Sini 5

Ananiyas kə Safira

1Ama swə məsin kəta' mə ɗe kə Ananiyas, ma rum ɗe kə Safira, mum coɓ kwa kə sine ndaya. 2Mum ŋge səlay mbə han wə du səlay rum cin zə tu rum, mum faŋ ta kə kam rum ne kə sum sini. Mum kawvun kə ma rum wa dan rumu. 3Piyer ci vun rumu: «Ananiyas, zə mi ha ar Satan ve vunduk ru kədan mum wû gi hay dan kor Simbeɗ mə Kəleŋ kə ŋge səlay wə du səlay məni ha gi coɓ sine wû fe ndi ɓay cin zə tu ru su? 4Cop kəri məni ha cu coɓ kwa kə sine rum məto', sine rum mə ha, ɓay kəki məni ha coɓ kwa kə ndi, səlay rum mə ha ta', cu ndəna' mə su? Zə mi ha faŋ ɗik wə vunduk ru kədan ha gi kwa məni nə su? Ha cu hay dan kor sumra' mi, ama kor Ifraya.» 5Kəri məni Ananiyas mun dan rum, mum nde ta nya ɓay mara. Ɓay wəlok gi sôwâ daŋ' məni mun dan rumu. 6Daw barway mbə ku' mar rum kə zim ɓay tle ta mo' rəka.

7Kəki rum ler hinji', ma Ananiyas mbə ze rawti so rum, ta cu we kwa məni gi nə mi. 8Piyer ci vun sa: «Əŋ in ne nan ri', səlay məni hi tle sine mi gi coɓ nə daŋ' rum nə ni nə su?» Ta ɗam vun rumu: «Awo, daŋ' rum ni na!» 9Zə rum, Piyer ci vun sa: «zə mi həŋ kawvun kə nji maŋ kədan hi kənji' Simbeɗ Bârî su? Əŋ kar ri'i: Sôwâ məni ke mo' nji maŋ kəta' wə vun vari, ɓay handay də maŋ tle də rəka ta'a.» 10Kəri rum sar, ta nde ta nya hay' sem rum ɓay mara. Daw barway kuni cok ta rawti so ɓay za' sə mar si ɓay handay tle mar sə ta rəka ɓay mo' hay' nji sa. 11Wəlok gi kul sôwâ məni ve Kris daŋ' kə sôwâ daŋ' məni mun dan rum juku.

Daw sin gi yew cem cem juku

12Daw sin gi kwa cem cem mə jin' wa sôwâ kə yew cem cem juk wə du sôwâ. Sôwâ məni ve Kris daŋ' ɓa wa zə Daŋki Salomoŋ. 13Ko swə ɗaw cu car rəka mbə ze du nday mi, ama sôwâ daŋ' wə nday mbâ juku. 14Njiwkwa kə rawkwa juk ve dan Bârî, ɓay kul sôwâ Kris dlər də kofo kofo. 15Ɓay sôwâ təŋ kə ra' sum gaɓ də hay' vari kə nday, handay njay nday wa aŋgaw kə la' bar kədan kəri məni Piyer wə də pâ han, njəɓo tu rum pâ wa sôwâ məsin du ndaya. 16Raw sôwâ juk məni gay' wə pəɗak so Jeruzalem ra' sum gaɓ kə sôwâ məni kə gam wa ne mbə kə nday, ɓay handay daŋ' cara.

Sôwâ məsin keɓ zu sum sini

17Kəri rum, toŋ po' fur kə sôwâ daŋ' məni kə rum, wa' dan ini: Sôwâ məni wə ta zə dan kul sôwâ Zuwif mə ɗe kə Sadusiyen, car kuni sây' wa sum sini. Handay kawvun kədan handay keɓ zu ndaya. 18Handay ra' sum sin i sôwâ daŋ' ɓay cok nday ta so daŋgay'i. 19Ama kə dukri rum, vay sin Bârî mə wafray mbə ar vun vari so daŋgay', mum ra' sum sin wur ta rəka kə nday ɓay la' ne ndaya: 20«I də gay' wə so po' fur sôwâ Zuwif, ɓay i ka' dan wa dan vari suk mə mbrew ne kə sôwâ!» 21Daw sin kuni mun vun rumu. Kə bəka ceɗ, handay 'ya ta so po' fur sôwâ Zuwif ɓay təŋ kə ta' kwa wə hana.

