Mateo 5

Ncango zaha lipili

1Oho Yeshu amonene makunge a bantu, wakandamine ha lipili, pe wekalile hanci. Bandongesha bendi bezile kukwendi, 2pe watatikile kubalongesha ngayi,

Mfuywezi

(Luka 6:20-23)

3“Bali na mfuywezi baya bakuliyuvwa kushepwa mu moyo,

ndaba wene wa muyilu unengi wabo.

4 # Isha 61:2. Bali na mfuywezi baya bakulila,

ndaba bakababengezeka.

5 # Nyi 37:11. Bali na mfuywezi baya bakulilimbwilisha,

ndaba bakakona kaye.

6 # Isha 55:1-2. Bali na mfuywezi baya bali na nzala na linyontwa lya byakwoloka,

ndaba bakekuta.

7Bali na mfuywezi baya bali na nceshe,

ndaba bakabayuvwila nceshe.

8 # Nyi 24:3-4. Bali na mfuywezi baya banayele mu mitima,

ndaba bakamona Nyambi.

9Bali na mfuywezi baya bakutabwela bantu,

ndaba bakatoyiwa ngayi bana ba Nyambi.

10 # 1 Pita 3:14. Bali na mfuywezi baya bakuyandishiwa ha byakwoloka,

ndaba Wene wa muyilu unengi wabo.

11 # 1 Pita 4:14. Muli na mfuywezi ndi bantu bakumitukana na kumiyandisha, na kumibangila byabibi nimwabyo bya mahalo ndaba yami. 12#2 Bya 36:16; Mil 7:52. Wahililenu na kutangala, ndaba ncungu yenu yayinene muyilu. Eshe nisho bayandishile bamiluwe baya bekalileko enu oho shilolo muhemuwe.

Mushele na lumuni

(Mako 9:50; Luka 14:34-35)

13“Enu muli mushele wa hano hanci, ngoboni ndi mushele unahamuku, ukatobalishiwa nahiti? Kutwesha kutobiwa kami hiwufwako, nohobene, ukuyumbiwa hanci, pe bantu bakuwulyata na mawulu.

14 # Yowa 8:12, 9:5. “Enu muli lumuni lwa kaye. Munzi unazikiwi ha shinkanda kutwesha kuholekiwa wufwako. 15#Mak 4:21; Luk 8:16, 11:33. Hinge bantu kutwesha kumunika lambi na kuyiyaka munceto ya lulonga lwakukunama bafwako. Ngoboni bakuyiyaka haya yikumoneka ngayi yimoneshe bali mu litala nimwabo. 16#1 Pita 2:12. Nohobene lumuni lwenu lumunike ku bantu, ngayi mwanga bamone milimo yenu yayiwahe, pe bapane maleema kuli Tatiyenu wa muyilu.

Bilongesha bya ha ndayano

17“Hinga muhanganika ngayi ninezi na kumanisha Ndayano za Moshesha* hinge kulongesha kwa bamiluwe, kaliha ninezi na kumanisha, ngoboni ninezi ngayi bitendiwe. 18#Luk 16:17. Mwashikuma nikumitongweza ngayi, hantu liyilu na hanci binapiti, kowa koma hinge kalizu kakashe katikitiwa kakafuma ku ndayano, hamo nimwabyo binatendiwe. 19Ou nimwendi ukakiluka zimo zazishe kuneze ndayano, na kulongesha bantu noho, niye ukatoyiwa wamushe mu Wene wa muyilu. Ngoboni ou ukazombatala na kuzilongesha, ukatoyiwa wamunene mu Wene wa muyilu. 20Ndaba nikumitongweza ngayi, ndele kwoloka kwenu kupitakane kuya kwa bakakulongesha ndayano na Bafwalishi, pe kukengina mu Wene wa muyilu mufwako.

Bilongesha bya ha kupilama

(Luka 12:57-59)

21 # Kut 20:13; Nday 5:17. “Mwayuvwile eshe bambile bashikale ngayi, ‘Hinga uziha, kami ou ukuziha ukufwanina kuyatishiwa.’ 22Ngoboni haya ami nikumitongweza ngayi, ou ukupilamina kawushinda wendi, ukufwanina kutwaliwa ku nkuta. Ngoboni ou ukutoya kawushinda wendi ngayi, ‘Uli shibulangana,’ ukufwanina kutwaliwa ku mundilo wa Ngehena.

23“Nohobene ndi ukutwala ntupu yobe kuli Nyambi ku shihanda, pe hiukanuka ngayi uli na shambo na kawushinda wobe, 24shiya ntupu yobe kumbili ya shihanda. Boka taha ukalyambwilile na kawushina wobe, nohoboni uboke na kutupula ntupu yobe kuli Nyambi.

25“Liyuvwashane wangu na uya ukuya mukukuyatisha ku nkuta. Liyuvwashane nendi oho shilolo akakume ku nkuta, kutina ukakutwala ku mukakuyata, pe mukakuyata akakuyaka mu maboko a mukakulama, uya ukakupatilila mu tolongo. 26Mwashikuma nikumitongweza ngayi kukafumamo wufwako hantu unamanishi kuyumba uya mulandu.

