Lukə 9

Zezu sin sum ta zə rum mə guɓ wa hoɓo

(Mat 10.5-15; Mak 6.7-13)

1Zezu ɓawa sum ta zə rum mə guɓ wa hoɓ ɓay ne gbəgboŋ ne nday kədan handay 'way gam kə car sum gaɓa. 2Kəki rum, mum sin nday kədan handay ka' Dan mə Kəɗam məni wə in dan wa dan vari məni Ifray wə də suk jwə wa sôwâ um, ɓay kədan handay car sum gaɓ ta'a. 3Mum la' ne ndaya: «I ra' kwa məsin wə ɓa ri zə vari rəkway mi, ko dliw, ko mbu, ko kwati, ko səlay mi. Ɓay swə nə ra' mbraw hoɓ wə ɓa rum mi#Luk 10.4-11; Sin 13.51. 4Wə so daŋ' məni sum rum də mi ve, i gay' wə so rum hâ day ri 'ya mi. 5Wə so daŋ' məni sum rum cu də mi ve mi, i 'ya ar ri rum kə tu' ɓərim sem ri. Kwa rum də ke kwa ta' kwa zə ndaya!» 6Sum ta zə rum 'ya dle, handay ta gaŋ so rum daŋ' kə ka' Dan mə Kəɗam kə car sum gaɓ məni wə han daŋ'ŋ.

Dan ɗik Herodə

(Mat 14.1-2; Mak 6.14-16)

7Kəri məni toŋ nya rum, Herodə mun dan kwa daŋ' məni gi, ɓay mum cu we i mum ɗik ma su mi, Zə sôwâ məsin wə in i Zaŋ-Baptistə car i si, 8Sôwâ məsin wə in i Eliya faŋ pâ si, Sôwâ məsin kərem wə in i Bə ka' dan mə du sum ka' dan mə vun kofo faŋ car i si#Mat 16.14; Mak 8.28; Luk 9.19. 9Herodə ini: «Na hay wa Zaŋ si, ama swə məni na wə mun dan kwa gi rum nə swə sa su?» Ɓay mum keɓ vari kədan mum kar Zezu.

Zezu ne kwati ne kə njiwkwa raw nday i mbu vatla

(Mat 14.13-21; Mak 6.30-44; Zaŋ 6.1-14)

10Kəri məni sum sin gewa mbə hay' Zezu, handay in dan kwa məni handay gi daŋ' ne numu. Zezu ra' nday kə rum, ɓay 'ya kuni ta so mə ɗe kə Betsayda ɗaw ndaya. 11Ama kəri məni raw sôwâ mun dan rum, handay 'ya ji zə rumu. Zezu ve nday ɓay mum in dan wa dan vari məni Ifray wə də suk jwə wa sôwâ um ne nday, ɓay mum car gaɓ sôwâ məni kə gaɓa.

12Kə riya, sum ta zə Zezu mə guɓ wa hoɓ mbə hay' rum ɓay la' ne numu: «A ar vari ne kə raw sôwâ də mbok so kə pəɗak rum kədan kuni keɓ kwati kə ri bar, zə namba rəka wə ri mə cukuɗu.» 13Ama Zezu la' ne ndaya: «Hi kə tu ri, i ne kwati ne nday ti.» Handay ɗam vun rumu: «Namba cu kə kwa məsin mi, say vun tləpe' fun vatl kə keve hoɓ sara. Ha wa' i mə də coɓ kwati zə sôwâ məni kuni daŋ' su?» 14Wə ri rum, raw njiwkwa i mbu vatla. Zezu la' ne kə sum ta zə rumu: «I gila' sôwâ gay' kə kul ɓay kul rum daŋ' ke kə sôwâ day day guvatl gu vatla.» 15Sum ta zə rum mun vun rum, ɓay handay la' ne kə sôwâ daŋ' i kuni gay' də nya. 16Zezu ra' vun tləpe' fun mə vatl kə keve mə hoɓ kuni, mum tle i ta fray ɓay gi soko ne kə Ifray wa kwati rum, mum jak kwati rum ɓay ne kə sum ta zə rum kədan handay ɓul ne kə raw sôwâ. 17Handay daŋ' ti ɓay ndak ndaya. Kəki rum, sum ta zə rum ra' kam kwati məni gwa' nə nyen ɗəŋâl guɓ wa hoɓo.

Piyer in i Zezu nə Kris na

(Mat 16.13-19; Mak 8.27-29)

18Fəta məsin, Zezu wə in dan kə Ifray kə ɗaw rumu. Sum ta zə rum mbə hay' rum, ɓay mum ci vun ndaya: «Raw sôwâ wə in i na nə sa su?» 19Handay ɗam vun rumu: «Sôwâ məsin wə in i ha Zaŋ-Baptistə, sôwâ məsin wə in i ha Eliya, ɓay sôwâ məsin kərem wə in i ha bə ka' dan wə du sum ka' dan mə vun kofo məni faŋ car i#Mat 14.1-2; Mak 6.14-15; Luk 9.8.» 20Zezu ci vun ndaya: «Ɓay mə hi, hi wə in mi i na sa su?» Piyer ɗam vun rumu: «Ha nə Kris mə Ifray na#Zaŋ 6.68-69.»

