Luka 1
1
1Amegã Teofilo lɔlɔ̃a,
Ame geɖewo dze agbagba ŋlɔ nu le nya siwo va dzɔ le mía dome la ŋu. 2Woŋlɔ nu siawo ɖi abe ale si ame siwo kpɔ nyadzɔdzɔ siawo teƒe kple ŋku tso gɔmedzedzea me, eye wonye Nya la ƒe dɔlawo la, gblɔe na mí tututu la ene. 3Nye hã medzro nyadzɔdzɔ siawo katã me tsitotsito ɣeyiɣi aɖee nye esi. Ale mebui be anyo be maŋlɔ wo na wò ɖe ɖoɖo nu, 4bene nànya nyateƒe si le nu siwo wofia wò la me.
Woɖe gbeƒã Yohanes mawutsilenamela dzidzi
5 #
Kron I, 24.10. Le Yudea-fia Herodes ŋɔli la, nunɔla aɖe nɔ anyi si ŋkɔe nye Zaxarya. Etso nunɔlawo ƒe hatsotso si woyɔna be Abiya la me. Srɔ̃a hã tso Aron ƒome la me. Eŋkɔe nye Elizabet. 6Wo ame eve la katã nye mawuvɔ̃lawo, eye wowɔa Aƒetɔ la ƒe sewo kple ɖoɖowo dzi pɛpɛpɛ, mokaka manɔŋui. 7Ke vi menɔ wo si o, elabe Elizabet nye konɔ, eye wo ame eve la tsi xɔ ƒè geɖee.
8Esi wòɖo Abiya-hatsotso la dzi be woawɔ subɔsubɔdɔ le mawuxɔa me la, 9wotia Zaxarya le nunɔlawo ƒe kɔa nu be wòayi Aƒetɔ la ƒe xɔa me aɖawɔ lifivɔsa. 10Ameha la katã nɔ gbe dom ɖa le gota le lifivɔsawɔɣi la. 11Aƒetɔ ƒe dɔla do ɖe vɔsamlekpuia ƒe ɖusime heɖe eɖokui fia Zaxarya. 12Esi Zaxarya kpɔe la, eɖi vo, eye wòvɔ̃ ŋutɔ. 13Ke dɔla la gblɔ nɛ be: “Mègavɔ̃ o, Zaxarya, elabe Mawu se wò kukuɖeɖe la. Srɔ̃wò Elizabet adzi ŋutsuvi na wò, eye nàna ŋkɔe be Yohanes.
14Dzi adzɔ wò, eye àtso aseye.
Ɖevi sia dzidzi ado dzidzɔ na ame geɖewo,
15 #
Mos IV, 6.3. elabe anye ame vevi aɖe na Aƒetɔ la.
Mele wain alo aha sesẽ no ge o.
Ke Gbɔgbɔ Kɔkɔe la ayɔe taŋ
tso keke nɔa ƒe dɔme ke.
16Agbugbɔ Israelvi geɖewo ava Aƒetɔ, woƒe Mawu la gbɔ.
17 #
Mal 4.5, 6; Sir 48.10, 11. Anɔ ŋgɔ na Aƒetɔ la ava, eye gbɔgbɔ kple ŋusẽ si nɔ Eliya me la, anɔ eme.
Ana vi tɔ́wo ƒe dɔme natrɔ ɖe wo viwo ŋu.
Ana hã be tosẽlawo nase nu gɔme abe ame dzɔdzɔewo ene,
eye wòadzra Aƒetɔ la ƒe dukɔa ɖo ɖi nɛ.”
18Zaxarya bia be: “Nu ka matsɔ adze sii be esia le eme va ge? Kpɔ ɖa, nye la, meku amegã, eye srɔ̃nye hã ku nyagã.” 19#Dan 8.16; 9.21; Tob 12.15. Mawudɔla la ɖo eŋu nɛ be: “Nyee nye Gabriel, ame si nɔa tsitre ɖe Mawu ŋkume. Wodɔm be maɖe gbeƒã nyanyui sia na wò. 20Ke mèxɔ nye nya sia, si le eme va ge godoo la dzi se o. Eya ta, kpɔ ɖa, wò aɖe atu, eye màgate ŋu aƒo nu o va se ɖe esime nu siawo nava va eme.” 21Esi esia nɔ edzi yim la, ameha la nɔ Zaxarya lalam; ewɔ nuku na wo be etsi mawuxɔa me nenema gbegbe. 22Zaxarya va do go azɔ, ke mete ŋu ƒo nu na wo o. Asi ko wòtsɔ le dzesi wɔmee na wo; ale wodze sii be ekpe nu le mawuxɔa me. 23Esi Zaxarya ƒe subɔsubɔdɔa wu nu la, edzo yi aƒe.
24Emegbe la, srɔ̃a Elizabet fɔ fu. Eɣla eɖokui ɣleti atɔ̃ sɔŋ hegblɔ be: 25“Mikpɔ nu si gbegbe Aƒetɔ la wɔ nam egbe sia ɖa! Eve nunye, eye wòɖe ŋukpe si le ŋunye la ɖa!”
