ម៉ាថាយ 16

បេកផារិស៊ី រ៉ើបេកសាឌូស៊ីស្អៀពើករើងចម្លែកៗ

(ម៉ាកុស ជំពូក ៨ ខ ១១ តក់ ១៣ លូកា ជំពូក ១២ ខ ៥៤ តក់ ៥៦)

1ម្សាអិង បេកផារិស៊ី រ៉ើបេកសាឌូស៊ី ណាវចូវជួបរ៉ើព្រះយេស៊ូវ កឹណាវអនព្រះយេស៊ូវវ័រើងចម្លែកៗអនណាវពើក ចូវរ៉ើណាវស្អៀដិងប៉ាយ ព្រះពឺតប៉្រើព្រះយេស៊ូវអនចូវមេនបើ 2ម៉ងព្រះយេស៊ូវឆ្លើយរ៉ើបេកអិងប៉ាយ៖ «ពេលម័ងពើកមេឃប៉ឿក្រហមតេកត្ប៊ឺ ម័ងជ្មុងប៉ាយ ប៉្រណច្អបហឺយ ម៉ឹច្ងែត ម៉ឹក្តាវអឺ 3ពេលម័ងពើកមេឃប៉ឿក្រហមតេកច្លះ កឹស្រទំឡង់ ម័ងជ្មុងប៉ាយ ត្ងៃនីមាហឺយ ក្សាលហឺយ រើងកួឡឹងមេឃម័ងជាងស្មានក្រៃ ម៉ងរើងព្រះពឺតវ័រងៃណិងកើតន្ទ័បឺនម័ងម៉ឹយល់យ៉ាំងអិង? 4កួយសាណិង សឹតកឹប្រោ សឹតកឹក្បត់ព្រះពឺត កឹណាវស្អៀកឹពើករើងចម្លែកៗ ម៉ងណាវម៉ឹបឺនពើករើងចម្លែកៗអឺ ណាវបឺនពើកកឹរើងយ៉ាំងរើងចួសយ៉ូណាសអឺ» បឺនកឹព្រះយេស៊ូវចៀលោះរ៉ើបេកអិងប៉ឹត។

ព្រះយេស៊ូវសួរសិស្សណាវអនប៉្រយាត់រ៉ើរើងបេកផារិស៊ីរ៉ើបេកសាឌូស៊ីពង្រេន

(ម៉ាកុស ជំពូក ៨ ខ ១៤ តក់ ២១)

5ពេលសិស្សឆ្លងចៀខាងទឹសបឹង ណាវក្លក់អែលនាំប៉ាំងចៀ 6កឹព្រះយេស៊ូវសួរបេកអិងប៉ាយ៖ «ម័ងក្រៃប៉្រយាត់រ៉ើមេនាំប៉ាំងបេកផារិស៊ី រ៉ើមេនាំប៉ាំងបេកសាឌូស៊ី អនមេនទេន» 7សិស្សមោះឃ្នាចៀចូវប៉ាយ៖ «ណា ណាវជ្មុងយ៉ាំងណិង ចូវរ៉ើហៃម៉ឹបឺនអែលនាំប៉ាំងចូវបើ?» 8ព្រះយេស៊ូវដិងចិត្តបេកអិង កឹណាវមោះប៉ាយ៖ «បេកជើង្គិតវ៉ឺយ កើតន្ទ័បឺនម័ងមោះឃ្នាចៀចូវរ៉ើរើងម៉ឹបឺនអែលនាំប៉ាំងចូវយ៉ាំងណិង? 9ណា ម័ងម៉ឹយល់វ៉ាក ម៉ឹចំណាំវ៉ាក អាលឹមកឺចែកនាំប៉ាំងសងក្លាំ អនកួយសងពាន់ណាក់ចា ម័ងប៉្រមូលបឺនម្នាល្អី? 10កឹអាលឹមកឺចែកនាំប៉ាំងត្ពោលក្លាំ អនកួយប៉នពាន់ណាក់ចា ម័ងប៉្រមូលបឺនម្នាទាក់? 11កើតន្ទ័បឺនម័ងច្ងាត់រើងកឺជ្មុងម៉ឹបឺនយ៉ាំងណិង? កឺម៉ឹមេនជ្មុងរ៉ើរើងនាំប៉ាំងមេនទេនអឺ កឺស្អៀអនម័ងប៉្រយាត់រ៉ើមេនាំប៉ាំងបេកផារិស៊ី រ៉ើមេនាំប៉ាំងបេកសាឌូស៊ីអឺ» 12កឹសិស្សដិងប៉ាយ ព្រះយេស៊ូវស្អៀអនណាវប៉្រយាត់រ៉ើរើងបេកផារិស៊ីពង្រេន រ៉ើរើងបេកសាឌូស៊ីពង្រេន ម៉ឹមេនអនណាវប៉្រយាត់រ៉ើមេនាំប៉ាំងមេនទេនអឺ។

