Yohanes 9

Yesu ʋu ŋku na ame si wodzi ŋkuagbãtɔe la

1Esi Yesu va yina la, ekpɔ ame aɖe si wodzi ŋkuagbãtɔe. 2Eƒe nusrɔ̃lawo biae be: “Nufiala, ame kae wɔ nuvɔ̃, be wodzi ame sia ŋkuagbãtɔe? Eya ŋutɔe loo, alo edzilawo yea?” 3Yesu ɖo eŋu be: “Menye ame sia alo edzilawoe wɔ nuvɔ̃ o, ke boŋ wodzii alea be woaɖe Mawu ƒe dɔwɔwɔ afia to eyama dzi. 4Zi ale si míele ŋkeke me la, ele na mí be míawɔ dɔ na ame si dɔm ɖa la. Zã gbɔna dodo ge esime ame aɖeke mate ŋu agawɔ dɔ o. 5#Mat 5.14; Yoh 8.12. Zi ale si mele xexea me la, nyee nye xexea me ƒe kekeli.” 6Esi Yesu gblɔ esia la, eɖe ta ɖe anyigba nya anyii eye wòtsɔ ba la sisi ɖe ame la ƒe ŋkuwo dzi. 7Egblɔ nɛ be: “Heyi nàle tsi le Siloam-tá me.” (Ŋkɔ “Siloam” gɔmee nye “Wodɔe ɖa.”) Ale ŋutsu la yi ɖale tsia, eye wòle nu kpɔm trɔ gbɔ. 8Eƒe aƒelikawo kple ame siwo kpɔnɛ wònɔ nu biam tsã la, bia be: “Menye ame siae bɔbɔ nɔ anyi nɔ nu biam oa?” 9Ame aɖewo gblɔ be: “Eyae.” Ke bubuawo be: “Ao, amee ɖi ame.”

Eya ŋutɔ gblɔ be: “Nyee.” 10Wobiae be: “Ale wɔ wò ŋkuwo ʋu?” 11Eɖo eŋu na wo be: “Ŋutsu aɖe si ŋkɔe nye Yesu lae nya anyi hetsɔe sisi ɖe ŋku dzi nam, eye wògblɔ nam be, ‘Yi ɖale tsi le Siloam me.’ Meyi ɖale tsia eye mele nu kpɔm.”

12Wobiae be: “Afi ka wòle?”

Eɖo eŋu na wo be: “Nyemenya o.”

Farisitɔwo bia gbe ame si ƒe ŋkuwo ʋu

13Wokplɔ ame si nye ŋkuagbãtɔ tsã la va Farisitɔwo gbɔ. 14Ŋkeke si dzi Yesu nya anyi hetsɔ sisi ɖe ame la ƒe ŋkuwo dzi, eye wòʋu ŋku nɛ la nye Dzudzɔgbe. 15Eya ta Farisitɔwo gabia ale si wòwɔ hafi eƒe ŋku ʋu lae. Egblɔ na wo be: “Anyie wònya hetsɔ sisi ɖe ŋku dzi nam, eye esi meyi ɖale tsi ko la, mele nu kpɔm.”

