Luka 18
18
Nguli ya mfwile na mukakuyata
1Niho Yeshu atongwezele bandongesha bendi nguli ya kubalongesha ngayi bafwanini kulombela shikati nimwasho nakubula kukwanga. 2Wambile ngayi, “Mu munzi wamina mwekalile mukakuyata wakubula kutina Nyambi hinge kupana bantu maleema. 3Mu munzi uyo kami mwekalile mfwile wa mbuyama ou wezilenga kukwendi na kulambilila ngayi, ‘Nyimanine kuli ou ukunyatisha.’ 4Mukakuyata wakanine bikati byabingi, ngoboni ku mamaninino wambile mu mutima wendi ngayi, ‘Hinge ndi nabula kutina Nyambi, hinge kupana bantu maleema, 5ngoboni ndaba ya nowu mbuyama wa mfwile ulinakunkabakanisha, nikamwimanina kutina ankwangisha hakwonzela kwiza.’ ”
6Mwene wambile kami ngayi, “Yuvwenu eshe ambile mukakuyata wakubula kwoloka. 7Kati Nyambi kukemanina bakakuhatiwa bendi wufwako, aba bakubilikiza kukwendi mwaana na wushiku? Kati ukehala shikuma kubayavwa ndi? 8Nikumitongweza ngayi, ukanyankupa na kubayatila. Ngoboni oho Mwana Muntu akeza kati ukawana kukulupila hano hanci ndi?”
Nguli ya Kafwalishi na mukakutelesha
9Yeshu kami watongwezele nguli eye ku bamo balikulupilile nibo bamwine ngayi banengi bakwoloka na kulimbwilisha baminabo. 10Wambile ngayi, “Balume babili bayile mukulombela mu Litala lya Nyambi, umo wengile Kafwalishi, wamina wengile mukakutelesha.
11Kafwalishi wemanine, walombelele ngayi, ‘Obe Nyambi nikukambilila kukwobe ndaba kaliha nengi ngo bantu bamina, bakamutongo, bakawubi, bakakutenda wunjenge hinge ngo ou mukakutelesha. 12Nazilanga kulya kabili ha shunda na tupulanga sha wulikumi sha nebye nawananga nimwabyo.’
13“Ngoboni mukakutelesha wemanine hahatali, wabulile kuyimbula meho wendi kuyilu, ngoboni walikamine ha kapumpo kendi nakwamba ngayi, ‘Obe Nyambi, nyuvwileko nceshe, nengi mukawubi!’ ” 14#Mat 23:12; Luk 14:11. Yeshu wambile kukwabo ngayi, “Uya mukakutelesha wayile ku litala lyendi hinga enga wakwoloka ku meho a Nyambi kupitakana Kafwalishi. Ndaba ou nimwendi wakulinenehesha ukashepeshiwa, kami ou ukulishepesha ukaneneheshiwa.”
Yeshu ukutandalisha batwanuke babashe
(Mateo 19:13-15; Mako 10:13-16)
15Bantu bamo baletele kuli Yeshu batwanuke babashe ngayi abakambike maboko. Oho bandongesha bendi bamoneneko, bakalihilile baya babaletele. 16Ngoboni Yeshu wehanine batwanuke nakwamba ngayi, “Lehenu batwanuke babashe beze kukwami hinga mubakanisha. Ndaba Wene wa Nyambi wa baya bakufweka ngo aba. 17Mwashikuma nikwamba kukwenu ngayi, muntu nimwendi ukubula kutambula Wene wa Nyambi ngonehe kanuke wamushe, kukenginamo wufwako.”
Mulume wakuheta
(Mateo 19:16-30; Mako 10:17-31)
18Mukulwane umo wepwile Yeshu ngayi, “Mulongeshi wamuwahe, nikufwanina kutenda nahiti ngayi nikone wumi wa mwayile myaka?”
19Yeshu wambile kukwendi ngayi, “Ndabangani ukuntumba ngayi wamuwahe? Kowa wamuwahe ndele Nyambi tuhu. 20Ukulimuka ndayano zikwamba ngayi, ‘Hinga utenda wunjenge, hinga uziha, hinga uyiba, hinga upaka mahalo, lemeeka tatiyobe na mandiyobe.’ ”
21Uya mulume wakumbwile ngayi, “Eze ndayano nimwazo nazilama kufuma ku wanuke wami.”
