Lukə 7

Zezu car bə sin toŋ soje mə nya Romə

(Mat 8.5-13; Zaŋ 4.46-54)

1Kəri məni Zezu in dan rum daŋ' ne kə sôwâ ndo' si, mum dle ta so Kapernawum. 2Toŋ soje mə nya Romə kəta' wə han, mum kə bə sin məni mum um bə juk, bə sin nə kə gaɓ ɓayrum, mum həre' kə mara. 3Kəri məni toŋ soje nə mun dan Zezu, mum sin sôwâ məsin mə du sum rôwâ Zuwif ta hay' rum kədan handay um o mbə car bə sin umu. 4Handay mbə day hay' Zezu ɓay təŋ kə um o kə ini: «Ɓay kədan a gi kwa məni mum wə wa' nə ri', 5mum wə bə sôwâ mba dle tu si, ɓay mum ɗam so Ifray sôwâ Zuwif ne mba ta'a.» 6Zə rum, Zezu 'ya dle kə nday, ɓay kəri məni mum mbə həre' kə so toŋ soje na, toŋ soje nə sin bây um kuni kədan handay um in ne: «Bârî a cik tu ru za' mi, zə na cu nde i kədan ha ze so man mi. 7Zə rum, na kar tu rin na cu nde i kədan na də kor ru kə tu rin mi. Ama a in dan ɗaw sar, ɓay bə sin man də cara. 8Na kə tu rin, na wə zə ɓa sôwâ məsin, ɓay na kə soje zə ɓa rin ta', na wə in ne kə swə ɗawa: "A də ye" ɓay mum wə da. Na in ne kə swə məsini: "A mba" ɓay mum wə mba. Ɓay na wə in ne kə bə sin mana: "A gi kwa məni na" ɓay mum wə gi kwa rumu.» 9Kəri məni Zezu mun dan rum, dan rum jin' wa ne numu. Mum faŋ i, ɓay la' ne kə raw sôwâ məni wə ta zə rumu: «Na in mi ne, na cu za' swə məni ve nan ce' ndə swə məni nə ɗaw mi, ko du sôwâ Israyel cu məta'a!» 10Kəri məni sum sin kuni faŋ gewa mbə so toŋ soje na, handay za' bə sin nə car si.

Zezu car i vay rənda mbə mara

11Kəki rum, Zezu 'ya ta wə so mə ɗe kə Nayin. Sum ta zə rum kə raw sôwâ ta kuni kə rumu. 12Kəri məni handay ta day vun vari so rum, handay ndewa kə sôwâ tle mar də vun zra kə ndi. Mar nə vay mə nji ɗaw ɓa ya um məni ta rənda, ɓay sôwâ so rum juk kəta' kə sa. 13Kəri məni Bârî we sə, mum we ca wa sə, ɓay la' ne sa: «Əŋ ci' za' mi.» 14Mum faŋ ta ta ɗak kwa tle mar, ɓay sum tle mar nə faŋ ca ɓay Zezu ini: «Vay jiɗ, na in wû ne, a car ye.» 15Mar nə car suk kə zu, ɓay təŋ ge dana. Zezu faŋ ar num ne kə ya umu. 16Wəlok gi sôwâ mə wə han daŋ', ɓay handay gi mbra' ne kə Ifray ini: «Bə ka' dan mə mbri mbə wə du mba ɓay Ifray mbə kaw ɓa sôwâ umu!» 17Dan Zezu pla' ndap wə nya Zude kə pəɗak rum daŋ'ŋ.

Daw sin Zaŋ-Baptistə

(Mat 11.2-6)

18Sum ta zə Zaŋ in dan rum daŋ' ne numu. Zaŋ ɗe sôwâ hoɓ mə du nday, 19ɓay sin nday ta hay' Bârî kədan handay ci vun rumu: «Ha nə swə məni namba wə ji nə su, ko namba də ji swə məsin su?» 20Kəri məni handay mbə hay' Zezu, handay la' ne numu: «Zaŋ-Baptistə sin mba kədan namba ci vun ru: "Ha nə swə məni namba wə ji nə su", ko namba də ji swə məsin su?» 21Kəri rum Zezu wə car gaɓ sôwâ juk, ɓay car sôwâ mə kə rəɓo ta', mum 'way gam wa sôwâ, ɓay ar i ne kə dəŋâr juk ta'a. 22Kəki rum, Zezu ɗam vun sum sin Zaŋ: «I də in dan kwa məni hi we, ɓay dan məni hi mun daŋ' ne kə Zaŋ: Dəŋâr wə weri, lem wə ta, mgbo' wə faŋ kəleŋ, ndum wə mun hum, mar wə car i, ɓay Dan mə Kəɗam wə ka' ne kə sum ca#Esa 35.5-6; 61.1. 23Swə məni cu ar dan man ge mi, bə rum də tuk kəɗama!»

24Kəri məni sum sin Zaŋ 'ya si, Zezu təŋ kə in dan wa Zaŋ ne kə raw sôwâ: «Hi ta kar mi du igop nə su? Hom məni simbeɗ wə nyen su? 25La' cu mi si, hi ta kar mi han su? Swə məni ge mbraw mə kə mbra' su? Ama sôwâ məni ge mbraw mə kə mbra' ɓay gay' du tuk kəɗam, handay gay' wə so jwa. 26La' cu mi si, hi ta kar mi wə han su? Bə ka' dan su? Awo, na in mi ne, hi we swə məni pâ bə ka' dan nə si. 27Zə Zaŋ nə swə məni Ɗerwa Ifray wə in dan wa rumu:

"A kar ri', na wə sin vay sin man kofo ru

kədan mum gila' vari zə ru#Mal 3.1."»

