Yohanes 15

Yesu, wainti vavãtɔ la

1 “Nyee nye wainti vavãtɔ la, eye Tɔ́nyee nye agbledela la. 2Alɔ sia alɔ si le ŋunye eye metsea ku o la, elãnɛ ɖa. Ke ɖe sia ɖe si tsea ku la, eɖea eŋu nyuie bene wòatse ku geɖe wu. 3Wokɔ mia ŋuti xoxo to nya si megblɔ na mi la me. 4Minɔ menye eye nye hã manɔ mia me. Ale si alɔa ɖeɖe mate ŋu atse ku le eɖokui si o, negbe ɖe wòle waintia ŋu la, nenema ke miawo hã, ne mienɔ me nye o la miate ŋu atse ku o.

5 “Nyee nye wainti la, eye miawo mienye alɔawo. Ame si wɔ ɖeka kplim eye nye hã mewɔ ɖeka kplii la, eyae tsea ku geɖe elabe nye manɔmee la, miate ŋu awɔ naneke o. 6Ame si mewɔ ɖeka kplim o la, wotsɔnɛ ƒua gbe, abe atilɔ ene eye wòƒuna. Woƒoa ƒu atilɔawo ƒua gbe ɖe dzo me wofiãna. 7Ne miewɔ ɖeka kplim eye nye nyawo hã le mia me la, mibia nu sia nu si miedi la ko; woawɔe na mi. 8Azɔ ne mietse ku geɖe la, esia ɖe Tɔ́nye ƒe ŋutikɔkɔe fia, eye wòɖo kpe edzi be nye nusrɔ̃lawo mienye. 9Ale si Tɔ́ la lɔ̃m la, nenemae nye hã melɔ̃ mii. Mina nye lɔlɔ̃ na mi nayi edzi le mia me. 10Ne mielé nye seawo me ɖe asi la, nye lɔlɔ̃ na mi ayi edzi le mia me, abe ale si nye hã melé Tɔ́nye ƒe seawo me ɖe asi, eye eƒe lɔlɔ̃ nam le edzi yim le menye la ene.

11 “Mele nya siawo gblɔm na mi, ne dzidzɔ si le menye la nanɔ miawo hã mia me, bene miaƒe dzidzɔ nade blibo. 12#Yoh 13.34; 15.17; Yoh I, 3.23; Yoh II, 1.5. Se si nam mele mie nye be: Milɔ̃ mia nɔewo abe ale si melɔ̃ mii ene. 13Lɔlɔ̃ deto meli wu be ame natsɔ eƒe agbe ake ɖe xɔlɔ̃a ta o. 14Ne miewɔ ɖe nye nyawo dzi la, ekema mienye xɔ̃nyewo. 15Nyemegale mia yɔm be dɔlawo o, elabe dɔla menya nu si eƒe aƒetɔ wɔna o. Ke meyɔ mi be xɔ̃nyewo, elabe nu siwo katã mese tso Tɔ́nye gbɔ la, mena mienya wo. 16Menye miawoe tiam o, ke boŋ nyee tia mi, eye meɖo mi ɖa be miayi aɖatse ku eye be ku si miatse la nanɔ anyi ɖaa. Ale be nu sia nu si miabia Tɔ́ la le nye ŋkɔ me la, wòana mi. 17Ale se si mele mia nam lae nye be: Milɔ̃ mia nɔewo.

Xexea me ƒe fuléle

18 “Ne xexea me lé fu mi la, minyae be elé fum do ŋgɔ na mi. 19Ne xexea me tɔ mienye la, anye ne xexea me lɔ̃ mi abe etɔwo ene. Ke esi metia mi tso xexea me eye mieganye xexea me tɔ o tae wòlé fu mi ɖo. 20#Mat 10.24; Luk 6.40; Yoh 13.16. Miɖo ŋku nya si megblɔ na mi la dzi be: ‘Ŋusẽ mele subɔla si wu eƒe aƒetɔ o.’ Ne woti yonyeme la, woati miawo hã mia yome tsã. Ne wolé nye nyawo me ɖe asi la, woalé miawo hã mia tɔ me ɖe asi. 21Ke woawɔ nu siawo katã ɖe mia ŋuti le tanye, elabe womenya ame si dɔm ɖa la o. 22Ne ɖe nyemeva ƒo nu na wo o la, anye ne womewɔ nuvɔ̃ o. Ke azɔ la, wowɔ nuvɔ̃ eye taflatsɛdodo aɖeke meli na wo o. 23Ame sia ame si lé fum la, lé fu Tɔ́nye hã. 24Ne ɖe nyemewɔ dɔ si ame aɖeke mewɔ kpɔ o la le wo dome o la, anye ne womewɔ nuvɔ̃ o. Ke azɔ la, wokpɔ nu siwo mewɔ gake wolé fu nye kple Tɔ́nye siaa. 25#Ps 35.19; 69.4. Esia va eme ale be nu si woŋlɔ ɖe woƒe segbalẽa me la nava eme be: ‘Ɖeko wolé fum dzodzro.’

26 “Ke mele Nyaxɔɖeakɔla ɖo ge ɖe mi tso Tɔ́ la gbɔ. Eyae nye Gbɔgbɔ si fiana be Mawu nye nyateƒetɔ. Ne etso Tɔ́ la gbɔ va la, aɖi ɖase na mi le ŋunye. 27Miawo hã ɖasefowo mianye elabe miele gbɔnye tso keke gɔmedzedzea me ke.

Currently Selected:

Yohanes 15: EB14

Highlight

Copy