Toŋ po' fur kə sôwâ məni kə rum ɗe sum rôwâ daŋ' mə du sôwâ Zuwif kə sum rôwâ Fada mə Mbri kədan kuni ɓawa ce' ndə məni daw Israyel wə gi ɓa'a. Handay faŋ sin soje kuni ta so daŋgay' kədan handay ra' sum sin mbə kə ndaya. 22Ama kəri məni handay ta day so daŋgay', handay cu za' sum sin wə han mi. Handay faŋ ta hay' sum rôwâ Fada mə Mbri ɓay in ne ndaya: 23«Namba za' vun vari so daŋgay' təta' kə vari rum, ɓay soje məni wə ji vun vari so rum gay' wə ri ndaya. Ama kəri məni namba ar vun vari so rum, namba cu za' swə ɗaw wə han mi.» 24Kəri məni toŋ sum ji vun vari so po' fur sôwâ Zuwif kə sum rôwâ mə du sum po' fur mun kuni dan rum, handay cu we i handay ɗik ma su wa dan wur sum sin kuni za' mi. 25Kəri rum, swə məsin car mbə rəka ɓay la' ne ndaya: «I mun ri', sôwâ məni hi cok nday wə so daŋgay', handay kəta' wə rawti so po' fur sôwâ Zuwif. Handay wə ta' kwa ne kə sôwâ wə hana#Mat 27.25!» 26Zə rum, toŋ ji vun vari so po' fur rum 'ya dle kə sôwâ um ta han ɓay ra' sum sin mbə kə nday, ama handay cu ra' nday kə gbəgboŋ mi, zə handay wə ne wəlok i sôwâ də nday ge kə gway'i.

27Kəki məni handay mbə kə nday, handay njay nday kor sum rôwâ Fada mə Mbri, ɓay toŋ po' fur ci vun nday kə ini: 28«Namba tak ni kə gbəgboŋ kədan i ar ta' kwa ne kə sôwâ kə semɗe swə nə si, ɓay i kar ri', hi pla' kwata' mi ndap so Jeruzalem daŋ' ɓay hi wa' cin dan mar um wa mba ta'a!» 29Piyer kə sum sin məsin ɗam kuni vun ndaya: «Say namba mun vun Ifray pâ mun vun sumra'a. 30Ifray ba mbri ramba par Zezu məni hi ci num kəri məni hi gay' num ta wa gu. 31Ifray tle num cin wə ɓa fun rum ce' ndə Jwə kə Bə Siɗ kədan mum ne vari ne kə sôwâ Israyel kədan handay faŋ vunduk nday, ɓay Ifray vrum kwa mə bro' ndaya. 32Namba sum we njeŋ kwa rum, namba ɓay Simbeɗ mə Kəleŋ məni Ifray ne kə sôwâ məni mun vun rumu.»

33Kəri məni sum rôwâ Fada mə Mbri mun dan rum, handay ra' bak, ɓay handay wa' kədan handay ci sum sini. 34Ama swə ɗaw mə du kul sôwâ Zuwif mə ɗe kə Farisiyen kəta' wə du ndaya: Semɗe rum kə Gamaliyel, bə pay zu dan dlay məni sôwâ daŋ' wə um mbâ. Mum car fray wə du sum rôwâ Fada mə Mbri ɓay ci vun nday kədan kuni ar sum sin wur də rəka kî ri'i. 35Mum faŋ la' ne kə sum rôwâ Fada mə Mbri: «Hi sôwâ Israyel, i kaw wa ri kə kwa məni hi wə də gi wa sôwâ mə ni kuna. 36Bəka məni swə mə ɗe kə Tedas mbə day nə cu bar ɓayrum məto'o: Mum mbə ta' tu rum ce' ndə swə mə kə mbra', ɓay raw sôwâ ke i kis fəɗi' təŋ kə ta zə rumu. Ama sôwâ ci num, ɓay sôwâ daŋ' məni wə ta zə rum pla' wa, ɓay dan um ndo' cete. 37Kəki rum, kəri məni sôwâ wə wây' tu, Yudas mə nya Galile car mbə, mum ɓu sôwâ juk ta zə rumu. Ama sôwâ ci num ta', ɓay sôwâ daŋ' məni ta zə rum pla' wa. 38Zə rum, na in mi ne: I gi kwa məsin tu sôwâ məni kuni mi. I ar nday 'ya! Zə dan nday kə sin nday la' car mbə hay' sumra' si, dan rum wə də ndo'o. 39Ama dan rum la' car mbə hay' Ifray kəzin' si, hi cu gak tak dan rum mi. I kaw wa ri kədan i zi kə Ifray mi!» Sum rôwâ Fada mə Mbri ve dan Gamaliyel, 40handay faŋ ɗe sum sin kuni mbə rawti so, handay pe nday kə ləva ɓay dlay nday i kuni dok ta' kwa ne kə sôwâ kə semɗe Zezu za' mi. Kəki rum, handay ar nday piki. 41Daw sin 'ya mbə rawti so sum rôwâ Fada mə Mbri kə tuk kəɗam juk, zə Ifray we nday nde i ce boni zə semɗe Zezu. 42Bəka daŋ' handay cu ar dan ta' kwa kə ka' Dan mə Kəɗam məni in dan wa Kris mə ɗe kə Zezu ne kə sôwâ wə rawti so po' fur sôwâ Zuwif kə rawti so ndaya.

Currently Selected:

Sini 5: KMN

Highlight

Copy