Yohané 3

Yésu mba Nikôdémo

(Mat. 18.3)

1Mo' mèn lo be netèt ba Férésia, lén se Nikôdémo. A na' mb'a mo' nkam ba Yuda. 2A se' tèttswe' ntèt Yésu, ntshob yi ndù: Rabbi, bag lène, o b'a ngatswite z'a fe à Nsi là, nummbe sàm mèn ke' ku'ni neghù lèn tshen nsà ts'o num ngù là, a be ze bo Nsi ke' bèn mbe là.

3Yésu bùnte ntshob yi ndù: Kua' nenùne, kua' nenùne, me tshob wù ndù: Mèn ze bo ke' bwe i bwe nswe là, mb'a ke' ku'ni neyen nufen Nsi.

4Nikôdémo tshob yi ndù: Be bo ku'ni nebwe mèn à ndùke ngelaṅ z'a ywèn n'à? A ku'ni nebèn ntsho bam màab bo bèn mbwe i ké?

5Yésu bùnte ndù: Kua' nenùne, kua' nenùne, me tshob wù ndù: A be ze bo ke' bwe mèn ntse mba Ywèt là, mb'a ke' ku'ni netsho ntùm nufen Nsi. 6Ze bo bwe i mbàb là b'a mbàb; ze bo bwe i Ywèt là b'a Ywèle. 7Kà tshàm mba me tshob wù ndù: A bwô bo bwe zin bwe nswe là. 8Fetmbaṅ num ntshu' mba yà lo dù' z'a kô là, o ju' ntshu' mi, ke lèn dù' z'a fe là, ke lèn mba dù' z'a nèn nà; a b'a be ndaṅndaṅ num mba we lo ze bo bwe i Ywèt là.

9Nikôdémo bùnte ntshob yi ndù: Be tshen nu li ku'ni nebumt'a ndùke? 10Yésu bùnte ntshob yi ndù: O b'a ngatswite Israél, ke lèn tshen nu li ké? 11Kua' nenùne, kua' nenùne, me tshob wù ndù bag ke ntshob à ju ze bag lèn nà, mbèn nkwé à nta ju ze bag yen nà; là bin ke bam kwénta yage. 12A be ze bin ke' bam ngelaṅ me tshwèt ntshob tshu yen njù li bin nà, mba bin nsi bam ngelaṅ me tshob tshu mfe kamànyam bin n'à ndùke?

13Sàm mèn ke' to' ko' nèn kamànyam, k'a ke nda' mèn z'a swe' mfe kamànyam nà, Mén mèn. 14Ndaṅndaṅ #Nes. 21.9mba Mosé na' mbù' nyu tù num kônkwa là, a bwô ndù bo bù' Mén mèn tù, 15ndù mba we lo z'a bam i là ghù yôg matmat. 16Nummbe Nsi lo kô njù neshu, kà mfà nkwi Mén i ntshù' ndù mba we lo z'a bam i là, k'a bi, là ndù a ghù yôg matmat.

17Nummbe Nsi lo ke tum Mén i ntùm njù à ndù a tsho'te njù, là ndù a tshùa njam i njôg njù. 18Mèn z'a bam i là mba bo ke tsho't'é; mèn z'a ke' bam i là, mba bo à tsho't'é, nummbe a ke' bam lén nkwi Mén Nsi ntshù'. 19Là yen ni b'a netsho'te ntsha, ndù nka' lo se' ntùm njù, benntùn kô njam ntshùa nka'; nummbe mfa' mub na' mb'a mi kebwô. 20Nummbe mba we lo z'a num ngù nukebwô là num mban nka', mbwôg ndù kà mfa' mi tum dù' tàyage. 21Là mèn z'a num ngù nunenùn nà, num nèn mbaṅ nka', ndù mfa' mi tswite wul i, nummbe a fa' à bo Nsi.

Miagte kwénta Yohané nganyu' benntùn ntse

(Mark. 16.15-16; Yoha. 1.6-12,19-34)

22Tshen nà lo be tshùa, Yésu nèn boa ghazi'te nu i ntùm bag ngô Yudéa, ntswe bwe tsemo' lé'njù bo à bo, nke nyu' benntùn ntse. 23Là, mba Yohané lo ke nyu' benntùn ntse mà Enon mbaṅ Salim, nummbe ntse lo be bwe yàme; mba benntùn bèn nse' bwe ngù a nyu' yub ntse. 24Bo #Mat. 14.3; Mark. 6.17; Luk. 3.19-20lo ke yoṅ ma' Yohané ndàtsha.

25Ghazi'te nu Yohané ta ntshu boa mo' ze Yuda num nu nelànte wut. 26Bo se' mbaṅ Yohané ntshob yi ndù: Rabbi, mèn ze bin yi na' mbe mo' yoṅ Yordan, z'o kwé nta mi là, tshù, a tshwèt nyu' benntùn ntse, njoṅ benntùn fa ke nèn à yi.

27Yohané bùnte, ntshob ndù: Sàm mèn ke' ku'ni nelo' ju a be ze Tà mfe kamànyam ke' fà yi là. 28Tu #Yoha. 1.20wut tsin b'a ghakwénta màm ndù me lo tshob ndù: Me ke b'a Kristô, là bo lo tum àm mbwe i. 29Mèn z'a ghù mènnzwi là b'a ndu mènnzwi, nshun ndu z'a tsin nsen nà, nju' nz'é là, tsiaṅte ntùm tsiaṅte neju' nze ndu. Yen tsiaṅte là z'a b'a yàm nà dun. 30A bwô ndù a sine, tu wul àm bite.

31Mèn z'a fe à mfe tù là tshùa njoṅ benntùn fa. Mèn z'a b'a num nsitsha' là b'a num nsitsha'a, mbèn nke ntshob à mba mèn z'a be num nsitsha' là. Mèn z'a fe kamànyam nà tshùa njoṅ benntùn fa. 32Ju z'a yen mbèn nju' là, a tshwèt nkwé nta; sàm mèn ke kwé kwénta mi. 33Mèn z'a kwé kwénta mi là, bam ndù Nsi b'a nenùne. 34Nummbe mèn ze Nsi tum i là ke ntshob à ntshob Nsi. Nummbe Nsi ke' be fi' Ywèt kà mfà. 35Tà #Mat. 11.27; Luk. 10.22num nkô Mén; a fà njoṅ tshu fa ntùm mbu mi. 36Mèn z'a bam Mén nà ghù yôg matmat; mèn z'a ke' ju' ntshu Mén ke nsi yen yôg, là yantù Nsi ghô num i.

Currently Selected:

Yohané 3: BMa

Highlight

Copy