Bilongesha bya ha wunjenge

27 # Kut 20:14; Nday 5:18. “Mwayuvwile eshe bambile ngayi, ‘Hinga mutendanga wunjenge.’ 28Ngoboni hano nikumitongweza ngayi ou nimwendi ukutilamina mbuyama na kulishoza, watenda kale nendi wunjenge mu mutima wendi. 29#Mat 18:9; Mak 9:47. Ndi liho lyobe lya shilyo likukupukalisha ngayi utende wubi, litompole, pe uliyumbe. Ndaba shashiwahe kukwobe kuyumba shimamo shobe kupitakana ngayi lutu lwobe nimwalwo lukayumbiwe ku Ngehena. 30#Mat 18:8; Mak 9:43. Pe ndi liboko lyobe lya shilyo likukupukalisha ngayi utende wubi, liketule, pe uliyumbe. Ndaba shashiwahe kukwobe kuyumba shimamo shobe, kupitakana ngayi lutu lwobe nimwalwo lukayumbiwe ku Ngehena.

Bilongesha bya ha kuziha maluwo

(Mateo 19:9; Mako 10:11-12; Luka 16:18)

31 # Nday 24:1-4; Mat 19:7; Mak 10:4. “Shambiwile kami ngayi, ‘Ou nimwendi wakulubula mukazendi ukufwanina kumupana lin̄wati lya kuziha maluwo.’ 32#Mat 19:9; Mak 10:11-12; Luk 16:18; 1 Koli 7:10-11. Ngoboni haya ami nikumitongweza ngayi mulume wakulubula mukazendi ndele ndaba yakutenda wunjenge, ukamwinga mukakutenda wunjenge ndi ukayekiwa. Kami nimwendi ou ukamuyeka, ukatenda nendi wunjenge.

Bilongesha bya ha kulibeza

33 # Bal 19:12; Kul 30:2; Nday 23:21. “Kami mwayuvwile shambiwile ku bashikale ngayi, ‘Hinga mubeza bya mahalo, ngoboni tendela Mwene osho walibezele nendi.’ 34#Yako 5:12; Isha 66:1; Mat 23:22. Ngoboni ami nikumitongweza ngayi, hinga mubezanga, hinge na liyilu ndaba lyenga litanda lya Nyambi. 35#Isha 66:1; Nyi 48:2. Hinge hano hanci ndaba henga ha malyatilo a mawulu wendi, hinge na Yelushalema, ndaba lwenga lukena lwa Mwene wamunene. 36Kami hinga ubeza na mutwe wobe ndaba kutwesha kufutula luhuki lumo mu kutuba hinge mu kushipa wufwako. 37Ngoboni mwambe ngayi, ‘Ee,’ hinga ngayi, ‘Byo,’ shakunungako nimwasho, shikufuma ku mukawubi.

Bilongesha bya ha kubweshela wubi ku wubi

(Luka 6:29-30)

38 # Kut 21:24; Bal 24:20; Nday 19:21. “Mwayuvwile shambiwile ngayi, ‘Kubokeshiwe liho na liho, liyewe na liyewe.’ 39Ngoboni haya nikumitongweza ngayi, hinga mubweshela wubi ku muntu ukumibipishila. Ngoboni ndi muntu unakukama ha ntanta ya shilyo, mutengekele ntanta yamina kami. 40Kami ndi muntu ukushinga kukuyatisha ngayi akuyangule shikobelo shobe, mushiyile na ncanci kami. 41Kami ndi muntu ukukukandikiza kwenda mukala umo, umushindikize mikala yibili. 42Ou ukukunyepa mupanike, hinga uyumina ou ukushinga kuwila kukwobe.

Kuhaka bakankole

(Luka 6:27-28, 32-36)

43 # Bal 19:18. “Mwayuvwile shambiwile nehe ngayi, ‘Haka ndambo yobe, pe zimba mukankole wobe.’ 44Ngoboni nikumitongweza ngayi hakenu bakankole benu, kami lombelelenu baya bakumiyandisha, 45ngayi mwinge bana ba Tatiyenu wa muyilu. Ndaba ukututwishila bantu bababi na babawahe mutena wendi, kami ukulokeshela bakwoloka na bababi mvula wendi. 46Ndaba ndi mukuhaka baya bakumihaka, mukawana ncungu ngani? Kati baka mutelo kaliha nisho benganga nanibo ndi? 47Kami ndi mukushangwisha tuhu bawushinda wenu, mukupitakana nahiti bamina? Kati bakalitunga kaliha batendanga noho ndi? 48#Bal 19:2; Nday 18:13. Ngonehe Tatiyenu wa muyilu enga wakulembuka, nohobene enu lembukenu.

Currently Selected:

Mateo 5: KK2008

Highlight

Copy