Yohanes 11

Lazaro ƒe ku

1 # Luk 10.38, 39. Azɔ ŋutsu aɖe si ŋkɔe nye Lazaro la le dɔ lém. Etso Betania, kɔƒe si me Maria kple nɔvia Marta nɔ la me. 2#Yoh 12.3. Maria siae si ami ʋeʋẽe na Aƒetɔ la, eye wòtsɔ eƒe taɖa tutu eƒe afɔwo ŋui. Nɔvia ŋutsue nye Lazaro si le dɔ lém. 3Ale nɔvinyɔnu siawo ɖo du ɖe Yesu be: “Aƒetɔ, wò lɔlɔ̃tɔ le dɔ lém!” 4Ke esi Yesu see la, egblɔ be: “Dɔléle sia menye kudɔe o, ke boŋ enye nu si woatsɔ ado Mawu ɖe dzi, eye to eya me la, woado Mawu Vi la hã ɖe dzi.”

5Azɔ la, Yesu lɔ̃ Marta kple nɔvia nyɔnua kpakple Lazaro. 6Ale esi wòse be Lazaro ƒe lã me gblẽ la, egatsi afi si wòle la ŋkeke eve ɖe edzi. 7Esia megbe la, egblɔ na nusrɔ̃laawo be: “Mina míatrɔ ayi Yudea.” 8Ke nusrɔ̃laawo gblɔ nɛ be: “Nufiala, nyitsɔ laa ko Yudatɔwo nɔ mɔnu dim be yewoaƒu kpe wò, ye nèdi be yeagayi afi ma kea?” 9Yesu ɖo eŋu na wo be: “Menye gaƒoƒo wui evee le ŋkeke ɖeka me oa? Ne ame aɖe le zɔzɔm le ŋkeke me la, meklia nu o, elabe xexeme ƒe kekeli na wòle nu kpɔm. 10Ke ne ame aɖe le zɔzɔm le viviti me la, eklia nu, elabe kekeli mele eyama me o.” 11Esi wògblɔ nya siawo vɔ la, egblɔ kpe ɖe eŋu be, “Mía xɔlɔ̃ Lazaro le alɔ̃ dɔm, ke meyina enyɔ ge.” 12Ale nusrɔ̃laawo gblɔ nɛ be: “Aƒetɔ, nenye alɔ̃ dɔm wòle la, ekema ahaya.” 13Togbɔ be Lazaro ƒe ku ŋutie Yesu le nu ƒom le hã la, ameawo bu be alɔ̃ ŋutɔ wòwɔnɛ. 14Ale Yesu ʋu eme na wo faa gblɔ be: “Lazaro ku. 15Le miawo ta la, edzɔ dzi nam be nyemele eteƒe o, bene miaxɔ ase. Mina míayi egbɔ.” 16Toma, ame si woyɔna be Evenɔvi la, gblɔ na etɔ nusrɔ̃lawo be: “Mina míawo hã míayi aɖaku kplii!”

Yesue nye tsitretsitsi la kple agbe la

17Azɔ esi Yesu va ɖo la, ekpɔ be woɖi Lazaro ŋkeke ene sɔŋ va yi. 18Betania te ɖe Yerusalem ŋu anɔ abe agbadroƒe eve ene, 19eya ta Yudatɔ geɖewo va be yewoafa akɔ na Marta kple Maria le wo nɔvia ƒe ku ŋuti. 20Esi Marta se be Yesu gbɔna la, eyi ɖakpee, ke Maria ya tsi aƒea me. 21Marta gblɔ na Yesu be: “Aƒetɔ, ɖe nèle afii la, anye ne nɔvinye meku o. 22Ke fifia hã menya be nu sia nu si nèbia Mawu la, ana wò.” 23Yesu gblɔ nɛ be: “Nɔviwò la agatsi tsitre.” 24#Mak II, 7.22, 23; 12.44.Marta gblɔ nɛ be: “Menya be agatsi tsitre le ŋkeke mlɔetɔ dzi, ne ame kukuwo le tsitre tsim.” 25Yesu gblɔ nɛ be: “Nyee nye tsitretsitsi la kple agbe la. #11.25: Mawunyagbalẽ xoxo aɖewo mede “kple agbe la” eme o. Ame si xɔ dzinye se la, ne eku gɔ̃ hã la, anɔ agbe, 26eye ame sia ame si le agbe eye wòxɔ dzinye se la, mele kuku ge akpɔ o. Èxɔ esia dzi sea?” 27Eɖo eŋu nɛ be: “Ẽ, Aƒetɔ, mexɔe se be wòe nye Kristo la, Mawu Vi, ame si gbɔna xexea me la.”