Zezu in dan wa mar um kə pâ mbə mar umu

(Mat 16.20-28; Mak 8.30—9.1)

21Zezu faŋ dlay nday kə gbəgboŋ kədan kuni in dan rum ne kə swə ɗaw mi. 22Mum faŋ in kəreme: «Say Vay sumra' nə ce boni juk, sum rôwâ mə du sôwâ Zuwif, kə sum rôwâ mə du sum po' fur, ɓay sum pay zu dan dlay də um vaɗ, handay də um ci, ɓay kəki rum bəka hinji', mum də car mbə mara.»

23Kəki rum, Zezu la' ne kə sôwâ daŋ'ŋ: «Swə la' wa' kədan mum ta zə rin si, say bə rum ar ɗik dan tu rum, nə tle gu gay' tu rum bəka daŋ', ɓay nə ta zə rini#Mat 10.38; Luk 14.27. 24Zə swə məni wə wa' kədan mum siɗ tu rum, bə rum də mara, ama swə məni də fe mar zə rin, bə rum də ke kə nyî mə də hâ. 25Swə la' za' kwa nya daŋ', ama bə rum cu kə nyî mə də hâ mi ko mum la' ɗənok tu rum si, kwa rum gak gi mi zə rum su? 26Swə la' wə gi zur wa rin ko wa dan man si, Vay sumra' də gi zur wa bə rum kəri məni mum də mbə wə du mbra' um, wanji kə mbra' Ba umu ɓay wə du mbra' sum sin um mə kəleŋe. 27Na in mi ne, kəzin', sôwâ məsin wə du sôwâ məni kuni cu də mar cop dan we ri məni Ifray wə də suk jwə wa nday nə mi.»

Zezu faŋwa tu rumu

(Mat 17.1-8; Mak 9.2-8)

28Bəka gi ce' ndə mə coho' kəki dan rum, ɓay Zezu tle Piyer, kə Zaŋ ɓay Zakə ɓay ur ta wa igway' kə nday kədan mum in dan kə Ifray wə hana. 29Kəri məni mum wə in dan kə Ifray, vuk rum faŋwa, ɓay mbraw um faŋ məɓu kep kep ɓay təŋ kə wəɗi pəlak pəlak ce' ndə wəɗi bəŋô. 30Kəkor sar, sôwâ hoɓ wə ge dan kə rumu. Sôwâ rum Moyizə kə Eliya 31məni mbə kə mbra' mə wafraya. Handay wə ge dan kə Zezu wa vari məni mum wə də ndo' sin um kə mar um wə so Jeruzalem. 32Piyer kə sôwâ məni kə rum njay sene. Kəri məni handay dla' sen, handay we mbra' Zezu kə sôwâ mə hoɓ məni gay' kə rumu. 33Kəri məni sôwâ mə hoɓ kuni 'ya ar Zezu, Piyer la' ne numu: «Bârî, ɓay kədan namba ke ti ra, namba də kaw jew hinji': Ɗaw zə ru, ɗaw zə Moyizə, ɓay ɗaw zə Eliya.» Piyer cu we zu dan məni mum wə in nə mi. 34Kəri məni mum wə in dan də in ɓo, dləmbur mbə kəmbo' nday, ɓay kwa rum gi wəlok ne nday juku. 35Wor car mbə du dləmbur ini: «Mə ni nə Vay man məni na par, i mun vun rumu#2Pi 1.17-18; Esa 42.1; Mat 3.17; 12.18; Luk 3.22!» 36Kəri məni wor rum in dan ndo', handay cu we swə ɗaw mi, say Zezu kə ɗaw rumu. Sum ta zə Zezu njay dan rum wə vunduk nday 'yeŋ, ɓay kə ri rum handay cu in dan kwa məni handay we nə ne kə swə ɗaw mi.