Woɖe gbeƒã Yesu dzidzi
26Le ɣleti ade megbe la, Mawu dɔ eƒe dɔla Gabriel ɖe Galilea-du aɖe, si woyɔna be Nazaret la me. 27#Mat 1.18. Eyi ɖe ɖetugbi aɖe, si ŋugbe wodo na ŋutsu aɖe, si ŋkɔe nye Yosef la gbɔ. Yosef nye Fia David ƒe dzidzimevi. Ɖetugbi la ŋkɔe nye Maria. 28Mawudɔla la va egbɔ va gblɔ nɛ be: “Medo gbe na wò, wò ame sinu wove. Aƒetɔ la li kpli wò!” 29Esi Maria se nya siawo la, etɔtɔ ŋutɔ, eye wòbia eɖokui be: “Gbedoname ka ƒomevie nye esia?” 30Mawudɔla la gblɔ nɛ be: “Mègavɔ̃ o, Maria, elabe Mawu ve nuwò. 31#Mat 1.21. Kpɔ ɖa, èle fu fɔ ge adzi ŋutsuvi. Nàna ŋkɔe be Yesu.
32 #
Sam II, 7.12, 13, 16; Yes 9.7. Anye amegã, eye woayɔe be Mawu Dziƒoʋĩtɔ la Vi.
Aƒetɔ Mawu la aɖoe fiae abe tɔgbuia David ene,
33eye wòaɖu fia ɖe Yakob ƒe dzidzimeviwo dzi tegbee.
Nuwuwu manɔe na eƒe fiaɖuɖu akpɔ o.”
34Maria gblɔ na mawudɔla la be: “Nyemenya ŋutsu o ɖe. Ale ke esia lawɔ ava eme?” 35Mawudɔla la ɖo eŋu nɛ be:
“Gbɔgbɔ Kɔkɔe la ava dziwò,
eye Dziƒoʋĩtɔ la ƒe ŋusẽ ado vɔvɔli ɖe dziwò;
eya ta woayɔ vi si dzi ge nàla la be Kɔkɔetɔ,
Mawu Viŋutsu.
36Kpɔ ɖa, togbɔ be wò ƒometɔ, Elizabet ku nyagã hã la, efɔ fu le ŋutsuvi dzi ge. Ɣleti siae nye adelia na eya, ame si woyɔna be konɔ la. 37#Mos I, 18.14. Elabe naneke meli si wu Mawu ƒe wɔwɔ o.” 38Maria xɔ edzi gblɔ be: “Kpɔ ɖa, nye la, Aƒetɔ la ƒe nyɔnudɔla ko menye. Wò nya la neva eme nam.” Tete mawudɔla la dzo le egbɔ.
Maria yi ɖakpɔ Elizabet ɖa
39Le ŋkeke mawo me la, Maria tso, ɖe abla yi ɖe Yudea-du aɖe, si le tonyigba la dzi la me. 40Ege ɖe Zaxarya ƒeme, eye wòdo gbe na Elizabet. 41Eva eme be esi Elizabet se Maria ƒe gbedoname ko la, ɖevia ho le dɔme nɛ. Tete Gbɔgbɔ Kɔkɔe la yɔ Elizabet taŋ, 42#Yudit 13.18. eye wòdo ɣli sesĩe be: “Woyra wò le nyɔnuwo dome, eye woyra wò dɔmevi la! 43Amenuveve ka gbegbee nye esia be wò, nye Aƒetɔ la nɔ, nèva be yeakpɔm ɖa? 44Kpɔ ɖa, esi mese wò gbedonamea teti ko la, ɖevia ho le dɔme nam dzidzɔtɔe. 45Woyra wò, wò ame si xɔ se be nya si Aƒetɔ la na wogblɔ na wò la ava va eme.”
Maria ƒe kafukafuha
46Maria gblɔ be:
“Nye luʋɔ le Aƒetɔ la kafum,
47eye nye gbɔgbɔ le aseye tsom
ɖe Mawu, nye Xɔla ŋuti.
48 #
Sam I, 1.11. Elabe ekpɔ nublanui
na eƒe kosi maɖinu la.
Tso esia dzi heyina la,
dzidzime ɖe sia ɖe abum yayramee.
49Elabe Ŋusẽtɔ la wɔ nu dzɔtsuwo nam.
Eŋkɔ ŋuti nakɔ!
50Ekpɔa nublanui na ame siwo vɔ̃nɛ
tso dzidzime yi dzidzime.
51Eɖe eƒe ŋusẽ fia;
ekaka dàdalawo kple woƒe tamesusuwo hlẽ.
52 #
Hiob 5.11; 12.19; Sir 10.14. Etu asi ŋusẽtɔwo ƒu anyi
tso woƒe fiazikpuiwo dzi,
eye wòdo ame maɖinuwo ɖe dzi.
