Milimo 10

Pita na Koniliyashi

1Kwekalile muntu umo mu Sheshaliya watumbiwile ngayi Koniliyashi, wengile mukulwane wa banzita ba Baloma baya batumbiwile ngayi “Banzita ba ku Itali.” 2Wengile muntu wakushinga bya Wunyambi. Pe niye hamo na bakalitala lyendi nimwabo bengile bakakuyuvwila Nyambi bowa, kami wapaninenga bishemo byakuyavwa ku Bayunda bakushepwa, pe walombelelenga kuli Nyambi shikati nimwasho. 3Ha mutena wamina oho shikati shashingile kukuma ku sha wulikumi na mutanu, wamonene shimono, wamonene lingeloyi lya Nyambi heza kukwendi, wambile ngayi, “Obe Koniliyashi!”

4Koniliyashi wapenzele kukwendi na bowa, pe wambile ngayi, “Kati bishini Hekulu?”

Lingeloyi lyakumbwile ngayi, “Nyambi unawahilili na malombelo wobe na milimo yobe yayiwahe, haya ulinakukukumbula. 5Tuma bantu ku Yopa na kwihana umo wa lizina lya Shimoni, ou watumbiwa ngayi Pita. 6Watulila ku litala lya Shimoni mukakunyuka bitembe, liya lyazikiwa ku nkumo ya liwate.” 7Oho uya lingeloyi ambile nendi ayile, Koniliyashi wehanine bakamilimo bendi babili mu litala, na umo wa banzita ou wengile mukakushinga bya Wunyambi ku baya batendelenga milimo yendi shikati nimwasho. 8Wabatongwezele nimwabyo byatendiwile, niho abatumine ku Yopa.

9Oho kwashile, kuwana bashili ha mukala balinakuhenyena kwakwipi na Yopa, Pita wayile hayilu ya litala na kulombela, ku shikati sha mwaana. 10Wekalile na nzala kami washingilenga byakulya, pe oho bamuwahishililenga byakulya, wekalile na shimono. 11Wamonene liyilu linashinkuluku, pe shuma shakufweka ngo likwiza lyalinene, shanyenzumukilililenga hanci hinga shamangiwa ku zinkomi zasho zinaa. 12Mwekalile mishobo nimwayo ya tuyamana na biya nimwabyo byalikokanga na tuyoni twa mu mbimbayilu. 13Lizu lyambile kukwendi ngayi, “Pita, katuka uzihe, ulye!”

14Ngoboni Pita wambile ngayi, “Byo Mwene! Ndaba hinga natanga shilolo nilye shuma shimo sha mazilo hinge shakubula kuyela.”

15Lizu lyambile kami kukwendi ngayi, “Eshe anayeleshe Nyambi, hinga ushitoya ngayi sha mazilo.” 16Shiya shuma shamonekele bikati bihatu, niho shatwaliwile kuyilu.

17Oho Pita alikomokelele ngayi shimono eshe amonene shikutontoloka nahiti, bantu baya atumine Koniliyashi, oho bawanakale litala lya Shimoni, kami bemanine ku shipana. 18Pe behanine na kwipula ngayi, “Muli na muyeni kuno wa lizina lya Shimoni Pita ndi?”

19Oho Pita ekalile na kuhanganika ha shimono shiyo, niho Moyo wambile kukwendi ngayi, “Kuli bantu bahatu, bakukushinga. 20Katuka kami huluka uye nabo, hinga ushintazala, ndaba ami ninabatumu.” 21Niho Pita ayile ku bantu baya batumiwile kukwendi, pe wambile ngayi, “Ami uno, uya mukushinga. Haya munezili byuma ngani?”

22Bambile ngayi, “Koniliyashi mukulwane wa banzita niya unatutumu. Wenga muntu wakwoloka, kami mukakuyuvwila Nyambi bowa, wa mpupo yayiwahe mu litunga lya Bayunda nimwamo. Lingeloyi lyakuyela lyamutongweza ngayi akwihane, uye ku litala lyendi, ngayi ayuvwe ebye ukamba.” 23Niho Pita abengizile mu litala, pe balanganine kuyo.