Yesu fa avi

28Esi Marta gblɔ nya sia vɔ la, eyi ɖayɔ nɔvia Maria eye wògblɔ nɛ dzaa be: “Nufiala la va ɖo eye wòle yɔwòm.” 29Esi Maria see la, etso kaba yi egbɔ. 30Le ɣeyiɣi sia me la, Yesu gale afi si Marta yi ɖakpee le la ko eye mekpɔ ge ɖe kɔƒea me haɖe o. 31Esi Yudatɔ siwo le egbɔ le aƒea me nɔ akɔ fam nɛ kpɔe wòtso do go la, wobu be yɔdoa gbɔ yim wòle, avi fa ge, ale wodze eyome. 32Esi Maria va ɖo afi si Yesu le hekpɔe la, edze klo ɖe eƒe afɔnu hegblɔ nɛ be: “Aƒetɔ, ne ɖe nèle afii la, anye ne nɔvinye meku o.” 33Azɔ esi Yesu kpɔ Maria wòle avi fam, eye Yudatɔ siwo kplɔe ɖo la hã le avi fam kplii la, edo dɔmedzoe eye wòɖe hũ le eɖokui me. Ebia be: 34“Afi kae mieɖii ɖo?” Woɖo eŋu nɛ be: “Aƒetɔ, va kpɔe ɖa.” 35Yesu fa avi. 36Ale Yudatɔwo gblɔ be: “Mikpɔ ale si gbegbe wòlɔ̃e la ɖa!” 37Ke wo dometɔ aɖewo gblɔ be: “Ale ke wɔ ame sia si ʋu ŋku na ŋkuagbãtɔ la, mete ŋu na be ŋutsu sia nagaku o?”

Yesu fɔ Lazaro tso ku me

38Dɔmedzoe la gale Yesu me, wòva yɔdo la gbɔe. Yɔdoa nye agado si nu wotsyɔ kpee. 39Yesu gblɔ be: “Mikɔ kpe la ɖa.”

Ke Marta, ame kukua nɔvinyɔnu, gblɔ nɛ be: “Aƒetɔ, fifia anɔ ʋeʋẽm elabe exɔ ŋkeke ene.” 40Yesu gblɔ nɛ be: “Nyemegblɔ na wò be ne èxɔ se ko la, àkpɔ Mawu ƒe ŋutikɔkɔe oa?” 41Ale wokɔ kpe la ɖa. Yesu wu mo dzi hegblɔ be: “Tɔ́nye, meda akpe na wò be èɖo tom. 42Menya be èɖoa tom ɣe sia ɣi, gake ame siwo le tsitre ɖe afi sia la tae mele nya sia gblɔm ɖo, be woaxɔe ase be wòe dɔm ɖa.” 43Esi wògblɔ nya siawo la, edo ɣli sesĩe be: “Lazaro lee, do va!” 44Kasia ame si ku la do va; ameɖivɔ siwo wotsɔ bla asi kple afɔ nɛ la gale eŋu, eye taku si wotsɔ bla mo nɛ la hã le ŋkume nɛ. Yesu gblɔ na wo be: “Mitu nuawo le eŋu ne wòadzo.”

Nugbeɖoɖo ɖe Yesu ŋu

(Mat 26.1-5; Mar 14.1-2; Luk 22.1-2)

45Esi Yudatɔ siwo va Maria gbɔ la kpɔ nu si Yesu wɔ la, woxɔ edzi se, 46ke wo dometɔ aɖewo yi ɖagblɔ nu si Yesu wɔ la na Farisitɔwo. 47Tete nunɔlagãwo kple Farisitɔwo kpe ta eye wogblɔ be: “Nu ka wɔ ge míala? Elabe ŋutsu sia wɔ dzesi geɖewo. 48Ne míeɖe mɔ nɛ wòyi edzi alea la, ame sia ame ava xɔ edzi ase, eye Romatɔwo ava gbã míaƒe kɔkɔeƒe la kple dukɔ la siaa.” 49Ke wo dometɔ ɖeka si ŋkɔe nye Kayafa, ame si nye nunɔlagã le ƒe ma me la gblɔ na wo be: “Nugɔmesese ve mi loo! Mienya naneke kura o! 50Miese egɔme be ne ame ɖeka ku ɖe dukɔa nu la, enyo na mi wu be ame sia ame natsrɔ̃ le dukɔa me oa?” 51Megblɔ nya sia le eɖokui si o, ke boŋ abe nunɔlagã le ƒe ma me ene la, egblɔ nya ɖi be ele be Yesu naku ɖe dukɔ blibo la nu. 52Menye be wòaku ɖe dukɔa nu ɖeɖe ko o, ke boŋ be wòaƒo Mawu vi siwo kaka ɖe anyigba bubuwo dzi la nu ƒu ɖekae hã. 53Tso gbe ma gbe la, wonɔ nugbe ɖom ɖe Yesu ŋu be yewoawui.

54Ale Yesu megadona ɖe Yudatɔwo dome be woakpɔ o. Eyi ɖe du aɖe si woyɔna be Efrayim la me le gbedadaƒo ɖanɔ afi ma kple eƒe nusrɔ̃lawo. 55Azɔ Yudatɔwo ƒe Paska la gogo, eye ame geɖewo tso nutoawo me va Yerusalem do ŋgɔ na ŋkekenyui la be yewoakɔ yewo ɖokui ŋuti. 56Esi wotsi tsitre ɖe mawuxɔ la me la, wonɔ Yesu dim hebia wo nɔewo be: “Ale ke nèbu? Mele ŋkekenyui la ɖuƒe va ge oa?” 57Ke nunɔlagãwo kple Farisitɔwo ɖe gbe na amewo be ne ame aɖe nya afi si wòle la, nena yewoanya, ale be yewoayi aɖalée.

Currently Selected:

Yohanes 11: EB14

Highlight

Copy