Markə 15

Zezu kor Pilatə

(Mat 27.1-2,11-14; Luk 23.1-5; Zaŋ 18.28-38)

1Kə bəka ceɗ, sum rôwâ mə du sum po' fur ɓa nji kə sum rôwâ mə du sôwâ Zuwif, kə sum pay zu dan dlay, ɓay sum rôwâ Fada mə Mbri daŋ' kədan handay kar kwa məni handay də gi kə Zezu. Handay baŋ Zezu ɓay ta ar num ne kə toŋ nya Zude mə ɗe kə Pilatə. 2Pilatə ci vun Zezu: «Ha nə jwə sôwâ Zuwif su?» Zezu ɗam vun rumu: «Ha kə məni wə ini.» 3Sum rôwâ mə du sum po' fur mbə tum sem Zezu kə dan cem ceme. 4Pilatə ci vun rum kəreme: «Ha cu ɗam dan mi su? Ha cu mun məni handay wə tum sem ru kə dan cem cem nə mi su?» 5Ama Zezu cu ɗam dan vun Pilatə za' mi. Dan rum jin' wa ne kə Pilatə.

Sôwâ ɓok dan mar wa Zezu

(Mat 27.15-26; Luk 23.13-25; Zaŋ 18.39—19.16)

6Kə cer Pakə daŋ', Pilatə wə ar daŋgay' məni sôwâ ci vun rum kə ndi ɗaw nday ne. 7Kəri rum, swə mə ɗe kə Barabas wə so daŋgay' kə sôwâ məni wə car dan, zə handay ci swə məsin kəri məni handay wə car dana. 8Raw sôwâ ɓa mbə so Pilatə, ɓay handay təŋ kə um la' ne i nə gi kwa məni mum wə gi ɓa' kə cer nə zə ndaya. 9Pilatə ɗam ci vun ndaya: «Hi wa' i a ar jwə sôwâ Zuwif ne ni su?» 10Zə mum we si njeŋ sum rôwâ mə du sum po' fur ar Zezu ta ɓa rum zə handay kə sây' kə rumu. 11Ama sum rôwâ mə du sum po' fur ɓu zu raw sôwâ kədan handay ci vun Pilatə kədan mum ar Barabas nday ne zawa. 12Pilatə ci vun raw sôwâ kəreme: «Hi wa' i a gi mi kə swə məni hi um ɗe kə jwə sôwâ Zuwif nə su?» 13Handay faŋ ɗam vun rum kə do dana: «Gay' num də wa gu!» 14Pilatə faŋ ci vun nday kəreme: «Mum gi kwa mə bro' mi su?» Ama handay do dan kə gbəgboŋ pâ mə vun kofo: «Gay' num də wa gu gay'i!» 15Pilatə wa' gi kwa mə kəɗam tu raw sôwâ, ɓay mum ar Barabas ne nday, ɓay kəki məni handay pe Zezu kə ləva, mum ar num ta ɓa soje kədan handay um gay' də wa gu.

Soje kuni ru Zezu

(Mat 27.27-31; Zaŋ 19.2-3)

16Soje kuni mbə kə Zezu du cava toŋ nya Zude, ɓay handay faŋ ɗe kam kul soje mə raw daŋ'ŋ. 17Handay ge mbraw mə mbri mə tlew ne numu. Handay ci pəlay wa kə ŋây' ɓay no' ta ne num wa. 18Handay faŋ təŋ kə kaw jeɓ rum kə ini: «Heɓ ke kə ru, jwə sôwâ Zuwif!» 19Handay pum wa ne num kə dliw, ɓay handay tup mê' ta wa rum, ɓay handay faŋ kuduk nya kə vun cingit kor rum kədan handay um buru. 20Kəri məni handay ndo' vun um ru si, handay kərut mbraw mə tlew nə mbə tu rum ɓay faŋ ge mbraw mə mum ne numu. Kəki rum, handay pâ ta rəka kə rum kədan handay um gay' də wa gu gay'i.

Sôwâ gay' Zezu ta wa gu gay'i

(Mat 27.32-44; Luk 23.36-43; Zaŋ 19.17-27)

21Swə nya Siren mə ɗe kə Simoŋ car sine mbə pâ wə han, mum nə ba Alezaŋdrə kə Rufus. Soje kuni kaw num kə bak tle gu gay' Zezu#Rom 16.13. 22Handay 'ya kə Zezu ta wə ri mə ɗe kə Golgata, məni wa' dan in kə vun mba: «Ri so wa». 23Handay ne num mbi vra' gu mə ɗe kə «viŋə» məni tlum kə mbir gu mə ɗe kə «mirə», ama Zezu cu ve mi. 24Kəki rum, handay gay' num ta wa gu, handay faŋ ɓul mbraw um mbok nday kə pum parwa kədan handay kar sa də fe mbraw mə ka kə ndi su na#Nye 22.19. 25Handay gay' num ta wa gu kə fəta bəka. 26Handay wây' dan mə bro' məni handay ɓok wa rum mə ni na: «Jwə sôwâ Zuwif» wa kwa wây' kwa. 27Handay gay' hura hoɓ wa gu hay' rum, ɗaw ɓa fun, ɓay məsin ɓa guru. [28Kwa məni nə mbə gi kədan nyen mbi dan məni Ɗerwa Ifray ini: «Handay in num wə du sum gi kwa mə bro'o#Esa 53.12#15.28 Ri ɗerwa Mak 15.28, cu wə du ɗerwa məni wây' cem cem məsin kuni mi..»]

