Yowano 5

Yeshu ukunyongomanisha muntu ku liziba lya Mbetishayinda

1Munyima yanebye, Yeshu wayile ku Yelushalema ku shimbo sha Bayunda. 2Mu Yelushalema hahepi na Lipangati lya Bambelele mwekalile liziba lyatumbiwile mu Shihebelu ngayi Mbetishaza. Kuyo kwekalile mazezelo mutanu. Mbetishaza mu Shialamayika ngayi Mbeteshayinda. 3Muya mu mazezelo mwalanganinenga bantu babengi bakakukola, tushishitwa na bakupenga na bakakalepa, baya batatililenga kuheloka kwa mema. 4Ndaba ha shikati na shikati lingeloyi lya Mwene lyakunkulukilenga mu liziba na kuhelokesha mema. Wa kutatika kwingina mu mema alinakuheloka, pe wanyongomanine ku wulweli nimwawo ekalile nawo. 5Hakati ka bayo bakakukola hekalile muntu ou wakolele myaka makumi ahatu na mutanu na yihatu. 6Oho Yeshu amumonene walimukile ngayi walanganine kuyo shikati shashitali, pe wambile kukwendi ngayi, “Ukushinga kunyongomana ndi?”

7Mukakukola wakumbwile ngayi, “Hekulu, nifwendi muntu wakunkatwila mu liziba shikati shakuheloka kwa mema, oho nikushinga kuyamo, wamina hakumpita kumbili hakwingina.”

8Yeshu wambile kukwendi ngayi, “Katuka ushimbe wulili wobe, wende.” 9Hohobene uya muntu wanyongomanine, washimbile wulili wendi, pe wendele.

Shuma eshe shatendiwile ha Mutena Wakukatala. 10#Neh 13:19; Yel 17:21. Niho Bayunda bambile kuli ou muntu wanyongomanine ngayi, “Lelo Mutena Wakukatala, ndayano kwitabilisha ngayi ushimbe wulili wobe zifwako.”

11Ngoboni wabakumbwile ngayi, “Muntu nanyongomanishi unantongweze ngayi nishimbe wulili wami, pe nende.”

12Niho bamwipwile ngayi, “Kati ou muntu yani unakutongweze ngayi ushimbe wulili wobe wende?”

13Ngoboni ou muntu wanyongomanine kaliha wamulimukile, ndaba Yeshu wabembulukilile mu likunge lya bantu.

14Munyima, Yeshu wakamuwanine mu Litala lya Nyambi, wambile kukwendi ngayi, “Mona, unanyongomana. Hinga utenda wubi kami, kutina byakupitakana ebye bikeza kukwobe.”

15Uya muntu wayile, pe wakatongwezele Bayunda ngayi Yeshu niye unamunyongomanishi. 16Niho Bayunda batatikile kuyandisha Yeshu, ndaba watendele ebye ha Mutena Wakukatala. 17Ngoboni Yeshu wabakumbwile ngayi, “Tate ushili kutenda milimo nihano, nanami nilinakutenda milimo.”

18Nohobene Bayunda bashingile shikuma kumuziha, ndaba wabulile kukiluka tuhu Mutena Wakukatala ngoboni wambile kami ngayi Nyambi wenga Tatiyendi, pe walifwanikizile hamo na Nyambi.

Ngovu za Mwana Muntu

19Yeshu wambile kukwabo ngayi, “Mwashikuma nikwamba kukwenu ngayi, Mwana kutwesha kutenda shuma shimo ninkayendi wufwako, ngoboni watendanga tuhu ebye akumona Tatiyendi hatenda, ndaba ebye akutenda nimwabyo nibyo kami Mwana akutenda. 20Ndaba Tate ukuhaka Mwana, pe unamumoneshe ebye akutenda. Kami Tate ukamumonesha milimo yakupitakana eye, pe enu nimwenu mukakomoka. 21Ngoboni nehi Tate akushangula bafu na kubapana wumi, nahiyo kami Mwana ukupana wumi kuli aba akushinga. 22Tate kuyata muntu wufwako, ngoboni unapana Mwana ngayi enge mukakuyata, 23ngayi bantu nimwabo mwanga balemeeke Mwana nehi bakulemeeka Tate. Ou ukubula kulemeeka Mwana, kulemeeka Tatiyendi ou wamutumine wufwako.

