Mateo 14
14
Lufu lwa Yowano Mukakuzubilisha
(Mako 6:14-29; Luka 9:7-9)
1Ha shikati shiyo, Helonda ou wengile mwene wa Ngalileya wayuvwile mpupo ya Yeshu. 2Pe wambile ku bakamilimo bendi ngayi, “Ou niye Yowano Mukakuzubilisha unashanguku ku bafu. Nisho shikuletesha ngayi ekale na ngovu zakutenda bikomokesho.”
3 #
Luk 3:19-20. Ndaba Helonda wakwatile Yowano, wamumangile na kumuyaka mu tolongo ndaba ya Helondiyashi* mukaza Fwilipu, mukonzowendi. 4#Bal 18:16, 20:21. Ndaba Yowano Mukakuzubilisha wambilenga Helonda ngayi, “Kaliha shinafwanini obe kuyeka Helondiyashi.” 5Helonda washingile kumuziha, ngoboni watinine Bayunda, ndaba bambilenga ngayi Yowano nengi muluwe.
6Ha mutena wa kwanuka kuhemuwa kwa Helonda, mwana Helondiyashi washindile kumbili yabo. Helonda wawahililile shikuma. 7Niho alibezele ngayi ukamupanika shuma nimwasho akanyepa.
8Mushimbi walombele ebye amuhongele mandiyendi, pe wambile ngayi, “Mpanike mutwe wa Yowano Mukakuzubilisha ha lulonga.” 9Mwene wayenene, ngoboni ndaba ya mbeza zendi, kami wekalile na baya ehanine ku kulya, wambile ngayi mushimbi apanikiwe eshe akushinga. 10Watumine lizu mu tolongo ngayi mutwe wa Yowano wuketuliwe. 11Mutwe wa Yowano bawuletele ha lulonga, niho bawupanikile mushimbi, pe wawutwalile kuli mandiyendi. 12Bandongesha ba Yowano bayile na kushimba mutuntu wendi, bawufundile, niho bayile na kutongweza Yeshu.
Yeshu ukulisha makulukazi mutanu a bantu
(Mako 6:30-44; Luka 9:10-17; Yowano 6:1-14)
13Oho Yeshu ayuvwile ebye byatendiwile, wafuwile wato wayile kwa ninkayendi. Oho makunge a bantu ayuvwile eshe, afumine mu minzi yabo bamukonkele na mawulu. 14Oho Yeshu afumine mu wato, wamonene likunge lyalinene lya bantu. Niho abayuvwilile nceshe, pe wanyongomanishile baya bakolelenga.
15Oho kwengile mazolo bandongesha ba Yeshu bezile kukwendi, bambile ngayi, “Muno tuli mu libelelengwa, kami mutena walelakale, tongweza makunge aye ku minzi bakalilandile byakulya.”
16Yeshu wabakumbwile ngayi, “Kufwanina kuya bafwako. Bapanikenu byakulya.”
17Bakumbwile kukwendi ngayi, “Tuli tuhu na mankende mutanu na zinci zibili.”
18Yeshu wambile ngayi, “Biletenu kuno kukwami.” 19Watongwezele bantu ngayi bekale ha mwila. Niho ashimbile mankende mutanu na zinci zibili, wapenzele kuyilu, pe wakambililile kuli Nyambi, waapabwile, pe wapanikile bandongesha bendi ngayi batapishile bantu. 20Nimwabo balile kami bekutile. Pe bandongesha benzalishile zintumba likumi na zibili. 21Baya balile bengile balume bashingile kwinga makulukazi makumi mutanu, kubula kulabako bambuyama na batwanuke.
Yeshu ukwenda ha mema
(Mako 6:45-52; Yowano 6:15-21)
22Hohobene Yeshu watongwezele bandongesha bendi ngayi bengine mu wato bayengaho munciza ya liziba, oho niye ushili kupanzanisha likunge lya bantu. 23Munyima ya kupanzanisha likunge lya bantu, wayile ha lipili mukulombela. Oho kwengile mazolo wekalile ninkayendi. 24Ngoboni wato wekalile ha liziba kwakutali na lukandwa, watengatengele na mankanyi, ndaba bayilenga kwafuminenga nkuli.
25Ha shikati sha malungashiku, Yeshu wezile kukwabo, henda hayilu ya mema. 26Oho bandongesha bamumonene henda hayilu ya mema, batinine, bekalile na bowa, pe bakalokele ngayi, “Kanengi kayebela!”
27Wanguwangu Yeshu wambile kukwabo ngayi, “Tulenu mitima! Ami. Hinga mutina!”
28Pita wakumbwile kukwendi ngayi, “Mwene, ndi obe, nyintabilishe ngayi nize kukwobe hinenda hayilu ya mema.”
29Yeshu wambile ngayi, “Yeka,” niho Pita afumine mu wato, wendele hayilu ya mema kuya kuli Yeshu. 30Ngoboni oho amonene nkuli watinine. Pe watatikile kundokama, niho abilikizile ngayi, “Mwene, ndamwine.” 31Yeshu wanyankupile, wolwele liboko lyendi wamukwatile, wambile kukwendi ngayi, “Unengi muntu wakukulupila kwakushe! Bishini wekala na nkani?”
32Oho benginine mu wato, nkuli yemanine. 33Niho baya bekalile mu wato bamulemeshele, pe bambile ngayi, “Mwashikuma uli Mwana Nyambi.”
Yeshu ukunyongomanisha bakakukola ku Ngeneshaleta
(Mako 6:53-56)
34Oho Yeshu na bandongesha bendi bombokele liziba, bakumine ku litunga lya Ngeneshaleta. 35Pe oho bantu ba ku mbalila yiyo balimukile Yeshu, batumine lizu mu litunga nimwalyo. Pe bantu baletele kukwendi bakakukola nimwabo. 36Bamulombele ngayi etabilishe bakakukola, kukwata tuhu ku mungundo wa shivwalo shendi. Pe nimwabo bakwatileko banyongomanine.
Currently Selected:
Mateo 14: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