22Oho Yeshu ayuvwile ebye, wambile kukwendi ngayi, “Kuli shuma shimo unafwanini kutenda. Kalandishe nimwabyo ebye ulinabyo, mwanga upanike mali ku bakakushepwa, pe ukekala na wuheti muyilu, niho wize unkonke.” 23Uya mulume oho ayuvwile ebye wayenene, ndaba wekalile na wuheti wawingi shikuma.
24Yeshu watilaminine uya mulume wambile ngayi, “Shashikalu shikuma bakakuheta kwingina mu Wene wa Nyambi. 25Mwashikuma shinengi shawangu kamela kwingina mu liho lya nconga, kupitakana muntu wakuheta kwingina mu Wene wa Nyambi.”
26Bantu baya bamuyuvwile bepwile ngayi, “Pe boni yani ukatwesha kupuluka?”
27Ngoboni Yeshu wakumbwile ngayi, “Byakubula kutwesheka ku bantu, kuli Nyambi bikutwesheka.”
28Niho Pita ambile kukwendi ngayi, “Mona, etu tunashiyi byuma nimwabyo tunakukonko.”
29Yeshu wakumbwile ngayi, “Mwashikuma nikumitongweza ngayi, kowa muntu unashiyi litala lyendi, hinge mukazendi, hinge bawushinda wendi, hinge bahemi bendi, hinge bana bendi ndaba ya Wene wa Nyambi, 30ukabula kutambula byabingi ha shikati shino, pe kushikati shikeza ukawana wumi wa mwayile myaka.”
Yeshu ukwamba ka wuhatu ha lufu lwendi
(Mateo 20:17-19; Mako 10:32-34)
31Yeshu watwalile bandongesha likumi na babili ku mbali, wambile kukwabo ngayi, “Yuvwililenu! Tunakuya ku Yelushalema, oku kami nimwabyo byatikitiwile ku bamiluwe ba Nyambi bya Mwana Muntu bikatendiwa. 32Ukapanikiwa ku Bakamatunga, baya bakamukumangiza na kumuyuvwisha lisheni na kumufwizila mate. 33Bakamuzipola na kumuziha, pe ukashanguka ha mutena wa wuhatu.”
34Ngoboni bandongesha babulile kuyuvwishisha byuma ebye. Kutontoloka kwa nawa mazu kwaholekiwile kukwabo, pe babulile kulimuka ebye Yeshu ambilenga.
Yeshu ukunyongomanisha kashishitwa wa kanyepela
(Mateo 20:29-34; Mako 10:46-52)
35Oho Yeshu akumine hahepi na Yeliko, ku nkumo ya mukwakwa kwekalile kashishitwa wanyepelenga. 36Oho ayuvwile likunge lya bantu hibapita, wepwile ngayi, “Kati bishini bikutendiwa?”
37Bamutongwezele ngayi, “Kunakupita Yeshu wa ku Nazaleta.”
38Kashishitwa wabilikizile ngayi, “Obe Yeshu! Mwana Ndavita! Nyuvwileko nceshe!”
39Pe baya batwaminine kumbili bamukanishile ngayi amwene. Ngoboni wabilikizile shikuma ngayi, “Obe Mwana Ndavita! Nyuvwileko nceshe!”
40Yeshu wemanine, wabatongwezele ngayi balete kashishitwa kukwendi. Oho ezile hahepi, Yeshu wamwipwile ngayi, 41“Ukushinga ngayi nikutendele bishini?”
Kashishitwa wakumbwile ngayi, “Mwene, nikushinga ngayi utoneshe meho wami.”
42Yeshu wambile kukwendi ngayi, “Mona! Kukulupila kwobe kunakunyongomanishi.”
43Hohobene wamonene, pe wakonkele Yeshu hayemeza Nyambi. Kami bantu nimwabo oho bamonene eshe, bakomokele na kuyemeza Nyambi.
Currently Selected:
Luka 18: KK2008
Highlight
Share
Copy
Want to have your highlights saved across all your devices? Sign up or sign in
New Testament in Nkoya © The Bible Society of Zambia, 2008.
