Yowano 7

Yeshu na bawushinda wendi

1Munyima yanebye, Yeshu wendanganine mu Ngalileya. Kaliha washingile kuya mu Yundeya, ndaba Bayunda bashingile kumuziha. 2#Bal 23:34; Nday 16:13. Oho Shikati sha Shimbo sha Minkungwa sha Bayunda shekalile hahepi, 3pe bawushinda wa Yeshu bamutongwezele ngayi, “Fuma ku mwanya uno uye ku Yundeya, ngayi bandongesha bobe mwanga bakamone milimo eye ukutenda. 4Ndi Muntu ukushinga kuya mpupo, kutenda byuma kuwi wufwako. Ndaba obe ulinakutenda byuma ebye, limoneshe ku kaye.” 5(Ndaba hinge bawushinda wendi kaliha bamukulupilile.)

6Yeshu wambile kukwabo ngayi, “Shikati shami shilolo shikume. Shikati nimwasho shinafwanini kukwenu. 7Kaye kutwesha kumizimba kafwako, ngoboni kakuzimba ami, ndaba nikupaka ngayi milimo yako yayibi. 8Enu yenunga ku shimbo. Ami kuya oku ku shimbo nifwako, ndaba shikati shami shilolo shikume.” 9Oho Yeshu ambile ebye, washalile mu Ngalileya.

Yeshu ku Shimbo sha Minkungwa

10Munyima oho bawushinda wendi bayile ku shimbo na Yeshu kami wayileko. Kaliha wayile mwanancanana, ngoboni kuwi. 11Bayunda bamushingilenga ku shimbo, pe bepwile ngayi, “Kati uya muntu uli kuti?”

12Kwekalile tuyebetelo twatwingi ndaba yendi mu likunge lya bantu. Bamo bambile ngayi, “Nengi muntu wamuwahe.” Bamina bambile ngayi, “Byo, ulinakuyongesha bantu.” 13Ngoboni kowa muntu wambile kukwendi shintwantwa, ndaba batinine Bayunda.

14Oho shimbo shakumine hakati, Yeshu wayile mu Litala lya Nyambi niho atatikile kubalongesha. 15Bayunda bakomokele, pe bambile ngayi, “Kati ou muntu eze ngana unaziwana kuti? Ndaba niye shilolo alilongeshe.”

16Yeshu wakumbwile ngayi, “Ebye nikulongesha kaliha byami amimwine, ngoboni bikufuma kuli Nyambi ou wantumine. 17Muntu nimwendi ukushinga kutenda shifungo sha Nyambi, ukalimuka ndi ebye nikulongesha binafumu kuli Nyambi hinge ndi nikwamba na ngovu zami. 18Muntu ou ukwamba na ngovu zendi niye mwine, ukulishingila maleema niye mwine. Ngoboni ou ukushingila maleema uya wamutumine, nengi wakupwisha, kami mumwendi mowa mahalo. 19Kati Moshesha kaliha wamipanikile ndayano ndi? Ngoboni kowa hinge muntu umo ukulama ezi ndayano. Haya shumangani mukushinga kunzihila?”

20Likunge lya bantu bakumbwile ngayi, “Uli na mayimbwe! Kati yani ukushinga kukuziha?”

21Yeshu wabakumbwile ngayi, “Natendele shikomokesho shimo, kami nimwenu mwakomokele. 22#Shi 17:10; Bal 12:3. Moshesha wamipanikile shiheka sha mukanda (kaliha ngayi shafumine kuli Moshesha ngoboni ku bankaka zenu), pe nanenu mukutwala kanuke wa mulume ku mukanda hinge ha Mutena Wakukatala. 23#Yowa 5:9. Haya ndi kanuke wa mulume ukutwaliwa ku mukanda ha Mutena Wakukatala ngayi ndayano za Moshesha mwanga zibule kukilukiwa, ndabangani mukumpilaminina ha kunyongomanisha muntu ha Mutena Wakukatala? 24Hinga muyata na kupenza shuma nehe shikumoneka, ngoboni yatenu na kwoloka.”

Kati niye Kilishitu ndi?

25Bantu bamo ba ku Yelushalema bambile ngayi, “Kati kaliha niye ou muntu bakushinga kuziha ndi? 26Monenu! Ukwamba ku bantu mwanancanana, kami kowa ukwamba shamina kukwendi! Kati mwashikuma bakulwane ba Bayunda bakulimuka ngayi niye Kilishitu ndi? 27Ngoboni Kilishitu akeza, kowa muntu ukalimuka oku akafuma. Ngoboni etu nimwetu tukulimuka ou oku akufuma.”