16Farisitɔ aɖewo gblɔ be: “Menye Mawu gbɔe ame sia tso o, elabe mewɔ ɖe Dzudzɔgbe ƒe ɖoɖo dzi o.” Ke ame bubuwo ya bia be: “Ale ke nuvɔ̃wɔla ate ŋu awɔ dzesi siawoe?” Tete ameawo dome ma. 17Farisitɔwo yi edzi bia ŋutsu la be: “Esi wònye eyae ʋu ŋku na wò ɖe, ale ke nèbu le eyama ŋuti?” Ŋutsu la ɖo eŋu be: “Mawu ƒe gbeƒãɖelae wònye.” 18Yudatɔwo mexɔe se be ŋutsu si nye ŋkuagbãtɔ tsã la ƒe ŋkue ʋu wòte ŋu le nu kpɔm o, va se ɖe esime woyɔ ame si ƒe ŋku ʋu la dzilawo vɛ. 19Wobia wo be: “Mia vi, si miebe yewodzi ŋkuagbãtɔe lae nye ame sia? Ale ke wɔ wòle nu kpɔm azɔ?” 20Edzilawo ɖo eŋu be: “Míenya be mía vie wònye. Edzɔ ŋkuagbãtɔe. 21Ke ale si wɔ wòle nu kpɔm la, míenya o, eye míenya ame si ʋu ŋku nɛ hã o. Mibia eya ŋutɔ; etsi, aɖe eɖokui nu!” 22Edzilawo gblɔ nya sia elabe wonɔ vɔvɔ̃m na Yudatɔwo. Elabe Yudatɔwo ɖo gbe ɖi be ne ame aɖe aʋu eme be Yesue nye Kristo la la, woanyàe le ƒuƒoƒea. 23Eya ta edzilawo gblɔ be: “Etsi; mibia eya ŋutɔ.” 24Woyɔ ame si wodzi ŋkuagbãtɔe la vɛ zi evelia hegblɔ nɛ be: “Tà Mawu nàto nyateƒe. Míawo míenya be nuvɔ̃wɔlae nye ame sia.” 25Ŋutsu la ɖo eŋu na wo be: “Enye nuvɔ̃wɔla o, meɖanye nuvɔ̃wɔla o, nye ya nyemenya o. Nu ɖeka ko menya: eyae nye be ŋkuagbãtɔe menye tsã, ke azɔ la, mele nu kpɔm.” 26Wobiae be: “Nu ka wòwɔ na wò? Ale ke wòʋu ŋku na wòe?” 27Eɖo eŋu na wo be: “Megblɔe na mi xoxo gake miedi be yewoasee o. Nu ka ta miedi be yewoagasee? Alo ɖe miawo hã miedi be yewoazu eƒe nusrɔ̃lawoa?” 28Wodzui gblɔ be: “Wò koe anye eƒe nusrɔ̃la, ke míawo la, Mose ƒe nusrɔ̃lawo míenye. 29Míenya be Mawu ƒo nu na Mose, ke ame sia ya la, míenya afi si wòtso o.” 30Ŋutsu la ɖo eŋu na wo be: “Ale ke? Ewɔ nuku nam lo! Mienya afi si wòtso o, ke eyae ʋu nye ŋkuwo. 31Míenya be Mawu meɖoa to nuvɔ̃wɔlawo o, ke ne ame aɖe subɔa Mawu, eye wòwɔa eƒe lɔlɔ̃nu la, Mawu ɖoa toe. 32Tso xexea me ƒe gɔmedzedze va ɖo egbe kpa, míese kpɔ be woʋu ŋku na ame si wodzi ŋkuagbãtɔe la kpɔ o. 33Nenye ame sia ɖe metso Mawu gbɔ o la, anye ne mate ŋu awɔ naneke o.” 34Wogblɔnɛ be: “Wò si wodzi ɖe nuvɔ̃ me koŋ la, wòe be yeafia nu mía?” Tete woɖee le ha me.

Gbɔgbɔ me ŋkugbagbã

35Yesu se be woɖe ŋkuagbãtɔ la le ha me, eya ta esi wòkpɔe la, ebiae be: “Èxɔ Amegbetɔ Vi la dzi sea?” 36Ŋutsu la ɖo eŋu be: “Amegã, eyae nye ame ka? Gblɔe nam ne maxɔ edzi ase.” 37Yesu gblɔ nɛ be: “Èkpɔ amea xoxo; eyae nye esi le nu ƒom na wò.” 38Ŋutsu la gblɔ be: “Aƒetɔ, mexɔe se.” Tete wòdze klo subɔe. 39Yesu gblɔ be: “Meva xexea me be madrɔ̃ ʋɔnu, bene ame siwo mele nu kpɔm o la nakpɔ nu, eye ame siwo le nu kpɔm la ƒe ŋku nagbã.” 40Farisitɔ siwo te ɖe Yesu ŋu la se nya la eye wobiae be: “Míawo hã míaƒe ŋku gbãa?” 41Yesu ɖo eŋu na wo be: “Nenye miaƒe ŋku ɖe wògbã la, anye ne womabu fɔ mi o, ke azɔ esi miebe, ‘Míele nu kpɔm’ la, miaƒe nuvɔ̃wo le mia dzi.”

Currently Selected:

Yohanes 9: EB14

Highlight

Copy