28Zezu faŋ ini: «Na in mi ne, wə du sôwâ məni rawkwa wə vra' daŋ', swə mə pâ Zaŋ kə mbra' cu mi. Ama swə mə kî wə du sôwâ məni Ifray wə suk jwə wa nday nə pâ Zaŋ kə mbra' si.»

29Kəri məni sum ɓawa kwa kə sôwâ məsin daŋ' mun dan um, handay we i vari Ifray nə njeŋ, ɓay Zaŋ gi baptem ne ndaya. 30Ama kul sôwâ Zuwif mə ɗe kə Farisiyen kə sum pay zu dan dlay vaɗ kuni vari məni Ifray gila' rum zə nday, ɓay handay vaɗ baptem wə ɓa Zaŋ#Mat 21.32; Luk 3.12.

31Zezu faŋ ci vun ndaya: Na də kənji' sôwâ mə tam kə sa su? Handay ra' nji kə sa su? 32Handay ra' nji kə dawre' məni gay' wə lumo ɓay ka' dan kə nji mbok nji: "Namba pe duɓ kəya', ama hi cu dla' mi, namba ɗâ nyem tum vun zra, ama hi cu ci' mi"

33«Kəri məni Zaŋ-Baptistə mbə, mum cu ti kwati mi, ko ce sum məta'a, ɓay hi ini: "Mum kə gam wa rumu" 34Ɓay kəri məni Vay sumra' mbə, mum ti kwati ɓay ce kwace, ɓay hi ini: "I kar swə mə ni na! Mum nə bə ti mbri kə bə ce kwa mə mbri, mum nə bây sum ɓawa grama kə sum gi kwa mə bro'o." 35Ama sôwâ daŋ' məni ve Gwet Ifray, handay we i dan rum nə njeŋe.»

Ma məsin wu' urdi ne kə Zezu wa wə so Simoŋ

36Swə ɗaw mə du kul sôwâ Zuwif mə ɗe kə Farisiyen nə ɗe Zezu kədan mum mbə ti kwati kə rumu. Zezu 'ya ta so um ɓay suk wə vun tablə kədan mum ti kwati. 37I gi kwa mə bro' kəta' wə so rumu. Kəri məni ta mun i Zezu suk wə vun tablə rawti so swə Farisiyen nə, ta tle urdi kə gula albatrə peɗ mbə kə ndi 38ɓay ta ca kəki Zezu hay' sem rum, ta təŋ kə ci', ɓay zim i sə ne ta sem Zezu, ta faŋ kutu sem rum kə sâ wa sa. Ta soɓ sem rum ɓay wu' urdi nə ta sem rumu#Mat 26.7; Mak 14.3. 39Kəri məni swə Farisiyen məni ɗe Zezu nə we ndəna', mum ɗik dan wə vunduk rumu: «Swə məni nə la' bə ka' dan kəzin' si, mum gak we ma məti ɗak num rə, ɓay mum gak we i ta i gi kwa mə bro'o.» 40Zezu la' ne numu: «Simoŋ, na kə dan kədan na in wû ne.» Simoŋ ɗam vun rumu: «A in ye, Bə ta' kwa.» 41Zezu in ne numu: «Sôwâ hoɓ ti bal swə məsini: Swə ɗaw ti bal səlay kis vatl, ɓay swə məsin ti guvatla. 42Handay cu kə kwa məsin kədan handay po' bal rum kə ndi mi, ɓay bə rum vrum bal mə wa nday hoɓ jaka. Wə du sôwâ mə hoɓ məni kuni, sa nə wə də um bə han câ' su?» 43Simoŋ ɗam vun rumu: «Na wə ɗik i swə məni mum vrum bal mə toŋ wa rumu.» Zezu la' ne numu: «Ha ɗam njeŋe.» 44Kəki rum, Zezu faŋ i ta hay' ma rə, ɓay la' ne kə Simoŋ: «Ha we ma məti rə si su? Kəri məni na ze rawti so wû, ha cu ne nan mbi kədan na kol sem kə ndi mi, ama ta kol sem rin kə zim i sə, ɓay kutu sem rin kə sâ wa sa. 45Ha cu ve nan kə man soɓ kə vun mi, ama ta cu ar soɓ sem rin mi, daka kəri məni na ze ta rawti so. 46Ha cu wu' mur wa rin mi, ama ta wu' urdi ta sem rini. 47Zə rum, na in wû ne: Ma rə ta' bə sə hay' rin juku: Bə sə nə ta' i Ifray vrum kwa mə bro' sə məni ke ɓayrum nə si. Ama swə məni Ifray vrum kwa mə bro' um mə kî, mum ta' bə um kî ta'a.» 48Zezu faŋ la' ne kə ma ra: «Kwa mə bro' maŋ vrum si.» 49Sôwâ məni gay' wə vun tablə kə rum təŋ kə ɗik dan wə vunduk ndaya: «Sa nə swə məni nə wə gak vrum kwa mə bro' nə su?» 50Ama Zezu la' ne kə ma ra: «Zə həŋ ve nan, həŋ siɗ si, əŋ də heɓ ye.»

Currently Selected:

Lukə 7: KMN

Highlight

Copy