ចួសស៊ីម៉ូនសួរប៉ាយ ព្រះយេស៊ូវព្រះគ្រីស្ទ

(ម៉ាកុស ជំពូក ៨ ខ ២៧ តក់ ៣០ លូកា ជំពូក ៩ ខ ១៨ តក់ ២១)

13ពេលព្រះយេស៊ូវរ៉ើសិស្សណាវចៀតក់បនមូយបៀតក្រុងសេសារា-ភីលីព កឹណាវមោះសិស្សណាវប៉ាយ៖ «ណា កួយតឹងម៉ាត់ណាវប៉ាយ កនកួយកើតចូវរ៉ើព្រះពឺតង្កួយ?» 14សិស្សណាវឆ្លើយប៉ាយ៖ «បេកនឺចណាវប៉ាយ យ៉ូហានបេកជ្រមិចដាកអនកួយ បេកនឺចណាវប៉ាយ បេកសួរកួយពាក្យចូវរ៉ើព្រះ ជ្រមោះអេលីយ៉ា បេកនឺចណាវប៉ាយ បេកសួរកួយពាក្យចូវរ៉ើព្រះ ជ្រមោះយេរេមា បេកនឺចណាវប៉ាយបេកសួរកួយពាក្យចូវរ៉ើព្រះនាមូយហឺយ» 15កឹព្រះយេស៊ូវមោះសិស្សណាវប៉ាយ៖ «ណាង្កីម័ង ម័ងប៉ាយកឺង្កួយ?» 16ស៊ីម៉ូនពេត្រុសឆ្លើយប៉ាយ៖ «ម៉ៃព្រះគ្រីស្ទ កនព្រះពឺត ព្រះត្មង់រហូតមាត» 17ព្រះយេស៊ូវសួរប៉ាយ៖ «ស៊ីម៉ូន កនចួសយ៉ូណាសវ៉ឺយ ម៉ៃបឺនពរ៍ហឺយ ម៉ៃស្គាល់កឺយ៉ាំងណិង ម៉ឹមេនចូវរ៉ើប៉្រាជ្ញាកួយអឺ ចូវរ៉ើអូវកឺកួអាថានសួអឺ សួរម៉ៃអនស្គាល់ 18កឺសួរម៉ៃប៉ាយ ម៉ៃជ្រមោះពេត្រុស#ជំពូក ១៦ ខ ១៨ ជ្រមោះពេត្រុសណិង នៃអៃ “ត្មាវ”។ កឹបើកួយនាជើកឺ កឺអែលណាវចូវដាក់ឡឹងត្មាវដារណិង កឹរើងអាវ័អនកួយក្ចែតម៉ឹជ្នះបេកជើអឺ 19កឺអនម៉ៃកាន់កនសោបនទ្រេងថានសួសោយរាជ្យ បើម៉ៃម៉ឹអនកួយវ័ចន្ទ័មូយ ព្រះពឺតកួអាថានសួណាវព្រ័មរ៉ើម៉ៃដែល បើម៉ៃអនកួយវ័ចន្ទ័មូយ ព្រះពឺតកួអាថានសួណាវព្រ័មរ៉ើម៉ៃដែល» 20លោះរ៉ើអិង ព្រះយេស៊ូវសួរសិស្សណាវប៉ាយ៖ «ម័ងញ្ជ័ក់សួរកួយប៉ាយកឺព្រះគ្រីស្ទដឺ»។

