Milimo 2

Kwiza kwa Moyo Wakuyela

1 # Bal 23:15-21; Nday 16:9-11. Oho mutena wa Pentekoshita wakumine, bakakukulupila nimwabo bakungulukile mu mwanya umo. 2Wanguwangu kwayuvwanikile mungunina wafumine kuyilu, ngonehe nkuli yayinene, pe yenzalile mu litala nimwalyo muyo bekalile. 3Niho bamonene ngonehe milangi ya mundilo, kami yekalile hayilu ya umo na wamina kukwabo. 4Nimwabo benzalile na Moyo Wakuyela, pe batatikile kwamba na zindimi zashenge, ngonehe Moyo wabapanine byakwamba.

5Kwekalile Bayunda bakakulemesha Nyambi mu Yelushalema, baya bafumine ku matunga nimwawo a mu kaye. 6Oho bayuvwile mungunina, bantu babengi bakungulukile. Nimwabo balakamine ndaba muntu nimwendi wayuvwile hibamba mu lulimi lwendi. 7Bakomokele nimwabo, pe bambile ngayi, “Kati aba bantu nimwabo bakwamba nehe kaliha Bakangalileya? 8Kati shilinahiti ngayi nimwetu tukubayuvwa bakwamba mishobo yetu? 9Etu tulinakufuma ku Palitiya na Bakamendiya na Bakaelame na naba bazika mu Meshopotamiya na mu Yundeya na mu Kapandoshiya na mu Pontashi na mu litunga lya Esha* 10na mu Fwilingiya na mu Pamfwiliya na mu Engipita na mu matunga a Libya hahepi na Shilene na bayeni banafumu ku Loma, 11Bayunda na Bakamatunga, baya banatengulukili kukulemesha kwa Shiyunda, na bantu ba ku Kilete na bantu ba ku Alebiya nimwetu tulinakubayuvwa hibamba milimo ya kukomokesha ya Nyambi mu mushobo wetu!” 12Nimwabo bakomokele kami bacincokele, pe balipwile umo na wamina ngayi, “Ebye bikutontolola bishini?”

13Ngoboni bamina bakumangizile, bambile ngayi, “Banakolwo!”

Kushimikila kwa Pita

14Niho Pita emanine hamo na baminendi bantumwana likumi na umo, wambile na lizu lyakukangoka kukwabo ngayi, “Enu Bayunda, nanenu nimwenu mwekala mu Yelushalema, yuvwililenu kami muyuvwishishe mazu ami. 15Aba bantu kaliha banakolwo ngonehe mukuhanganika, ndaba shino shishili shikati sha mutanu na kaana ku lumenemene. 16Ngoboni ebye nibyo ambile muluwe Yowele ngayi,

17 # Yowe 2:28-32. ‘Nyambi wambile ngayi,

ha matena a kukotoka

nikayitila Moyo wami ha bantu nimwabo.

Bana benu ba balume na ba bambuyama

bakalubulula ebye akabaholwela Nyambi,

bandumbana benu bakamona bimono,

ba nkembele benu baka lota milo.

18Ha matena ayo,

nikayitila Moyo wami ku bakamilimo bami

ba balume nanaba ba bambuyama,

nanibo bakalubulula.

19Nikamonesha bimonekesho muyilu,

na kumonesha bikomokesho hanci,

kukekala mukeza, mundilo

na kukakama kwa wishe,

20mutena ukashipa,

na ngonda ukafutuka wakufubila

ngonehe mukeza,

oho mutena wawunene na wuwahe

wa Mwene shilolo ukume.

21Kami muntu nimwendi ukehana ha

lizina lya Mwene ukapuluka.’

22“Bantu ba Ishalela, yuvwililenu mazu awa! Yeshu wa ku Nazaleta, wengile muntu ou Nyambi apakile kukwenu na milimo ya ngovu na bimonekesho na bikomokesho ebye Nyambi atendele mumwendi mukati kenu, ngonehe mukulimuka. 23#Mat 27:35; Mak 15:24; Luk 23:33; Yowa 19:18. Byengile bihanganiko bya Nyambi kami walimukile ngayi Yeshu ukapanikiwa kukwenu, pe mwamuzihile ha kwitabilisha bantu bakawubi ngayi bamukoleke. 24#Mat 28:5-6; Mak 16:6; Luk 24:5. Ngoboni Nyambi wamushangwile ku bafu, wamushobwele ku makando a lufu, ndaba lufu kaliha lwatweshele kumumanga. 25#Nyi 16:8-11. Ndaba Ndavita watoyele byendi ngayi,

‘Namonene Mwene hambili yami shikati nimwasho,

ndaba uli ku liboko lyami lya shilyo

ngayi nibule kunyenkanishiwa.