Zezu 'way gam wa vay mə nji

(Mat 17.14-18; Mak 9.14-27)

37Siw rum, handay dam mbə wa igway' ɓay raw sôwâ mbə ndewa kə Zezu. 38Swə ɗaw du raw sôwâ ka' dana: «Bə ta' kwa, na o nu, a mbə kar vay man ri', zə mum nə vay mə ɗaw ɓa rin sara. 39Ɓay gam la' tle num si, mum wə ka' dan, ɓay mum wə nyen vay nə kə gbəgboŋ hâ vay nə ci kukup vunu. Mum wə um rik, ɓay mum cu pâ mbə wa rum ga'ri mi. 40Na o sum ta zə ru kədan kuni 'way gam rum, ama handay cu gak 'way gam rum mi.» 41Zezu ɗama: «Hi na, hi sôwâ məni cu ve nan mi, ɓay wə gi kwa mə bro', na də suk kə ri hâ day ka su? Na də reɗ vunduk rin wa ri hâ day ka su? A mbə ti kə vay wû na!» 42Kəri məni vay nə wə mbə ɓo, gam nə tle num ge ta nya ɓay nyen num kə gbəgboŋo. Ama Zezu dlay gam nə kə gbəgboŋ, ɓay 'way num pâ mbə wa vay nə ɓay mum faŋ ar num ne kə ba umu. 43Gbəgboŋ Ifray jin' wa ne kə sôwâ məni wə han daŋ'ŋ.

Zezu in dan wa mar um kə pâ mbə mar um kəreme

(Mat 17.22-23; Mak 9.30-32)

Kəri məni kwa məni Zezu gi nə jin' wa ne kə sôwâ ɓo, Zezu la' ne kə sum ta zə rumu: 44«I mun dan məni na wə də in mi ne nə kə ɓayrumu: Sôwâ də ar Vay sumra' də ɓa sôwâ məsini.» 45Ama sum ta zə rum cu mun zu dan rum mi, zu dan rum pəpe' kədan handay gak mun mi. Ɓay handay wə ne wəlok dan ci vun rum wa dan rumu.

Sa nə suk toŋ mə du mba su?

(Mat 18.1-5; Mak 9.33-37)

46Sum ta zə Zezu təŋ kə ge dan kuni mbok nji kədan handay we sa nə du nday də suk toŋ su na. 47Zezu we dan ɗik vunduk nday, zə rum mum tle vay mə nyêw mbə car hay' rum, 48ɓay la' ne ndaya: «Swə məni ve vay nyêw məni nə zə rin, bə rum ve nana. Ɓay swə məni ve nan, bə rum ve swə məni sin nan nə ta'a. Zə swə məni kî mə du ri daŋ', mum nə swə mə toŋo#Mat 10.40; Luk 10.16; Zaŋ 13.20.»

Swə məni la' cu suk sây' ri mi, ka bə rum kə ri

(Mak 9.38-40)

49Zaŋ ɗam dan ini: «Bârî, namba we swə məsin wə 'way gam kə semɗe ru, ɓay namba tak num, zə mun cu du mba mi.» 50Ama Zezu ɗam vun rumu: «I tak num mi, zə swə məni cu kə dan mə bro' wa ri mi, ka bə rum kə ri.»

Sôwâ so məsin ɗaw wə nya Samari vaɗ Zezu

51Kəri məni bəka məni Ifray wə də tle Zezu də wafray mbə həre', Zezu wa' kədan mum də so Jeruzalem. 52Mum sin sum sin ta kofo rumu. Handay 'ya dle ta cok so məsin ɗaw wə nya Samari kədan handay gila' ri zə rumu. 53Ama sôwâ so rum cu bə um ve wə han mi, zə mum wa' də so Jeruzalem. 54Kəri məni sum ta zə rum, Zakə kə Zaŋ we ndəna', handay ci vun rumu: «Bârî, ha wa' i mə ɗe ku mə wafray nde mbə wa nday ɓay ye' nday su#2Sja 1.9?» 55Zezu faŋ i kar nday ɓay dlay nday kə gbəgboŋo. 56Ɓay handay 'ya ta so məsini.

Sôwâ məni wə wa' kədan handay ta zə Zezu

(Mat 8.19-22)

57Kəri məni handay wə vari ɓo, swə ɗaw la' ne kə Zezu: «Na də ta zə ru wə ri daŋ' məni ha wə də hana.» 58Zezu la' ne numu: «Gewre kə zra nday ɓay rugwa mə wafray kə so nday, ama Vay sumra' cu kə ri məni mum gak bar pemây wə han mi.» 59Mum la' ne kə swə məsini: «A ta zə rini.» Ama swə nə ini: «Bârî, a ne vari ne nan kədan a də mo' ba man cop ri'i.» 60Zezu la' ne numu: «A ar sum mar mo' mar nday, ama ha, a də ka' dan wa dan vari məni Ifray wə də suk jwə wa sôwâ umu.» 61Swə məsin ini: «Bârî, na də ta zə ru, ama a ne vari ne nan kədan a də in ɗaw suk heɓ ye ne kə sôwâ so man cop ri'i#1Sja 19.20.» 62Zezu la' ne numu: «Swə məni la' tle kava təŋ kura, ɓay mum faŋ i kar ri də kəki si, Ifray cu gak suk jwə wa bə rum mi.»

Currently Selected:

Lukə 9: KMN

Highlight

Copy