Amedɔdɔawo ƒe Dɔwɔwɔwo KPƆKPLƆYIƉEME
KPƆKPLƆYIƉEME
“Amedɔdɔawo ƒe Dɔwɔwɔwo” nye “Nyanyui la, abe ale si Luka ŋlɔe ene la” ƒe dziyiyi. Agbalẽ sia ƒe taɖodzinu vevitɔe nye be wòaƒo nu le ale si Gbɔgbɔ Kɔkɔe la kplɔ Yesu yomedzela gbãtɔwo ale be wote ŋu kaka Nyanyui si tso Yesu ŋu “le Yerusalem, Yudea kple Samaria nutowo me yi ɖase xexea me ƒe seƒe ke lae” ŋu (1.8). Agbalẽa nye ŋutinya si ƒo nu le ale si Kristotɔnyenye dzɔ le Yudatɔwo dome, eye wòtsi ɖe edzi va zu xɔse le xexea me katã la ŋu. Agbalẽa ŋlɔla ka ɖe edzi na exlẽlawo be Kristo-hame la menye habɔbɔ si woɖo be woatsɔ agblẽ nu le dunyagbɔgblɔ ŋu le Roma-dziɖuɖua me o, ke boŋ eɖe eme be dzixɔse si le Kristo-hame la si la nye nu si va ƒo Yudatɔwo ƒe mawusubɔsubɔ ta.
Amedɔdɔawo ƒe Dɔwɔwɔwo ma ɖe akpa etɔ̃ me. Wotu memama la ɖe ale si woɖe gbeƒã Nyanyui la le Yesu ŋu kple ale si woɖo hamewo gɔme anyii la dzi. Woawoe nye: (1) Kristotɔnyenye ƒe gɔmedzedze le Yerusalem le Yesu ƒe tsitretsitsi megbe, (2) ale si Kristotɔnyenye kaka yi ɖe Palestina ƒe akpa bubuwoe kple (3) ale si Kristotɔnyenye gakaka yi ɖe Domeƒu la ƒe nutowo me yi ɖaɖo keke Roma ke hãe.
Nu vevi aɖe si ɖe dzesi nyuie le Dɔwɔwɔwo me lae nye ale si Gbɔgbɔ Kɔkɔe la wɔ dɔe. Eva ɖo kple ŋusẽ, eye wòdze xɔsetɔwo dzi le Yerusalem, esime woɖu Paska la vɔ le ŋkeke bla atɔ̃ megbe, eye wòyi edzi fia afɔɖoƒe hamea nunɔlawo hedo ŋusẽ wo, abe ale si wòdzée le nyadzɔdzɔ vovovo siwo le agbalẽa me la me ene. Mawunyagbɔgblɔ siwo le agbalẽa me la ɖe gbedeasi si le Kristotɔ gbãtɔwo si la ɖe go. Azɔ la, nyadzɔdzɔ siwo le eme la ɖe ŋusẽ si le gbedeasi la me le xɔsetɔwo ƒe agbenɔnɔ kple hamea ƒe nɔvisiléle me la fia.
Agbalẽa ƒe nyatiwo
Dzadzraɖo na ɖaseɖiɖi 1.1-26
a. Yesu ƒe sedede mamlɛa kple eƒe ŋugbedodo 1.1-14
b. Yuda teƒenɔla 1.15-26
Ɖaseɖiɖi le Yerusalem 2.1—8.3
Ɖaseɖiɖi le Yudea kple Samaria 8.4—12.25
Paulo ƒe subɔsubɔdɔ la 13.1—28.31
a. Mɔzɔzɔ gbãtɔ 13.1—14.28
b. Takpekpe le Yerusalem 15.1-35
d. Mɔzɔzɔ evelia 15.36—18.22
ɖ. Mɔzɔzɔ etɔ̃lia 18.23—21.16
e. Paulo nye gamenɔla le Yerusalem, Kaisarea kple Roma 21.17—28.31
Currently Selected:
Amedɔdɔawo ƒe Dɔwɔwɔwo KPƆKPLƆYIƉEME: EB14
Highlight
Share
Copy
Want to have your highlights saved across all your devices? Sign up or sign in
EƲEGBE BIBLIA © The Bible Society of Togo, 2014.