26Nohobene mutima wami ukutangala,

kami lulimi lwami lukuwahilila,

nohobene lutu lwami lukakatala shiwahe mukulumbeza.

27Ndaba kukalehela moyo wami mu kalunga ka bafu wufwako,

hinga kukalehela wakuyela wobe ngayi abole wufwako.

28Unamoneshe nzila ya wumi,

kami ukenzalisha mutima wami na kutangala ku meho wobe.’

29“Bawushinda wami, nafwanini kwamba kukwenu bya nkaka yetu Ndavita. Ou wafwile, bamufundile kami shinzimbi shendi shili kuno kukuma na ku mutena wa lelo. 30#Nyi 132:11; 2 Sham 7:12-13. Niye wengile muluwe, kami walimukile ngayi Nyambi wamuhahile na luhaho ngayi ukayaka umo wa bazukulyendi Ndavita ha litanda lyendi. 31Ndavita wamonene bya kumbili, kami wambile bya kushanguka kwa Kilishitu oho ambile ngayi,

‘Moyo wendi kukawulehela mu kalunga ka bafu wufwako,

hinge kukaleha lutu lwendi ngayi lubole wufwako.’

32Nyambi washangwile ou Yeshu ku bafu, kami etu nimwetu tuli bapaki ba byuma ebye. 33Nohobene, Nyambi unamuyaka ku liboko lyendi lya shilyo, unatambulu kuli Tatiyendi shikulupisho sha Moyo Wakuyela, anawuyitili ngonehe mukuyuvwa na kumona. 34#Nyi 110:1; 1 Koli 15:25, 27. Ndaba Ndavita kaliha wakandamine kuyilu, ngoboni niye wambile ngayi,

‘Mwene wambile kuli Mwene yami ngayi,

Ikala ku liboko lyami lya shilyo,

35hantu ninayaka bakankole bobe ku malyatilo a mawulu wobe.’

36“Nohobene bakalitala nimwalyo lya Ishalela lilimuke ngayi, Yeshu uyo mwakolekele ha shishempakano, Nyambi unamwingi Mwene na Kilishitu.”

37Oho bantu bayuvwile ebye, batampukile mu mitima yabo, pe bambile kuli Pita na ku bantumwana bamina ngayi, “Bawushinda, haya tukwinga nahiti?”

38Niho Pita ambile kukwabo ngayi, “Tengulukenu, pe muzubilishiwe muntu na muntu mu lizina lya Yeshu Kilishitu ngayi wubi wenu bawuyatile, pe mukatambula shishemo sha Moyo Wakuyela. 39Ndaba shikulupisho eshe shili kukwenu na ku bana benu na ku nimwabo baya bali kwakutali, aba Mwene Nyambi yetu akehana.”

40Na mazu amengi Pita wapakile na kubambila ngayi, “Lipulwishenu ku kashushwilo kakeza ku mukoka ou wa wubi.” 41Bantu babengi bakulupilile mazu aya ambile Pita, pe bazubilishiwile, ha mutena uyo, bantu bakushinga kulingana makulukazi ahatu balifungilile ku bandongesha. 42Bazaminine ku bilongesha bya bantumwana, bengile bakakulilumikila. Bazaminine kulya hamo mulalilo wa Mwene na kulombela.

Eshe bayoyele bakakukulupila

43Muntu nimwendi wayuvwilile Nyambi bowa, ndaba bantumwana batendelenga bimonekesho na bikomokesho byabingi. 44#Mil 4:32-35. Nimwabo bakakukulupila bekalile hamo, pe balitapililenga byuma byabo nimwabyo. 45Balandashilenga byuma byabo na wuheti wabo, pe batapishililenga mali ku bantu nimwabo, ngonehe muntu na muntu ashingilenga bya kuliyavwa nabyo. 46Ha mutena ha mutena bakungulukilenga hamo na mutima umo mu Litala lya Nyambi, kami balilenga hamo mu matala wabo. Balilenga byakulya byabo na kuwahilila na mitima ya kulilimbwilisha. 47Bayemezelenga Nyambi, pe bantu nimwabo babayamizizilenga. Kami ha mutena ha mutena Mwene walundikililenga ku litengo bantu baya bapulukilenga.

Currently Selected:

Milimo 2: KK2008

Highlight

Copy