Lukas 16

Tànkùt ngalé' tshu ze nezete

1Yésu bèn ntshob ghazi'te nu i ndù: Mo' ngankàb lo ghù ngalé' tshu tse; bo se' ngù ndàm num i ndù a num nke nséb tshu tse. 2A tsiaṅ i ntshob yi ndù: Me ke nju' bo ntshob num o à ndùke? Siaṅte njoṅ tshu fa ts'o num ndé' là, nummbe o ke bèn mbèn nke ndé' tshu. 3Yen ngalé' tshu li tshob ntùm ntù i ndù: M'a' ghù tshàm à ndùke, mba tàfa' àm tshwèt nsô àm ntùm nelé' tshu l'à? Nedù' nà ké? Me ke' ghù neta. Nelon ndon ké? Mba tuswe a' ko àm. 4Me lèn ju ze me nsi ghù ndù benntùn ghù ndo' àm ntùm ndà tshob ngelaṅ ze tàfa' nsi sô àm num fa' là. 5A tsiaṅ njoṅ tse ghanjo tàfa' i fa ntshù' ntshù', ntshob mbwe i ndù: Njo tàfa' àm be wù à si'i? 6Yen ni tshob ndù: Mban mfèt nkù. Ngalé' tshu tshob yi ndù: Lo' yu ṅwa'ni njo, tswe nsi ndende, kite ṅam ntàn. 7A bèn ntshob mo' ndù: Njo be wù à si'i? Yen ni tshob ndù: Ntsi ngefet nkù. Ngalé' tshu tshob yi ndù: Lo' yu ṅwa'ni njo, kite ṅam fome. 8Tshùaben nyàmte yen ngalé' tshu ketsin li, nummb'a na' ndo' zete ngù yi là. Bon ntùm yen njù li num nzete ntshùa bon nelàn num ngùninu mub mbwe yub zwiaṅ benntùn.

9Tu wul àm, me tshob bin ndù: Bin lo' nkàb z'a ke' tsin nà nka shun yi ndù ngelaṅ z'a nsi bwoṅ bin nà, bo lo' zin ntùm ndà ts'a num ntswe yoṅ ntshù' là.

Ntag nzenze

(Mat. 5.18-32; 11.12-13)

10Mèn z'a be mèn nenùn num bontsit tshu là, bèn mb'a mèn nenùn mba num tse ndùb; là mèn z'a ke' be mèn netsin num bontsit tshu là, mb'a ke be mèn netsin mba num tse ndùb. 11A be ze bin ke' be ben nenùn num nkàb ts'a ke' tsin nà, mba we z'a nsi lé' kua' nkàb ts'a be tse nenùn nà bin à? 12A be ze bin ke' be ben nenùn ntùm nelé' ju z'a be ze mènghua là, mba we z'a nsi fà ju z'a b'a zin nà bin à?

13Sàm #Mat. 6.24ngafa' ke' ku'ni nefa' tà bàa, nummbe a' ke mbàn mo'; nke nkô mo', ke neke ndat wul i num mo', nke ngwag mo' newag lo. Be bin ke ku'ni nefa' Nsi mba nkàb.

14Ba Férésia tse bo ke nkô nkàb là be ju' men ntshob li, ntshabte Yésu. 15A tshob bo ndù: Bin b'a ben tse bo num ndo' wut tshob mba ben netsin num miag benntùn nà, là Nsi lèn ntù tsine! Ju z'a b'a ze ndùb mbwe benntùn nà, a num mb'a ṅu' mbwe Nsi.

16Ntshù' #Mat. 11.12-13mba ghatshob ntshob Nsi lo tswe tà nkum num Yohané. Fe num yen ngelaṅ nà, bo tshwèt ntshob nkùn mebwô nufen Nsi, mba we lo nke nkagtùn netsho bwe ntùm neta.

17A #Mat. 5.18fùag kamànyam mba tsha' netôge, ntshùa mb'a be ta' tsho' lag ṅwa'ni Nsi ntùm ntshù' vù nsi là.

18Mèn #Mat. 5.32; 1 Korin. 7.10-11z'a sô nzwi i mbèn nso mo' là, ghù màndà, mèn z'a bèn nso mènnzwi ze ndu i sô i là, mb'a ghù màndà.

Ngankàb mba Lazaro

19Mo' ngankàb lo be bwe, nke ma' nzwe mebwô, nabte wul i njoṅ ngelaṅ fa, mbèn nke njôg ntùm tsiaṅte njoṅ lé'njù fa. 20Mo' mbwoṅ lén se Lazaro, nke nô nzendà i ndù nkeko' ṅab i. 21A lo ke nkô neke njù mbe'te jujù mi a be ntum téblé ngankàb ngwù nsi là. Là ba mbù nke nse' ndatte ntshu nkeko' mi.

22Tshù, mbwoṅ nà kwù, ba Angél kel i njab ndàntù Abraham. Mba ngankàb bèn nkwù ze. Bo tshoṅ i. 23A tswe ntùm ngô fe ben dù' z'a ke njen nge' là, mbù' miag mi mfe tù, njen Abraham ngùanesà mba Lazaro num ndàntù i. 24A kua' neta, ntshob ndù: Tà Abraham, ko ndèn màm, ntum Lazaro ndù a tshù' ntshùa ntubu i ntùm ntse nse' njab num lém sàm, nummbe me tshwèt njen nge' kebwô ntùm yen dù' mbwôg li. 25Abraham bùnte yi ndù: Mén àm, kwimte ndù o lo kwé yu bag i, ntswe mebwô ngelaṅ o na' nke' ntùn nà, Lazaro nke njen nge'; ndonni bo tshwèt mfite ntù i, là tu wul o, o nke njen yu nge'. 26Mbèn mbe, nsam ndùb num netèt be, num netshèt ben tse bo kô nelo nsen ni nse' yoṅ la' bin nà, mba tse bo fe la' bin nse' nsen ni là.

27Ngankàb tshob ndù: Tà, me le't'o, tum Lazaro mà nsi ntùm la' tàa. 28Nummbe me ghù fèt tshàm bwe tàn, a tagte yub ndù kà mba bo yub ghù nse' ntsho ntùm yen dù' nge' li. 29Abraham bùnte yi ndù: Bo ghù Mosé mba ghatshob ntshob Nsi, a bwô ndù bo ju' yube. 30Ngankàb bèn ntshob ndù: Nga me tà Abraham, là, a be ze mèn fe à ntùm ngô fe ben kà nèn mbaṅ bo là, mba bo a' kaṅ ntù tshobe. 31Abraham tshob yi ndù: A be ze bo ke' ju' Mosé mba ghatshob ntshob Nsi là, mb'a be bo ke bam mba mèn z'a lo num vù là.

Currently Selected:

Lukas 16: BMa

Highlight

Copy