29Sôwâ məni wə pâ han tumwa ɓay um i kə ini: «Ahâ! Ha swə məni in i ha də bru so po' fur sôwâ Zuwif ɓay ɗam məsin du bəka hinji', 30a siɗ tu ru kə dam mbə wa gu nə ye!» 31Ndəna' ta' sum rôwâ mə du sum po' fur kə sum pay zu dan dlay ru kuni Zezu, ɓay in dan kə nji mbok nji: «Mum siɗ sôwâ məsin si, ama mum cu gak siɗ tu rum mi. 32Namba la' we Kris, jwə sôwâ Israyel, dam mbə wa gu mgbaŋ ni nə si, namba də um ve!» Hura hoɓ məni sôwâ gay' nday hay' Zezu i num ta'a.

Mat Zezu

(Mat 27.45-56; Luk 23.44-49; Zaŋ 19.28-30)

33Kə fəta du wa, ri mə ura' mbə kəmbo' nya daŋ' hâ fəta riya. 34Kə fəta riya, Zezu ka' dan kə gbəgboŋo: «Eloy, Eloy, lema sabaktani?» Məni wa' dan ini: «Ifray man, Ifray man, zə mi ha ar nan su#Nye 22.2; 109.25; Mak 14.58; Zaŋ 2.19?» 35Sôwâ məsin du sôwâ məni gay' wə han mun dan rum ɓay ini: «I mun ri'i! Mum wə ɗe Eliya.» 36Swə ɗaw du nday ne ta tle kwa məni ra' nji kə soso ɓay no' ta wə mbi kwa cumok, mum jew ta vun dliw ɓay sa ne kə Zezu kədan mum soɓo. Swə nə ini: «I ar 'yeŋ ri', namba də kar ke məsin Eliya də mbə kədan mum um tle mbə wa gu nə su na.» 37Ama Zezu ka' dan kə gbəgboŋ, ɓay mum mara.

38Zim məni hay tak i so po' fur sôwâ Zuwif ŋgâr du hoɓ daka fray hâ nya#Psi 26.31-33. 39Toŋ kul soje mə nya Romə məni car kor Zezu we num mar ndəna', ɓay mum ini: «Swə məni nə Vay Ifray kəzini!»

40Rawkwa məni gay' kə hay' ca' wə kar ri də han ɓay wə du nday: Mari mə so Magdala, kə Salome, ɓay Mari mə ya Zakə mə nyêw kə Zoze. 41Handay ke ta zə Zezu kə gi sin zə rum kə ri məni mum ke wə nya Galile. Rawkwa məsin juk məni mbə kə rum wə so Jeruzalem gay' wə han ta'a.

Zozef mo' Zezu

(Mat 27.57-61; Luk 23.50-56; Zaŋ 19.38-42)

42Riya gi si ɓay fəta rum, fəta gila' tu zə fəta pemây sôwâ Zuwif məni wə də mbə siw rumu. 43Zozef mə so Arimate mbə day, mum nə swə mə kə mbra' mə du sum rôwâ Fada mə Mbri, ɓay mum swə məni wə ji ri məni Ifray wə də suk jwə wa sôwâ um ta'a. Mum jeŋ vunduk ŋgəɗiŋ' ɓay ta so Pilatə kədan mum o mar Zezu ɓa rumu. 44Ama kəri məni Pilatə mun i Zezu mar si, dan rum jin' wa ne numu. Mum faŋ ɗe toŋ kul soje ɓay ci vun rum i Zezu mar suk si su? 45Kəki məni toŋ kul soje nə ɗam vun rum, Pilatə ne vari kə Zozef kədan nə tle mar Zezu. 46Zozef faŋ coɓ zim siliki mə ɓu ɓay mum ulay' mar Zezu mbə wa gu, ku' kə zim na. Mum no' num ta zra məni handay dla wə pra ɓay kəki rum mum ɓuru gway' mə toŋ ta' vun zra rum kə ndi. 47Mari mə so Magdala kə Mari mə ya Zoze kar ri məni handay no' num hana.

Currently Selected:

Markə 15: KMN

Highlight

Copy