24“Mwashikuma nikwamba kukwenu ngayi, ou nimwendi ukuyuvwa mazu wami na kukulupila ou wantumine, uli na wumi wa mwayile myaka. Kuyatiwa wufwako, ngoboni unafumu ku kufwa unezi ku wumi. 25Mwashikuma nikwamba kukwenu ngayi, “Shikati shilinakwiza, wuluno shakumakale, oho bafu bakayuvwa lizu lya Mwana Nyambi, pe baya bakayuvwako bakayoya. 26Nehi Tate enga mwine wumi, nahiyo kami unapana Mwanendi ngayi enge mwine wumi. 27Kami unamupana ngovu za kuyata bantu, ndaba nengi Mwana Muntu. 28Hinga mukomoka ebye, shikati shilinakwiza oho bafu bali mu binzimbi nimwabo bakayuvwa lizu lyendi 29#Ndan 12:2. kami bakafumamo. Bantu baya batendele byakwoloka, bakashangukila ku wumi, kami baya batendele byabibi, bakashangukila ku kunonga.

Wupaki kuli Yeshu

30“Kutwesha kutenda shuma na ngovu zami nifwako. Nikuyata ngonehe Tate akuntongweza, kami nayatanga mwakwoloka, ndaba kushinga shifungo shami nifwako, ngoboni shifungo sha Tate ou wantumine.

31“Ndi nikupaka byami amimwine, pe kupaka kwami kaliha kwakupwisha. 32Kwali wamina ou ukupaka byami, pe nikulimuka ngayi eshe akupaka hahami shakupwisha. 33#Yowa 1:19-27, 3:27-30. Mwatumine miluwe kuli Yowano, kami naniye wapakile byakupwisha. 34Kaliha ngayi ami nikufwanina kutambula wupaki ku muntu, ngoboni nikwamba ebye ngayi mupuluke. 35Yowano wengile ngo lumuni lwakubanga na kubyazima, kami enu mwetabilile kuwahilila mu lumuni lwendi mu shikati shashishe. 36Ngoboni nili na wupaki wakupitakana wa Yowano, ndaba milimo eye ampanikile Tate ngayi niyimanishe niyo nikutenda, eye milimo yikumpaka ngayi Tate niye wantumine. 37#Mat 3:17; Mak 1:11; Luk 3:22. Na Tate ou wantumine ukupaka byami. Enu hinga mwatanga kuyuvwa lizu lyendi, hinge kumona lupala lwendi, 38kami lizu lyendi kwikala mumwenu lifwako, ndaba kukulupila muli ou atumine Tate mufwako. 39Enu mukushingishisha byatikitiwile, ndaba mukuhanganika ngayi mumwabyo mukuwanamo wumi wa mwayile myaka. Kami ebye byatikitiwa bikupaka byami! 40Ngoboni enu munakana kwiza kukwami ngayi mwikale na wumi.

41“Kushinga maleema ku bantu nifwako. 42Ngoboni nikulimuka ngayi mowa shishemo sha Nyambi mu mitima yenu. 43Ami ninezi mu lizina lya Tate, kuntambula mufwako, ngoboni wamina ukwiza mu lizina lyendi niye mwine, mukumutambula. 44Mukushinga kutambula maleema umo ku wamina, ngoboni kushinga maleema anafumu kuli Nyambi umo pele mufwako. Haya enu mukatwesha kukulupila nahiti kukwami? 45Hinga muhanganika ngayi nikamifweta kuli Tate. Moshesha ou munakulupili mumwendi niye ukamifweta. 46Shinga mwakulupilile Moshesha, shinga munankulupili, ndaba niye watikitile byami. 47Ngoboni ndi kukulupila mufwako ebye atikitile, mukakulupila nahiti mazu wami?”

Currently Selected:

Yowano 5: KK2008

Highlight

Copy