Yohanes 1

Nya si naa agbe la

1Le gɔmedzedzea me la, Nya la li. Eye Nya la li kple Mawu, eye Nya la nye Mawu. 2Eya kple Mawu li le gɔmedzedzea me. 3Wowɔ nuwo katã to Eyama dzi. Eye Eya manɔmee la, womewɔ naneke o. 4Nya la me agbe dzɔ tso, eye agbe siae he kekeli vɛ na amegbetɔ. 5Kekeli la klẽna ɖe viviti me, ke viviti la mete ŋu tsii kpɔ o.

6 # Mat 3.1; Mar 1.4; Luk 3.1, 2. Mawu dɔ eƒe dɔla aɖe ɖa. Eŋkɔe nye Yohanes. 7Ame sia va be yeaɖi ɖase le kekelia ŋuti be amewo katã nato ye dzi axɔ ase. 8Menye Yohanes ye nye kekeli la o. Ɖeko eya va be yeaɖi ɖase le kekeli la ŋuti.

9Kekeli vavãtɔ, si klẽna na ame sia ame la gbɔna xexea me. 10Kekeli sia le xexea me, eye eya dzie woto wɔ xexea me. Ke xexea me medze sii o. 11Eva eya ŋutɔ wo de, ke wo detɔwo mexɔe o. 12Ke ame siwo katã xɔe, eye woxɔ edzi se la, ena ŋusẽ wo be woazu Mawu viwo. 13Ame siawo ƒe dzidzi mele abe dzɔdzɔme tɔ ene o. Wometo ŋutilã ƒe dzodzro alo ŋutsu ƒe didi me dzi wo o. Ke boŋ Mawu ŋutɔe lɔ̃ be yeaxɔ wo awɔ ye viwoe.

14Nya la va zu amegbetɔ henɔ mía dome, eye amenuvenu kple nyateƒe yɔe taŋ. Míekpɔ eƒe ŋutikɔkɔe. Ŋutikɔkɔe si wòxɔ abe Tɔ́ la Vi ɖeka hɔ̃ la ene la. 15Yohanes ɖi ɖase le eŋuti, do ɣli be: “Ame sia ŋutie megblɔ le be, ‘Ame si le megbenye gbɔna la do ŋgɔ nam elabe eli hafi meva dzɔ.’ ” 16Tso eƒe blibonyenye me la mí katã, míxɔ amenuvenu ɖe amenuvenu dzi. 17Elabe Mose dzie se la to va, ke amenuveve kple nyateƒe la la, Yesu Kristo dzie woto va. 18Ame aɖeke mekpɔ Mawu kpɔ o. Via ɖeka hɔ̃ si tso Tɔ́ la ƒe akɔnu va lae gblɔ ame si Mawu nye la fia mí.

Yohanes mawutsilenamela ƒe gbedeasi

(Mat 3.1-12; Mar 1.1-8; Luk 3.1-18)

19Yudatɔwo dɔ nunɔlagãwo kple Levitɔwo ɖa tso Yerusalem ɖe Yohanes gbɔ be woabiae be ame ka wònye mahã. 20Yohanes meɣla nya aɖeke ɖe wo o, ke boŋ eʋu eme hekɔ nya me gblɔ be: “Menye nyee nye Kristo la o.” 21#Mal 4.5; Mos V, 18.15, 18; Sir 48.10, 11. Wobiae be: “Ekema ame kae nènye? Wòe nye Eliyaa?” Eɖo eŋu be: “Menye nyee o.” Woyi edzi bia Yohanes be: “Wòe nye gbeƒãɖela laa?” Eɖo eŋu be: “Ao.” 22Tete wobiae be: “Ekema ame ka koŋ nènye? Na ŋuɖoɖo mí ne míaɖagblɔ na ame siwo dɔ mí ɖa la. Ame ka wò ŋutɔ nèbe yenye?” 23#Yes 40.3. Yohanes gblɔ na wo be: “Nyee nye ame si le ɣli dom le gbedadaƒo la ƒe gbe. ‘Midzɔ Aƒetɔ la ƒe mɔ la’ abe ale si gbeƒãɖela Yesaya gblɔe ɖi ene.”

24Azɔ la, ame siwo wodɔ ɖa tso Farisitɔwo gbɔ la 25bia Yohanes be: “Ne menye wòe nye Kristo la alo Eliya alo Mawu ƒe gbeƒãɖela la o la, ale ke wɔ nèle mawutsi lem na amewo?” 26Yohanes ɖo eŋu na wo be: “Mele mawutsi lem na amewo kple tsi, gake ame aɖe tsi tsitre le mia dome, ame si miedze sii o. 27Ele megbenye gbɔna, eye nyemedze atu eƒe afɔkpaka gɔ̃ hã o.” 28Nya siawo katã va eme le Betania le Yordan godo, afi si Yohanes nɔ tsi lem na amewo le la.