Oho kwashile, Pita wayile nabo na bamo bakakukulupila ba ku Yopa bayile nendi. 24Pe oho kwashile, Pita wakumine mu Sheshaliya. Koniliyashi wabatatilililenga, kami wehanine bawushinda wendi na bahoni bendi hamo. 25Pita oho enginine, Koniliyashi wamushimbawilile, pe wawile ku mawulu wendi, wamulemeshele. 26Ngoboni Pita wamwimikile, pe wambile ngayi, “Imana, nanami nili muntu tuhu.” 27Pita wenginine nendi mu litala hibaya na kwambola, wawanine bantu babengi banakunguluku. 28Pita wambile kukwabo ngayi, “Mukulimuka enu bamwine ngayi ndayano zetu kwitabilisha Kayunda kuliwanika na Mukamatunga hinge kumuzingula zifwako. Ngoboni Nyambi unamoneshe ngayi kaliha ninafwanini kutoya muntu umo ngayi wa mazilo hinge ngayi wakubula kuyela. 29Nohobene oho munantumini bantu, ninezi kukwenu nakubula kukanangana. Haya munanyihanini bishini?”

30Koniliyashi wambile ngayi, “Matena anaa a kunyima nekala na kulombela mu litala lyami ngo ku shikati shino, shikati sha wulikumi na mutanu ku mazolo, pe namona muntu unemana kumbili yami, navwala byakubyazima, 31wambile ngayi, ‘Obe Koniliyashi Nyambi nayuvwu malombelo wobe kami unanuku milimo yobe yayiwahe. 32Nohobene tuma muntu ku Yopa, akehane Shimoni Pita, uli mu litala lya Shimoni mukakunyuka bitembe ou wazika ku nkumo ya liwate.’ 33Niho nanyankupisha kukutumina bantu, kami unawahishi aha unezi. Haya tuli kuno ku meho a Nyambi, ngayi tuyuvwilile nimwabyo ebye anakutongweze Mwene.”

Mazu a Pita

34 # Nday 10:17. Niho Pita atatikile kwamba ngayi, “Mwashikuma namono ngayi Nyambi kaliha wekala na shihota. 35Ngoboni ku mukoka nimwawo, ou ukumuyuvwila bowa na kutenda byakwoloka, ukumutambula. 36Mukulimuka lizu elye atumine Nyambi ku bantu ba Ishalela, kushimikila ncango zaziwahe za kuleta kumwena kupitila muli Yeshu Kilishitu ou Mwene wa nimwabo. 37Mukulimuka byatendiwile mu Yundeya nimwamo, kutatika mu Ngalileya, munyima ya kushimikila kwa Yowano ha bya kuzubilisha. 38Mukulimuka Nyambi eshe ayitilile Moyo Wakuyela na ngovu hali Yeshu wa ku Nazaleta, na neshe endelenga na kutenda byabiwahe, na kunyongomanisha baya nimwabo bekalile ku ngovu za Shatana, ndaba Nyambi wekalilenga nendi. 39Tuli bapaki ba byuma ebye atendele mu litunga lya Ishalela na mu Yelushalema. Bamuzihile, pe bamukolekele ha shishempakano. 40Ngoboni Nyambi wamushangwile munyima ya matena ahatu, pe wamuholwele ngayi bamumone. 41Kaliha bamumonene bantu nimwabo, ngoboni ndele bapaki baya bahatiwile kuli Nyambi, etu twalile na kunwa nendi oho washangukakale ku bafu. 42Watulayile ngayi tushimikile bantu na kumupaka ngayi niye uya Nyambi ahatile, ngayi enge mukakuyata babomi na bafu. 43Miluwe nimwabo bamupakile, ngayi ou nimwendi ukukulupila mumwendi, wubi wendi bakawuyatila kupitila mu lizina lyendi lya ngovu.”

Bakamatunga bakutambula Moyo Wakuyela

44Shikati shiya Pita ambilenga awa mazu, Moyo Wakuyela wezile hahabo baya nimwabo bayuvwilenga lizu. 45Pe Bayunda bakakukulupila baya bezile na Pita kufuma ku Yopa, bakomokele ndaba Nyambi kami wetilile shishemo sha Moyo Wakuyela ha Bakamatunga. 46Ndaba babayuvwile hibamba mu zindimi, kami balemeshele Nyambi. Niho Pita ambile ngayi, 47“Kati yani ukutwesha kukanisha aba bantu ngayi hinga bazubilishiwa na mema? Banatambulu Moyo Wakuyela ngonehe tunawutambulu etu.” 48Wabatongwezele ngayi bazubilishiwe mu lizina lya Yeshu Kilishitu. Niho bamunyepele ngayi ekale nabo matena amashe.

Currently Selected:

Milimo 10: KK2008

Highlight

Copy