Mateo 11

Amedɔdɔwo tso Yohanes mawutsilenamela gbɔ

(Luk 7.18-35)

1Azɔ esi Yesu de dɔ siawo asi na eƒe nusrɔ̃la wui eveawo vɔ la, edzo le afi ma be yeaɖafia nu, eye yeagblɔ nya le woƒe duwo me. 2Esi Yohanes mawutsilenamela, ame si le gaxɔ me la se nu siwo Kristo la le wɔwɔm la, edɔ eƒe nusrɔ̃lawo ɖo ɖe egbɔ, 3be woabia Yesu be: “Wòe nye ame si wobe ele vava ge loo, alo ame bubue míakpɔ mɔ naa?” 4Yesu ɖo eŋu na wo be: “Miheyi ɖagblɔ nu siwo miese kple nu siwo miekpɔ la na Yohanes: 5#Yes 35.5, 6; Yes 61.1. Ŋkuagbãtɔwo le nu kpɔm; tokunɔwo le nu sem; tekunɔwo le azɔli zɔm; kpodɔlelawo ŋuti le kɔkɔm; wole ame kukuwo fɔm ɖe tsitre, eye wole Nyanyui la gblɔm na ame dahewo. 6Mawu yra ame si mekpɔ nuɖiaɖia le ŋunye o.”

7Esi amedɔdɔ siawo dzo yina la, Yesu ƒo nu le Yohanes ŋu na ameha la be: “Nu kae miedo go yi gbedadaƒo be yewoaɖakpɔ? Aƒla si le ya ƒom lae loo? 8Nu ka ta koŋ miedo go? Be miakpɔ ame aɖe si do awu bɔbɔea? Kpɔ ɖa, awu bɔbɔe dolawo le fiasãwo me. 9Nu ka ta koŋ miedo go? Be miakpɔ Mawu ƒe gbeƒãɖela aɖe ta yea? Ẽ, magblɔe na mi, ame si miekpɔ la wú Mawu ƒe gbeƒãɖela gɔ̃ hã. 10#Mal 3.1. Elabe eya ŋue woŋlɔ nya ɖi le be:

‘Kpɔ ɖa! Mele nye dɔla dɔm ɖa do ŋgɔ,

ame si adzra wò mɔ la ɖo le ŋgɔwò.’

11 Nyateƒe gblɔm mele na mi be le ame siwo nyɔnuwo dzi dome la, ame aɖeke mewú Yohanes mawutsilenamela o. Gake ame suetɔ le dziƒofiaɖuƒe la me gɔ̃ hã wú eyama. 12#Luk 16.16. Tso Yohanes mawutsilenamela ŋɔli va se ɖe fifi la, wole fu wɔm dziƒofiaɖuƒe la, eye ame siwo tsi tre ɖe Mawu ƒe dziɖuɖu ŋu la le ʋiʋlim be yewoaxe mɔ na eƒe vava. 13Mawu ƒe gbeƒãɖelawo katã kple Mose ƒe se la va se ɖe Yohanes dzi la, nya wogblɔ ɖi, 14#Mal 4.5; Mat 17.10-13; Mar 9.11-13. eye ne mielɔ̃ be yewoaxɔ wo dzi ase la, misee be Yohanes ye nye Eliya si wobe ava do ŋgɔ la. 15Ame si si to le la, nesee.”

16 “Ke azɔ la, nu ka ŋu matsɔ dzidzime sia asɔ ɖo? Woɖi ɖevi siwo bɔbɔ nɔ asi me. Wole ɣli dom le gbɔgblɔm na wo nɔewo be: 17‘Míeku dzidzɔkpẽ na mi, ke miegbe ɣeɖuɖu!

Míedo aviha ɖa, ke miegbe konyifafa!’

18 Yohanes va, meɖua nu o, menoa aha o, eye amewo gblɔ be: ‘Gbɔgbɔ vɔ̃ le eme!’ 19Amegbetɔ Vi la va, eɖua nu eye wònoa nu, eye amewo gblɔ be: ‘Mikpɔ nu tsu ɖula, aha tsu nola sia ɖa! Enye nudzɔlawo kple nuvɔ̃wɔlawo xɔlɔ̃.’ Ke ame ƒe nuwɔna mee eƒe nunya dzena le.”

Du siwo mexɔ se o

(Luk 10.13-15)

20Du siwo me Yesu wɔ ŋusẽdɔ geɖeawo le la me tɔwo metrɔ dzime o. Ale wòfa na wo gblɔ be: 21#Yes 23.1-18; Xez 26.1—28.26; Yoel 3.4-8; Amos 1.9, 10; Zax 9.2-4. “Baba na wò, Korazin! Baba na wò, Betsaida! Elabe ɖe wowɔ ŋusẽdɔ siwo wowɔ le mia me le Tiro kple Sidon la, anye ne wotrɔ dzime xoxoxo le akpanya kple afi me. 22Mele egblɔm na mi le nyateƒe me, be Mawu akpɔ nublanui na Tiro kple Sidon le ʋɔnudrɔ̃gbe la, wu mi! 23#Yes 14.13-15; Mos I, 19.24-28. Ke wò Kapernaum, ɖokuiwò dom nèle ɖe dzi kaka yi ɖatɔ dziƒoa? Woabɔbɔ wò ɖe anyi yi ɖase keke tsiẽƒe ke! Elabe ɖe wowɔ nukunu siwo wowɔ le mewò le Sodom la, anye ne dua gali va se ɖe egbe. 24#Mat 10.15; Luk 10.12. Mele egblɔm na wò be Mawu akpɔ nublanui na Sodom le ʋɔnudrɔ̃gbe la wu wò godoo!”

Miva gbɔnye ne miadzudzɔ

(Luk 10.21-22)

25Ɣe ma ɣi la, Yesu gblɔ be: “Tɔ́, dziƒo kple anyigba ƒe Aƒetɔ! Meda akpe na wò be nèɖe nu siwo le ɣaɣla ɖe nunyalawo kple nugɔmeselawo la fia ɖevi suewo. 26Ẽ, Tɔ́, elabe nenemae dze ŋuwò. 27#Yoh 3.35; Yoh 1.18; 10.15. “Tɔ́nye tsɔ nuwo katã de asi nam. Ame aɖeke menya ame si nye Vi la o, negbe Tɔ́ la ko, eye ame aɖeke menya ame si nye Tɔ́ la o, negbe Vi la kple ame si ke Vi la lɔ̃ be yeaɖee afia la ko. 28#Sir 6.24-30; 24.19; 51.23-26.“Mite va gbɔnye, mi ame siwo katã ŋu ɖeɖi te, eye agba le mia wum la, eye nye la, mana miadzudzɔ. 29#Yer 6.16. Mitsɔ nye kɔkuti la ɖo mia ɖokui dzi, eye misrɔ̃ nu tso gbɔnye ne miakpɔ gbɔɖeme, elabe nye dɔme fa, eye mebɔbɔ ɖokuinye ɖe anyi le dzime. 30Nye kɔkuti la tsɔtsɔ le bɔbɔe, eye nye agba la le wodzoe.”

Currently Selected:

Mateo 11: EB14

Highlight

Copy