Mawu ƒe Alẽvi la

29Esi ŋu ke eye Yohanes kpɔ Yesu wògbɔna ɖe egbɔ la, egblɔ be: “Mikpɔ, Mawu ƒe Alẽvi si tsɔ xexea me ƒe nuvɔ̃ yina lae nye esi! 30Eyae nye ame si ŋuti megblɔ le be: ‘Ame aɖe le megbenye gbɔna, ede ŋgɔ wum’ elabe eli hafi meva dzɔ. 31Nye ŋutɔ hã nyemedze si ame sia o, gake meva hele mawutsi lem na amewo kple tsi bene woaɖe eyama afia Israel-dukɔ la.” 32Yohanes gblɔ le eŋuti be: “Mekpɔ gbɔgbɔ la wòle abe ahɔnɛ ene ɖiɖi tso dziƒo va nɔ edzi. 33Nye la nyemedze sii o; ke ame si dɔm ɖa be male mawutsi na amewo kple tsi la gblɔ nam be: ‘Ame si dzi nàkpɔ Gbɔgbɔ la wòaɖi ɖo, ahanɔ edzi la, eyae nye ame si ale tsi na amewo kple Gbɔgbɔ Kɔkɔe la.’ 34Azɔ nye la, mekpɔe, eya ta mele egblɔm na mi be ame siae nye Mawu Vi la.”

Yesu ƒe nusrɔ̃la gbãtɔwo

35Esi ŋu ke la, Yohanes kple eƒe nusrɔ̃la eve tsi tsitre ɖi 36eye wòkpɔ Yesu wòva yina. Egblɔ be: “Mikpɔ ɖa, Mawu ƒe Alẽvi lae nye esi!” 37Nusrɔ̃la eveawo se nu si Yohanes gblɔ; ale wodze Yesu yome. 38Yesu trɔ, eye esi wòkpɔ wo le eyome la, ebia wo be: “Nu ka dim miele?” Woɖo eŋu nɛ be: “Nufiala, afi kae nènɔna?” 39Yesu gblɔ na wo be: “Miva kpɔe ɖa.” (Ɣe ma ɣi anye ɣetrɔ ga ene me lɔƒo.) Ale woyi kplii ɖakpɔ enɔƒe, eye wonɔ egbɔ gbe ma gbe. 40Nusrɔ̃la eve, siwo se Yohanes ƒe nya la eye wodze Yesu yome la dometɔ ɖekae nye Andrea, Simon Petro nɔvi. 41Eya kpɔ nɔvia Simon gbã, eye wògblɔ nɛ be: “Míekpɔ Mesia la.” (Esia gɔmee nye Kristo.) 42Ale wòkplɔ Simon va Yesu gbɔ. Yesu kpɔe dũu, eye wògblɔ nɛ be: “Wòe nye Simon, Yohanes vi laa? Tso esia dzi la, woayɔ wò be Kefas,” si gɔmee nye kpe.

Yesu yɔ Filipo kple Nataniel

43Esi ŋu ke la, Yesu ɖo be yeayi Galilea. Ekpɔ Filipo eye wògblɔ nɛ be: “Dze yonyeme.” 44Filipo tso Betsaida si nye Andrea kple Petro ƒe du me. 45Filipo kpɔ Nataniel, eye wògblɔ nɛ be: “Míeke ɖe ame si ŋuti Mose kple Mawu ƒe gbeƒãɖelawo ŋlɔ nya ɖi le la ŋu. Eyae nye Yesu, Yosef vi tso Nazaret.” 46Nataniel bia be: “Ɖe nu vavã aɖe ate ŋu ado tso Nazaret hã?” Filipo gblɔ nɛ be: “Va kpɔe ɖa!” 47Esi Yesu kpɔ Nataniel wògbɔna ɖe egbɔ la, egblɔ le eŋuti be: “Kpɔ ɖa, Israel vi akuakua ŋutɔe nye ame sia. Alakpa aɖeke mele eme o.” 48Nataniel bia Yesu be: “Afi ka nènyam le?” Yesu ɖo eŋu nɛ be: “Hafi Filipo nayɔ wò le gbotia te la, mekpɔ wò xoxo.” 49Nataniel gblɔ be: “Nufiala, wòe nye Mawu Vi la. Israel-fia lae nènye!” 50Yesu gblɔ nɛ be: “Esi megblɔ be mekpɔ wò le gbotia te la, èxɔe sea? Èle nu gãwo wu esiawo kpɔ ge.” 51#Mos I, 28.12. Yesu gayi edzi gblɔ nɛ be: “Nyateƒe tom mele na wò be àkpɔ dziƒo nu wòaʋu, eye àkpɔ mawudɔlawo anɔ dzi liam anɔ ɖiɖim ɖe Amegbetɔ Vi la dzi.”

Currently Selected:

Yohanes 1: EB14

Highlight

Copy