28Oho Yeshu alongeshelenga mu Litala lya Nyambi, wakangokele ngayi, “Ami mundimuka, kami mukulimuka oku nafuma. Ngoboni kaliha nezile mu shifungo shami. Ou wantumine wenga wakupwisha, kami kumulimuka mufwako. 29Ngoboni ami namulimuka, ndaba nafuma kukwendi kami niye wantumine.”

30Niho bashingile kumukwata, ngoboni kowa muntu walalabilile liboko hahendi, ndaba shikati shendi oho shilolo shikume. 31Hinge noho likunge lya bantu bakulupilile mumwendi, pe bambile ngayi, “Oho Kilishitu akeza, kati ukatenda bikomokesho byabingi kupitakana ebye akutenda ou muntu ndi?”

Bakakulama bakutumiwa mukukwata Yeshu

32Bafwalishi bayuvwile likunge lya bantu hibayebetela bya Yeshu, pe bakankombela ba bakulwane na Bafwalishi batumine bakakulama ku Litala lya Nyambi na kumukwata.

33Yeshu wambile ngayi, “Nikekala nenu shikati shashishe, niho nikaya kuli ou wantumine. 34Mukancingancinga, ngoboni kukangwana mufwako, ndaba oku nikekala kutwesha kuyako mufwako.”

35Bayunda bambile mukati kabo ngayi, “Kati ou muntu ukushinga kuya kuti ngayi etu tukabule kumuwana? Ukaya ku bantu betu baya banapanzanini mukati ka Bangiliki na kubalongesha ndi? 36Kati ukutontolola bishini oho akwamba ngayi, ‘Mukancingancinga, ngoboni kukangwana mufwako,’ kami ngayi, ‘Oku nikekala kutwesha kuyako mufwako?’ ”

Tushinzi twa mema akupana wumi

37 # Bal 23:36. Mutena wa mamaninino wa shimbo wengile mutena wawunene, pe Yeshu wemanine, wakangokele ngayi, “Ndi kuli muntu uli na linyontwa eze kukwami anwe. 38#Ezek 47:1; Zeka 14:8. Ndaba kwatikitiwile ngayi, ‘Muntu ukukulupila mumwami, ku mutima wendi kukakunkula mishinzi ya mema akupana wumi.’ ” 39Ngoboni wambile ebye, kutoya Moyo Wakuyela uya bakakukulupila mumwendi bakatambula. Shikati shiyo Moyo Wakuyela shilolo apanikiwe, ndaba Yeshu shilolo atambule wuwahe wendi.

Kulitapatapa mukati ka bantu

40Oho bantu bayuvwile mazu awa, bamo bambile ngayi, “Mwashikuma nengi muluwe wa Nyambi!”

41Bamina bambile ngayi, “Niye Kilishitu!” Ngoboni bamina bepwile ngayi, “Kati Kilishitu ukafuma ku Ngalileya ndi? 42#2 Sham 7:12; Mik 5:2. Byatikitiwile bikwamba ngayi Kilishitu ukafuma ku liziko lya Ndavita, ku lukena lwa Mbetelehema oku ekalilenga Ndavita.” 43Niho kwekalile kulitapatapa mukati ka bantu ndaba yendi. 44Bamo kukwabo bashingile kumukwata, ngoboni kowa muntu walalabilile liboko hahendi.

Kubula kukulupila kwa ba kulwane ba Bayunda

45Oho bakakulama ku Litala lya Nyambi babokele, bakankombela ba bakulwane na Bafwalishi babepwile ngayi, “Kati shumangani munabulu kumuleta?”

46Bakakulama bakumbwile ngayi, “Hinga twatanga kowa muntu wambile nehi ou mulume!”

47Niho Bafwalishi babepwile ngayi, “Kati nenu kami unamyongeze ndi? 48Kati mukulimuka umo ku bakulwane hinge ku Bafwalishi unakulupili mumwendi ndi? 49Byo! Ngoboni elye likunge lya bantu aba babula kulimuka Ndayano za Moshesha, banakutiwi!”

50 # Yowa 3:1, 2. Nikondema, umo ku Bafwalishi, uyabene wezile kuli Yeshu wushiku wepwile baminendi ngayi, 51“Kati ndayano zetu zikutwitabilisha kuyata muntu oho shilolo muyuvwe mazu wendi ngayi tulimuke ebye anatende ndi?”

52Niho bakumbwile ngayi, “Kati nobe kami unafumu ku Ngalileya ndi? Shingishisha byatikitiwa, pe ukamona ngayi kowa muluwe wa Nyambi ukafuma ku Ngalileya.” 53Niho bantu nimwabo babokele ku minzi yabo.

Currently Selected:

Yowano 7: KK2008

Highlight

Copy