21តាំងរ៉ើអិងចូវ ព្រះយេស៊ូវសួរសិស្សណាវប៉ាយ ណាវក្រៃកឹចៀទីក្រុងយេរូសាឡឹម រ៉ើសួរប៉ាយតេកអិងក្រេងទុំ មេៗចួសចារ្យ រ៉ើគ្រូខាងច្បាប់គម្ពីរ៍ព្រះពឺតនាំឃ្នាវ័បាបណាវច្នាប់មេនទេន បឺនកឹកួយកម្ចែតណាវច្ពស់ ម៉ងណាវក្ចែតប៉ៃត្ងៃ កឹត្មង់ចៀក្រោយ 22ពេលពេត្រុសសង់យ៉ាំងអិង ណាវម៉ឹពេញចិត្តអឺ កឹណាវនាំព្រះយេស៊ូវចៀលោះរ៉ើកួយ ណាវសួរប៉ាយ៖ «ព្រះអឺយ កឺស្អៀអនព្រះពឺតជោយម៉ៃ ញ្ជ័ក់អនម៉ៃកើតរើងយ៉ាំងអិង» 23ព្រះយេស៊ូវបែចូវពេត្រុស កឹសួរប៉ាយ៖ «មារសាតាំងវ៉ឺយ ចៀកួអាក្រោយកឺចៀ ញ្ជ័ក់ខឹតកឺ ម៉ៃប៉ាយយ៉ាំងណិង ម៉ឹមេនតូនចិត្តព្រះពឺតអឺ តូនចិត្តកួយអឺ»។

24លោះរ៉ើអិង ព្រះយេស៊ូវសួរសិស្សណាវប៉ាយ៖ «បើកួយនាស្អៀចៀតូនកឺ ញ្ជ័ក់គឹតរ៉ើចាក់អែង ក្រៃព្រ័មក្ចែត#ជំពូក ១៦ ខ ២៤ ពាក្យដើមឡឹងគម្ពីរ៍ប៉ាយ “ក្រៃដលល័ងច្កាងហន់អែង”។ កឹប៉កតូនកឺចៀ 25បើកួយនាគឹតកឹរ៉ើជីវិតចាក់អែងម៉ឹព្រ័មប៉កតូនកឺ កួយអិងម៉ឹបឺនជីវិតត្មង់មាតអឺ ម៉ងបើកួយនាម៉ឹគឹតរ៉ើជីវិតចាក់អែងអាសារកឹកឺ កួយអិងបឺនជីវិតត្មង់មាត 26បើកួយនាមូយណាក់បឺនក្ដាប់ក្តែកតឹងក្លាំ ម៉ងម៉ឹបឺនជីវិតត្មង់មាត កើតប៉្រយោជន៍ដែលបើ? ណា ជីវិតកួយកើតចន្ទ័អែលចូវចាល់បឺន? 27ពោះកនកួយកើតចូវរ៉ើព្រះពឺត រ៉ើទេវតាណាវចូវ ណាវប្រាងចាំងប៉ផ្លាក់ប៉ផ្លេកយ៉ាំងអូវណាវ កឹណាវអនកួយរង្វាន់ រ៉ើដាក់ទោសកួយ តូនចន្ទ័ៗកួយវ័ 28កឺសួរម័ងអនដិងច្បាស់ប៉ាយ បេកកួតេកណិងនឺច ណាវបឺនពើកកនកួយកើតចូវរ៉ើព្រះពឺតសោយរាជ្យដែលអឺ ញោងណាវក្ចែត»។

Currently Selected:

ម៉ាថាយ 16: KNT

Highlight

Copy