53Ena nu nyui dɔwuitɔwo ɖu ɖi ƒo,
eye wòna kesinɔtɔwo dzo yi kple dɔmeɣi.
54Eɖo ŋku edzi ve eƒe dɔla Israel nu,
eye wòkpe ɖe eŋu,
55 #
Mos I, 17.7. #
Sam I, 2.1-10. abe ale si wòdo ŋugbe
na mía tɔgbui Abraham kple eƒe dzidzimeviwo,
be yeawɔ na wo tegbee la ene.”
56Maria tsi Elizabet gbɔ abe ɣleti etɔ̃ ene, eye wòtrɔ yi aƒe.
Yohanes mawutsilenamela dzidzi
57Esi Elizabet ƒe ɣeyiɣi de la, edzi ŋutsuvi. 58Eƒe aƒelikawo kple ƒometɔwo se be Aƒetɔ la ve enu geɖe ŋutɔ, eye wokpɔ dzidzɔ kplii. 59#Mos III, 12.3. Le ŋkeke enyia gbe la, wova be woatso aʋa na ɖevia, eye wodi be yewoatsɔ Zaxarya, si nye tɔ́a ƒe ŋkɔ la, nɛ. 60Ke nɔa gblɔ be: “Ao! Woayɔe be Yohanes boŋ.” 61Woɖo eŋu nɛ be: “Wò ƒometɔ aɖeke metsɔ ŋkɔ sia kpɔ o ɖe!” 62Tete wowɔ dzesi bia tɔ́a Zaxarya be ŋkɔ ka wòdi be woatsɔ na ɖevia mahã. 63Zaxarya bia be woatsɔ nuŋlɔkpe na ye, eye wòŋlɔ ɖe edzi be: “Eŋkɔe nye Yohanes.” Ameawo katã ƒe mo wɔ yaa. 64Enumake Zaxarya ƒe nu ʋu, eƒe aɖeka ɖɔ ɖo, eye wòƒo nu kafu Mawu. 65Vɔvɔ̃ ɖo eƒe aƒelikawo katã. Amewo ƒo nu le nya siawo ŋuti hoo le Yudea-tonyigba blibo la dzi. 66Ame siwo katã see la bu eŋuti hegblɔ be: “Nu ka gɔ̃ ɖevi sia ava zu? Elabe Aƒetɔ la ƒe ŋku le eŋu.”
Zaxarya ƒe gbeƒãɖeɖe Mawu ƒe gbedeasi
67Gbɔgbɔ Kɔkɔe la yɔ Yohanes tɔ́, Zaxarya taŋ, eye wòɖe gbeƒã Mawu ƒe gbedeasi be:
68“Woakafu Aƒetɔ Israel ƒe Mawu la,
elabe eva kpɔ eƒe dukɔa ɖa,
eye wòxɔe ɖe agbe.
69Ena Xɔla ŋusẽtɔ do na mí
tso eƒe dɔla David ƒe ƒomea me.
70Mawu do ŋugbe
to eƒe blemagbeƒãɖela kɔkɔeawo dzi,
71be woaɖe mí tso míaƒe ketɔwo
kple ame siwo lé fu mí la si me.
72Ebe yeave mía nu,
abe ale si yedo ŋugbe
na mía tɔgbuiwo la ene,
eye yeaɖo ŋku yeƒe nubabla kɔkɔe la dzi.
73Awɔ atam si wòka na mía tɔgbui Abraham la dzi,
74be yeana woaɖe mí tso míaƒe futɔwo si me,
bene míasubɔ ye vɔvɔ̃ manɔmee.
75Mía ŋuti nakɔ,
eye míawɔ nu dzɔdzɔe le eŋkume,
le míaƒe agbe me ŋkekewo katã me.
76 #
Mal 3.1. Ke vinye, woayɔ wò be
Mawu Dziƒoʋĩtɔ la ƒe gbeƒãɖela.
Elabe ànɔ Aƒetɔ la ŋgɔ,
adzra eƒe toƒe ɖo.
77Àna eƒe dukɔmeviwo nadze sii
be woxɔ yewo ɖe agbe,
eye wotsɔ yewoƒe nuvɔ̃wo ke yewo.
78Aƒetɔ la lɔ̃ mí,
ale be ŋu ake na mí tso dziƒo ke.
79 #
Yes 9.2. Kekeli aklẽ
na ame siwo le viviti tsiɖitsiɖi me
kple ame siwo le ku ƒe ŋusẽ te la,
eye wòakplɔ mí ayi ŋutifafa mee.”
80Ɖevi la va tsi, eye wòkpɔ ŋusẽ le gbɔgbɔ me. Enɔ gbedadaƒo va se ɖe esime woɖee fia Israel-dukɔ la.
Currently Selected:
Luka 1: EB14
Highlight
Share
Copy
Want to have your highlights saved across all your devices? Sign up or sign in
EƲEGBE BIBLIA © The Bible Society of Togo, 2014.
