3. Nyɔnu aɖewo le tsitre ɖe adzɔge le nu siawo teƒe kpɔm. Wo dometɔ aɖewoe nye Maria Magdalatɔ kple Maria si nye Yakobo ɖevitɔ kple Yose nɔ kpakple Salome. 41Ame siawo nɔ Yesu yome le Galilea nɔ edzi kpɔm. Nyɔnu bubu siwo kplɔ Yesu ɖo va Yerusalem la hã nɔ afi ma.

Yesu ɖiɖi

(Mat 27.57-61; Luk 23.50-56; Yoh 19.38-42)

42Gbe ma gbe nye Dzadzraɖoŋkeke si do ŋgɔ na Dzudzɔgbe la. Le fiẽ me la, 43Yosef Arimatiatɔ, ame si nye ame ŋkuta aɖe le sewɔlawo dome, eye eya ŋutɔ hã le mɔkpɔkpɔ me be Mawu aɖo eƒe fiaɖuɖu anyi la, do dzi yi ɖe Pilato gbɔ, eye wòbia be wòaɖe asi le Yesu ƒe kukua ŋu na ye. 44Ewɔ nuku na Pilato be Yesu ku xoxo. Eyɔ asrafoawo ƒe amegã la eye wòbiae se be: “Eku eteƒe didia?” 45Esi asrafoawo ƒe amegã na wònya be eku xoxo la, Pilato ɖe mɔ le ame kuku la ŋu na Yosef. 46Yosef ƒle aklala, eye esi wòɖe Yesu ƒe kukua le atitsoga la ŋuti la, exatsa aklala la ɖe eŋuti, eye wòtsɔe mlɔ yɔdo, si woɖe ɖe agakpe me la me, hemli kpe tu ɖe yɔdo la nu. 47Maria Magdalatɔ kple Maria, Yose dada wokpɔ afi si woɖii ɖo.

Currently Selected:

Marko 15: EB14

Highlight

Copy